IMAMAT 16 - Susula Malalaok Hehelu Palak Ma Hehelu Beuk

Fai malole fo sala-singok hapu do'o do ampon

¹ Mate basa Harun anan duas nai lelek ala tunu-hotu ha'i fo Manetualain nape'da dale nasak-kana fa, Manetualain kokolak no Musa

² nae, “Manduku-malosak neu o tolanoom Harun, mae ka'da neu faik fo nananaketuk-ka, besak-ka ana bole masok leo Kama Malalao-malalafuk nanseli-a dalek neu, kama ndia, nanata'da fe'ek nenik tema lelesu, nanahu, nai mamanak ndia nde Au atu'du Au aoinang-nga nai ko'as manai Peti Hehelu-balataak-ka lain. Metema Harun la'olena paleta ndia soona, neukose maten.

³ Ka'da no enok fo tunu-hotu sapi maneanak, soaneu tutunu-hohotuk fo sala-singok hapu do'o do ampon, ma bi'ilopo mane esa soaneu tutunu-hohotu nanatunuk-ka, Harun bole masok leo Kama Malalao-malalafuk nanseli-a dalek neu.”

⁴ Basa soona, Harun muse taoafik neu nakanenetek-kala nde ia. Ana beita masok leo Kama Malalao-malalafuk nanseli-a dalek neu fa te, muse nadiu oe, boema ana pake papake imam-ma, fo nde ba'du, lopo ei keke'uk, kalikee ma fefeo langak, fo basa sila-la nanatenuk neme temak abalutu-a mai.

⁵ Boema hataholi Israel-la, muse fe Harun bi'ihii mane dua, soaneu tutunu-hohotuk fo sala-singok hapu do'o do ampon, ma bi'ilopo mane esa, soaneu tutunu-hohotu nanatunuk.

⁶ Harun muse tunu-hotu sapi mane esa, soaneu tutunu-hohotuk neu ndia no teidale-bobongin-nala sala-singon hapu do'o do ampon.

⁷ Muse neni hataholi Israel-la fe bi'hii mane ka duak-kala leo Manetualain Lalaa Teman-na lelesun-na, bafan-na neu.

⁸ Nai ndia, ana muse tu'u batu, nenik ana pake batu dua, fo ana tao ta'du neu esa, nenik dede'ak-ka nae, “soaneu Manetualain”, ma esa seluk, nenik dede'ak-ka nae, “soaneu Azazel”.

⁹ Bi'ihiik fo nanahelek ba'eneu Manetualain-na, muse ana tunu-hotun, soaneu tutunu-hohotuk fo sala-singok hapu do'o do ampon,

¹⁰ Bi'ihiik fo nanahelek ba'eneu Azazel-la, muse ana pa'a kalaok kana nai Manetualain matan, soona usi henin leo moo solokaek-ka neu, ba'eneu Azazel, fo ela leoina Israel-la sala-singon nanalose henik.

¹¹ Harun tunu-hotu, ma ana do'do basa sapi mane-a, soaneu tutunu-hohotuk neu ndia no teidale-bobongin-nala sala-singon hapu do'o do ampon,

¹² muse ana ho'in-na, mamana ha'i-a neme mei tunu-hotuk-ka mai, fo ana tao nahenun nenik ha'ikaa manapila lo'a-lo'ak, ma boomeni sopuk, nafanggetek dua, fo nenin leo Kama Malalao-malalafuk nanseli-a, dalek neu.

¹³ Ana muse tunu boomenik ndia, nai Peti Hehelu-balataak-ka matan, nalosa masun-na potin-na Peti ndia tatanan-na, de Harun ta hapu nita peti ndia fa, nana metema Harun nita Peti ndia soona, neukose maten.

¹⁴ Boema, Harun muse ho'in-na sapi daa faaanak, fo ana pisi daak ndia neu Peti Hehelu-balataak-ka, tatanan-na uluk, ma la'i hitu neu Peti uluk.

¹⁵ Basa ndia soona, Harun muse do'do bi'ihiik soaneu tutunu-hohotuk, fo hataholi Israel-la sala-singon hapu do'o do ampon. Muse neni bi'ihiik ndia daan-na leo Kama Malalao-malalafuk nanseli-a dalek neu, fo ana pisin neu Peti Hehelu-balataak-ka tatanan-na uluk, ma neu Peti uluk, sama leo ana tao basan nenik sapi mane-a, daan-na so.

¹⁶ No enok ndia, ana tao nalalao-nalalafu Kama Malalao-malalafuk nanseli-a, neme leoina Israel-la manggenggeon-na mai, ma neme sila sala-singon lala'en-na mai. Muse tao nalalao-nalalafu Manetualain Lalaa Teman-na, nanahu Lalaa Temak ndia nai leoina Israel-la mamana ofun-na tala'daheon, de sila manggenggeon-na la'en

¹⁷ Mulai neme hatematak fo Harun masok leo Kama Malalao-malalafuk nanseli-a dalek neu, fo tao feta nalalao-nalalafuk-ka losa ana kalua, hataholi esa boen, ta bole nai Lalaa Temak ndia dalek fa. Ana tao basa feta nalalao-nalalafuk-ka, soaneu ndia aoinan-na mesak-kana, soaneu teidale-bobongin-nala, ma soaneu basa leoina Israel-la lala'en-na soona,

¹⁸ Harun muse kalua, fo neu leo mei tunu-hotu tutunu-hohotu nanatunuk-ka soaneu tao nalalao-nalalafu mei tunu-hotuk ndia. Muse ana ho'in-na sapi daa faaanak, ma bi'ihii daa, fo ana losen neu mei tunu-hotuk-ka, susulan manai bu'un-nala.

