IMAMAT 21 - Susula Malalaok Hehelu Palak Ma Hehelu Beuk

Basa imam-mala malalao-malalafun

¹ Manetualain nadenu Musa nanduku-nalosak paleta ia-la neu imam-imam, fo Harun tititi-nonosin-nala nae, “Imam esa, ta bole tao nanggenggeo aoinan-na, hu kande ana tunga tolanoo ka'a-fa'din feta natoi-natonon,

² ta'da fe'e manamatek ndia, ndia inan do ndia aman, do ndia anan, do ndia tolanoo toun,

³ do ndia tolanoo inan fo sao beitak, ma ana leo non nai uma esa dalek.

⁴ Ana ta bole tao nanggenggeo aoinan-na, nenik neu natoi saoinan-na tolanoo ka'a-fa'din.

⁵ Imam esa, ta bole nggute polik langan-na boboan seli fa, ma ta bole nggute nggolomein-na, do ta bole tao nahina aon-na nenik hata matane, fo nafa'da nae ndia bei falu.

⁶ Au nuu heheling ndia, de ta bole tao nanggenggeo Au na'deng-nga fa. Ana tunu-hotu tutunu-hohotu nana'ak soaneu Au, da'di ndia muse malalao-malalafuk.

⁷ Imam esa, ta bole sao inak esa, ana da'di hai inak manasosoa-piaok so, do inak esa, ta matatema so'on, do ina maela saok esa, nanahu imam-ma nde been-na, Au nuung ndia.

⁸ Leoina Israel-la, muse manaku, imam-ma da'di leo hataholi fo nanafe hehelik ba'eneu Au, nanahu, ana tunu-hotu tutunu-hohotu nana'ak soaneu Au. Au nde Manetualain; Au ia malalao-malalafuk, de Au tao alalao-alalafu Au anang-ngala.

⁹ Metema imam esa anafe'on-na, ana da'di ina manasosoa-piaok soona, nakadadaek aman, de muse hotunisan.

¹⁰ Imam Matuaina nde been-na, nanandoo ei basak, nenik po'a mina feta neu langan lain, ma nenik paken bua papake imam matuaina so. Hu ndia de, ana ta bole po'ilotak langadoon-na nggafu-nggafu, do ana sii-sii lulu'i bua papaken-na, fo da'di leo ta'du-tana manafaluk.

^11-12 Ndia nanafe basak leo Au mai fo ana da'di Au nuung so, da'di ana ta bole tao nanggenggeo aoinan-na fa. Boeo, ana ta bole tao nanggenggeo Au Lalaa Temang-nga, nenik ana kalua neme ndia mai, fo neu leo uma fo mamates-sa dalek, leomae mamates ndia, ndia aman do ndia inan boe.

^13-14 Ka'da, ana bole sao anafe'oana matatema esa, neme ndia leon dale mai. Ana ta bole sao inafalu esa, do ina maela saok esa, do inak esa, ana da'di hai ina manasosoa-pioak so.

¹⁵ Metema, ana la'olena nakanenetek sila-la, soona anan fo tunga ndoon-na malalao-malalafuk-ka, neukose langgenggeo. Au nde Manetualain, de Au hele hehelik basa ndia da'di leo imam matuaina so.”

¹⁶ Manetualain paleta Musa

¹⁷ fo nafa'da Harun dede'ak-kala nde ia nae, “O tititi-nonosim esa lu'u-la'ak soona, ana ta bole tunu-hotu tutunu-hohotu nana'ak soaneu Au fa. Pake paleta ndia losa dodoon-na.

¹⁸ Hataholi manatunu-hotu tutunu-hohotuk-ka, ta bole lu'u-la'ak fa, fo nde hataholi pokek, do lu'u eik, hataholi fo nalutu mata-panan, do nalutu ei-liman,

¹⁹ hataholi lima mates, do ei helak,

²⁰ hataholi pukudouk, do hataholi te'dik, hataholi fo ha'dis-sa nai matan-na do kosulouk, ma hataholi kalalis.

²¹ Imam Harun-na tititi-nonosin fo lu'u la'ak-ka, ana ta bole tunu-hotu tutunu-hohotu nana'ak fe Au fa.

²² Tehu, ana bole na'a nana'ak nanatunu-hotuk, nau tutunu-hohotu nana'ak malalao-malalafuk, do tutunu-hohotu nana'ak fo malalao-malalafuk nanseli boe.

²³ Hu kande, hataholi ndia lu'u la'ak, de ana ta bole deka no tema lelesu, fo manata'da ba'e Kama Malalao-malalafuk-ka, no mei tunu-hotuk-ka fa. Ana ta bole tao nanggenggeo basa hata-hata fo nanafe hehelik soaneu Au, nanahu Au nde Manetualain-na, de Au nde hele hehelik buas sila-la.”

²⁴ Nakanenetek sila-la nde Musa nanduku-nalosak-kana neu Harun boema anan-nala, ma neu basa leoina Israel-la lala'en-na.