IMAMAT 2 - Susula Malalaok Hehelu Palak Ma Hehelu Beuk

Tutunu-hohotu nana'ak

¹ Metema, hataholi esa tunu-hotu tutunu-hohotu nana'ak soaneu Manetualain soona, tutunu-hohotuk ndia muse nalupa ha'desopuk neulauk, fo po'a mina setun ma boomenik neu lain.

² Muse nenin leo imam-imam fo Harun tititi-nonosin-nala neu. Imam malalau-maoonok-ka muse ho'in-na ha'desopuk ndia nafanggetek esa, no mina setun-na, ma boomenin-na lala'en-na, fo tunun nai mei tunu-hotuk lain, fo da'di leo ta'du-tana, nae basa-basan lala'en-na, nanatunu-hotuk basak soaneu Manetualain so. Tutunu-hohotu nana'ak ndia boon-na, nandaa no Manetualain dalen-na.

³ Tutunu-hohotuk nana'a lenak-ka nde been-na, soaneu basa imam-mala. Tutunu-hohotuk ndia malalao-malalafuk nanseli, nanahu ho'in neme nana'ak fo tunu-hotu basan soaneu Manetualain so.

⁴ Metema, nanatunu-hotuk ndia loti nanatunuk nai mamana tutunuk-ka soona, loti ndia muse ta pake laluteik fa. Loti ndia bole makate, fo taon neme ha'desopu sopuanak mai, fo kamen no mina setun, bole kokis boe, fo lose ka'da mina setun neu.

⁵ Metema, nanatunu-hotuk ndia loti nanatunuk, fo tunun nai mamanak tutunuk lain soona, muse tao loti ndia neme ha'desopu sopuanak-ka mai, no mina setun, tehu ta pake laluteik fa.

⁶ Muse kaka'da loti nanatunu-hotuk ndia, boema di'a mina setun neu.

⁷ Metema, nanatunu-hotuk ndia, nana'ak fo nasun nai tasu dale soona, muse tao nana'ak ndia neme ha'desopu sopuanak-ka mai, ma mina setun.

⁸ Nana'ak nanataok leondiak-ka muse tunu-hotun soaneu Manetualain, fo fen leo imam-ma neu fo nenin leo mei tunu-hotuk-ka neu.

⁹ Imam-ma ho'in-na nana'ak ndia seli, fo ana tunun nai mei tunu-hotuk lain, da'di leo ta'du-tana, nae basa-basan lala'en-na nanatunu-hotuk basak soaneu Manetualain so. Boon-na nandaa no Manetualain dalen-na.

¹⁰ Nana'ak ndia lenan-na soaneu basa imam-mala. Nana'ak ndia malalao-malalafuk nanseli, nanahu ho'in neme nana'ak fo nanatunu-hotu basak soaneu Manetualain so.

¹¹ Tutunu-hohotu nana'ak soaneu Manetualain-na, ta bole nanasese'dok no fanioe do laluteik fa, nanahu fanioe-a no laluteik-ka, ta bole tunun soaneu tunu-hotuk ba'eneu Manetualain fa.

¹² Tunga teuk, emi muse tunu-hotu emi dae-oem buna-boa makasososan-na seli, soaneu Manetualain, tehu ta bole tunun nai mei tunu-hotuk lain fa.

¹³ Muse tao masik neu basa tutunu-hohotuk nana'ak-kala, nanahu masik-ka ana da'di ta'du-tana neu Manetualain hehelu-balataan soaneu emi. Da'di, basa tutunu-hohotuk-kala, muse tao masik neu.

¹⁴ Metema, emi tunu-hotu fe Manetualain gandum fo emi ketu-kolu makasososak-ka soona, meni gandum beuk fo pau-man sopuanak do gandum nanasesenak so.

¹⁵ Muse di'a mina setun neu gandum ndia, ma tao boomenik neu lain.

¹⁶ Imam-ma muse tunu gandum ma mina ndia seli ma boomenin-na lala'en-na, fo da'di leo ta'du-tana, nae basa-basan lala'en-na, nanatunu-hotu basak soaneu Manetualain so.