¹⁹ Muse ana pisi daak ndia faaanak la'i hitu, leo mei tunu-hotuk lain neu. No enok ndia, ana tao nalalao-nalalafu mei tunu-hotuk-ka neme leoina Israel-la manggenggeon-na mai, fo ela ala da'di balisi.

Bi'ihii nggeok-ka

²⁰ Tao basa feta nalalao-nalalafu Kama Malalao-malalafuk nanseli-a, ma Manetualain Lalaa Teman-na, boema mei tunu-hotun-na soona, Harun muse tunu-hotu fe Manetualain bi'ihii kalaok fo nanahelek ba'eneu Azazel-la.

²¹ Muse ana lalaa liman duas neu bi'ihiik ndia langan lain, no ana manaku la'iesak leoina Israel-la salan-na, sala-singon ma lala'olenan-nala. No enok ndia, basa leoina Israel-la salan-nala, nanalali henik leo bi'ihiik ndia langan lain neu. Boema, muse nadenu hataholi esa, fo ana usi heni bi'ihiik ndia leo moo solokaek-ka neu.

²² Bi'ihiik ndia, nde neni la'iesak leoina Israel-la sala-singon leo mamana tokotiik fo hataholi ta leo fan, de muse po'in nai moo solokaek-ka.

²³ Basa ndia soona, Harun muse masok leo Lalaa Temak dale neu, fo ana o'du heni papake imam fo ana paken nai lelek ana masok leo Kama Malalao-malalafuk nanseli-a dalek neu, fo muse ana la'oela bua papakek ndia neme ndia.

²⁴ Boema, muse nadiu oe nai mamanak esa nanahele hehelik, fo ana pake ndia papaken-na. Basa ndia soona, muse ana kalua, fo ana tunu-hotu tutunu-hohotuk soaneu ndia mesak-kana sala-singon, ma leoina Israel-la sala-singon hapu do'o do ampon

²⁵ Bana mina soaneu tutunu-hohotuk fo sala-singok hapu do'o do ampon-na, muse tunun nai mei tunu-hotuk-ka.

²⁶ Hataholi fo neu po'i bi'ihiik-ka ba'eneu Azazel nai moo solokaek-ka, ana beita fali ma'in leo mamana ofuk-ka mai fa, te muse ana safe liman-na, ma nadiu oe.

²⁷ Sapi mane ma bi'ihiik, soaneu tutunu-hohotuk fo sala-singok hapu do'o do ampon, fo neni daan-na leo Kama Malalao-malalafuk nanseli-a dalek, soaneu tutunu-hohotuk fo sala-singok hapu do'o do ampon-na, muse tunun nai mamana ofu-a deak. Muse tunu la'iesak bana ka duak-kala loun-nala, paan-nala, ma tei-aten-nala.

²⁸ Hataholi manatunun-nana, ana beita fali ma'in leo mamana oofuk-ka mai fa te, muse ana safe bua papaken-na, ma nadiu oe.

Feta nai faik sala-singok hapu do'o do ampon-na, eno-dalan

^29-31 Muse tunga nakanenetek ia-la, losa dodoon-na. Neu hataholi Yahudi-la bula ka hitun-na, fain sanahulu soona, hataholi Israel-la, ma hataholi nusa dea fo manaleo loo hataholi Israel-la, muse ala oka aon-nala, ma ta bole laue-lale'di fa, nanahu faik ndia, fai malalao-malalafuk nanseli. Nai faik ndia, muse ala tao feta, soaneu tao nalalao-nalalafu leoina Israel-la neme sala-singon lala'en-na mai, fo ela ala da'di hataholi balisi.

³² Imam Matuaina nanandoo ei basak-ka, ma nanahele hehelik ba'eneu Manetualain soaneu ana nggati aman-na, muse tao feta nalalao-nalalafuk ndia. Muse ana pake bua papake hehelik,

³³ boema ana tao feta nalalao-nalalafuk ba'eneu Kama Malalao-malalafuk nanseli-a, ba'eneu Manetualain Lalaa Teman-na, ba'eneu mei tunu-hotuk-ka, ba'eneu imam-imam-mala, ma leoina Israel-la lala'en-na.

³⁴ Muse tao feta ndia la'i esa, nai teuk esa dalen-na, soaneu tao nalalao-nalalafu leoina Israel-la neme sila sala-singon lala'en-na mai. Nakanenetek sila-la, nde muse ala tungan losa dodoon-na. Musa tao tungan, sama leo hata fo Manetualain paleta neun.