IMAMAT 19 - Susula Malalaok Hehelu Palak Ma Hehelu Beuk

Hoholo-lalanek la'eneu malalao-malalafuk ma ndoos ma matetuk-ka

¹ Manetualain nadenu Musa, fo

² nanduku-nalosak paleta ia-la neu leoina Israel-la nae, “Ela leo been-na, emi malalao-malalafuk, nanahu Au fo emi Manetualain nde been-na, malalao-malalafuk.

³ Hataholi-a esa-esak, muse fe ha'da-holomata neu ina-aman, ma taoafik neu fai Sabat-ta, sama leo hata fo Au paletan. Au nde emi Manetualain.

⁴ Boso sene-do'ok neu sosongo-tatangok. Boso tao dodoki-dudulak neme liti mai, fo sene-do'ok neun. Au nde emi Manetualain.

⁵ Metema, emi tunu-hotu bana soaneu tutunu-hohotu mole-dame soona, tunga Au fe nakanenetek-kala, fo ela Au sipok tutunu-hohotuk ndia.

⁶ Muse mi'a paan-na nai faik fo do'do bana ndia, do losa balahaa boe. Neu fai ka telun-na soona, muse hotu heni paa bei elak-kala,

⁷ nanahu, paa nalulik ndia. Metema, emi mi'a paa ndia soona, Au ta sipok tutunu-hohotuk ndia fa.

⁸ Ba'eneu see, fo na'a paa ndia soona, ana lu'a-lepa aon salan-na, nanahu, ana ta fe ha'da-holomata neu hata fo nanafe hehelik soaneu Au so. Au ta sipok hataholi ndia da'di Au anang so'on.

⁹ Metema, emi ketu-kolu soona, boso ke'di gandum manamoli nai emi tinam-ma su'un-nala, ma ketu-kolu basa soona, boso meu makapipili gandum nanake'di elak-kala.

¹⁰ Metema, emi seu basa angol-la boa makasososan-na soona, boso fali seluk fo meu seu angol nanaseu ela-kala. Boeo, boso hele angol boak manakonok-kala. Ela sila-la soaneu hataholi nuu-taa hata-taak-ka, ma hataholi nusa dea-la. Au nde emi Manetualain.

¹¹ Boso mamanako, boso tipu-dai, ma boso masapepeko-masandandali.

¹² Metema emi dodoon-nana, emi ta tao matetu hala heheluk ndia fa soona, boso maheluk pake Au na'deng-nga, nana no enok ndia, emi makadadaek Au na'deng-nga. Au nde emi Manetualain.

¹³ Boso lumu-ese emi nonoo hataholim-ma do malaka-ma bua-lo'an. Boso ho'u mahele hataholi fo naue-nale'di fe emi-a, ngga'din-na, leomae ka'da le'odaek esa boe.

¹⁴ Boso soo-supa hataholi pakek-ka, ma boso tao batu nakatunuk neu hataholi pokek-ka matan-na. Ela leo been-na, emi fe ha'da-holomata neu Au, nana Au nde emi Amam Manetualaim-ma.

¹⁵ Metema, emi maketu-mala'di soona, maketu-mala'di tunga matetun-na; boso mook hataholi nuu-taa hata-taak-ka, ma boso bii-mamata'u neu hataholi kamasu'i-makabetek-ka.

¹⁶ Boso la'ok neu-mai, fo kokolak hataholi manai emi leoinam-ma dalek na'den-na, fo daenga emi boso meni mamates fe emi nonoo hataholim-ma. Au nde Manetualain.

¹⁷ Boso mape'da dalek neu su'di see boen. Mole-dame moo su'di see, fo emi male'a-mapilik moon, fo daenga emi boso masala-masingo, hu kande hataholi fe'ek.

¹⁸ Boso balas nape'da dalek-ka, ma boso mamanasa hataholi fe'ek, tehu sue-lai emi nonoo hataholim-ma, sama leo emi sue-lai emi aoinam-ma. Au nde Manetualain.

¹⁹ Tunga Au paletang-ngala. Boso makasasaok bana dua, ta matak esa fa. Boso sele-nggali bini-ngges matak dua neu dae duduik esa. Boso pake bua papakek fo nanatenuk neme abas matak dua mai.

²⁰ Metema, touk esa naheluk sanga nase'o ata inan-na leo tou fe'ek neu, fo ana taon da'di sao makahatun, tehu hataholi manaasa ata ndia, beita bae fa, boema ata ndia tuan-na sungu no ata ndia soona, muse huku duas, tehu boso hukunisas, nana tao leo beek boeo, inak ndia bei da'di touk ndia atan.

²¹ Touk ndia muse neni bi'ilopo mane esa leo Au Lalaa Temang-nga lelesun-na, bafan-na neu, soaneu tutunu-hohotuk bae hutak.

²² Imam-ma muse tunu-hotu bi'ilopo ndia nai feta nalalao-nalalafuk dale, fo ela hataholi ndia sala-singon hapu do'o do ampon. Soona Au, fo Manetualain, neukose fe do'o do ampon neun.

²³ Metema, emi masok-mala nusa Kanaan-na dalek, fo emi sele ai boak mata-matak-kala nai naa, soona nai teuk telu dalen-na, boso seu boan-nala fo mi'a.

²⁴ Nai teu ka haan-na dalek, emi muse tunu-hotu la'iesak ai-la boan-nala, soaneu moke makasi neu Au, fo Manetualain.

²⁵ Nai teu ka liman-na dalek, besaka emi bole mi'a ai sila-la boan-nala. Metema, emi tao tunga basa nakanenetek sila-la soona, emi ai maboam-mala, laboa ba'uk-ka seluk. Au nde emi Manetualain.

²⁶ Boso mi'a paa daa. Boso pake mo'do-akidok, do da'di manasuangi.

²⁷ Boso nggute langadook manai emi langam-ma boboan-na, ma boso nggeu emi nggolimeim-ma.

²⁸ Boso duik mahina emi loum-ma, fo tao ta'du-tana, do tao mahina aopaam-ma, da'di leo ta'du-tana manafalu mamates. Au nde Manetualain.

²⁹ Boso makadadaek emi anainam-mala na'den-na, nenik fes ala da'di ina manasosoa-piaok nai uma sosongo-tatangok. No tatao-nono'i leondiak-ka, emi tao manggenggeo emi nusam-ma, ma tatao-nono'i malela ha'da taak-ka, neukose nalole besa-besa nai ndia.

³⁰ Tao fai malole Sabat-ta, ma fe ha'da-holomata neu mamanak fo nanahele hehelik, soaneu sene-do'ok neu Au. Au nde Manetualain.

³¹ Boso meu sanga malelak nai hataholi malalelak-kala, fo kokolak moo hataholi manamatek samanen-nala. Metema, emi tao tataos ndia soona, emi da'di hataholi manggenggeok. Au nde emi Amam Manetualaim-ma.

³² Bii-mamata'u ma fe ha'da-holomata neu hataholi lasik-kala. Ela leo been-na, emi fe ha'da-holomata, ma bii-mamata'u neu Au, nana Au nde Manetualain-na.

³³ Boso tao ta malole neu hataholi nusa dea manaleo nai emi nusam-ma.

³⁴ Taos sama leo emi taon neu hataholi fo emi leoina esa, ma sue-lais, sama leo emi sue-lai emi aoinam-ma mesak-kana. Mafandendelek mae emi boeo, maso'da hai, sama leo hataholi nusa dea nai Masir. Au nde emi Amam Manetualaim-ma.

³⁵ Boso tipu-dai hataholi fe'ek nenik uuku-dodouk, tatais do susu'di pepekok.

³⁶ Pake metel, tatais, ma susu'di matetuk. Au nde emi Amam Manetualaim-ma, ma Au nde o emi kalua meme Masir mai.

³⁷ Tunga la'iesak Au hoholo-lalaneng, ma Au paletang lala'en-na. Au nde Manetualain.”