IMAMAT 14 - Susula Malalaok Hehelu Palak Ma Hehelu Beuk

Feta tao nalalao-nalalafu aoinak-ka, nai lelek lea-hai neme he'di lou mangalauk-ka mai

¹ Manetualain fe Musa,

² nakanenetek-kala nde ia, la'eneu tao nalalao-nalalafu aoinak-ka, nai lelek lea-hai neme he'di lou mangalauk-ka mai. Nai faik fo hataholi ndia lea-hai soona, muse noon leo imam-ma neu,

³ fo imam-ma noon leo mamana oofuk-ka deak neu. Metema, tunga imam-ma palisan-na nae, hataholi ndia lea-hai so, soona

⁴ imam-ma nadenun, fo neni manupui kalaok ta nalulik dua, no ai kaiou biak esa, tali pilas esa, ma aiana esa na'de hisop, ndanan esa.

⁵ Muse do'do manupui esa nai uledae lain, tehu uledae ndia oemata nai dalek.

⁶ Muse dope manupui esak-ka no ai kaiou, tali pilas-sa ma aiana hisop-pa ndanan-na leo manupui nanado'do basak-ka, daan dale neu.

⁷ Imam-ma, muse pisi manupui ndia daan-na la'i hitu neu hataholi manalea-haik ndia, ma nafa'da nae, ana lea-hai so. Boema, muse ana po'i falik manupui maso'dak-ka leo mook-ka neu.

⁸ Basa soona, hataholi ndia muse safe bua papaken-na, nggeu polik langadoon-na, ma nadiu oe. Soona ana lea-hai so, de ana bole masok leo mamana oofuk dale neu, tehu nai faik hitu dalen-na seluk, ana beita bisa masok leo ndia uma ofun dale neu fa.

⁹ Neu fai ka hitun-na soona, muse ana nggeuheni la'iesak langadoon-na, nggolomein-na boe, mata bulun-na, ma basa bulu-buluk manai aopaan-na. Boema, muse ana safe bua papaken-na, ma nadiu oe. Basa ndia soona, besak-ka ana lea-hai.

¹⁰ Neu fai ka falun-na soona, hataholi ndia muse neni bi'ilopo maneanak dua, ma bi'ilopo tenaanak esa, teuk esa, ma basa-basas ta lu'u-la'ak fa. Fe'ek neme ndia mai boe, muse neni ha'desopu nanasese'dok mina setun kilo telu, ma mina setun ba'e teluk liter esa.

¹¹ Boema, imam-ma muse noon sama-sama no tutunu-hohotun sila-la leo Manetualain Lalaa Teman-na lelesun-na, bafan-na neu.

¹² Imam-ma muse ho'in-na bi'ilopo maneanak esa, ma mina setun ba'e teluk liter esa, soaneu tutunu-hohotuk bae hutak, fo tunu-hotun da'di leo tutunu-hohotu natutu'duk ba'eneu Manetualain.

¹³ Muse do'do bi'ilopoana ndia, nai mamana hehelik, fo nde mamanak do'do bana soaneu tutunu-hohotuk fo sala-singok hapu do'o do ampon, ma tutunu-hohotu nanatunuk. Muse do'do bi'ilopo ndia, nai mamanak ndia, hu kande tutunu-hohotuk soaneu bae hutak, tutunu-hohotuk fo sala-singok hapu do'o do ampon-na, nde bee soona, malalao-malalafuk nanseli, fo imam-ma, baba'en-na nde ndia.

¹⁴ Imam-ma muse ho'in-na bi'ilopoana ndia daan faaanak, fo losen neu hataholi fo sanga nafa'dan nae ana lea-hai ndia, di'idoo konan-na, limaku'uina konan-na, ma eiku'uina konan-na.

¹⁵ Basa soona, imam-ma ho'in-na mina setun faaanak, fo ana po'an leo limadale kiin-na dalek neu.

¹⁶ Basa ndia soona, ana dope limaku'u konan-na leo mina dale neu, fo ana pisin la'i hitu nai Manetualain Lalaa Teman dale.

¹⁷ Boema, ana lose mina manai liman dale ndia, faaanak neu mamana-mamanak fo nanalose basak nenik daak so, fo nde hataholi, fo sanga nafa'dan nae ana lea-hai ndia, di'idoo konan-na, limaku'uina konan-na, ma eiku'uina konan-na.

¹⁸ Muse ana po'a mina lenak-ka neu hataholi ndia langan lain. No enok ndia, imam-ma tao feta nalalao-nalalafuk ba'eneu hataholi ndia, nai Manetualain matan.

¹⁹ Basa soona, imam-ma muse tunu-hotu tutunu-hohotuk fo sala-singok nanafe do'o ampon, fo ela hataholi manggenggeok ndia, lea-hai. Basa ndia soona, muse ana do'do bana soaneu tutunu-hohotu nanatunuk,

²⁰ fo ana tunu-hotun sama-sama no tutunu-hohotu nana'ak-ka nai mei tunu-hotuk lain. No enok ndia, imam-ma tao feta nalalao-nalalafuk, ba'eneu hataholi ndia, fo ana lea-hai.

²¹ Metema hataholi ndia nuu taa-hata taak, soona tutunu-hohotuk soaneu bae huta-ka, hataholi ndia bole neni bi'ilopo maneanak ka'da esa, soaneu tutunu-hohotu natutu'duk ba'eneu Manetualain. Fe'ek neme ndia mai boe, muse neni ha'desopu nanasese'dok mina setun kilo esa, soaneu tutunu-hohotu nana'ak, ma mina setun ba'e teluk liter esa.

²² Boeo, muse neni manupui kaluaana dua, do kateuana dua: fo esa soaneu tutunu-hohotuk fo sala-singok hapu do'o do ampon, ma esa seluk, soaneu tutunu-hohotu nanatunuk.

²³ Nai feta tao nalalao-nalalafu aoinak-ka, fai ka falun-na soona, ana muse neni basa tunu-hotuk sila-la, leo imam-ma nai Manetualain Lalaa Teman-na, lelesun-na bafan-na.

²⁴ Imam-ma ho'in-na bi'ilopoana no mina setun ndia, fo ana tunu-hotun, da'di leo tutunu-hohotu natutu'duk ba'eneu Manetualain, fo tutunu-hohotuk ndia, imam-ma baba'en-na nde ndia.

²⁵ Boema, imam-ma muse do'do bi'ilopoana ndia, fo ana lose daan faaanak neu hataholi fo sanga nafa'dan nae ana lea-hai ndia di'idoo konan-na, limaku'uina konan-na ma eiku'uina konan-na.

²⁶ Imam-ma, muse po'a mina faaanak neu lima kiin dale,

²⁷ fo ana pisi mina ndia nenik lima konan-na, la'i hitu, nai Manetualain Lalaa Teman dale.

²⁸ Boema, muse ana lose bei ela mina faaanak manai liman dale ndia, neu mamanak fo nanalose basak nenik daak-ka, fo nde hataholi fo sanga nafa'dan, nae ana lea-hai ndia, di'idoo konan-na, limaku'uina konan-na, ma eiku'uina konan-na.

²⁹ Muse po'a mina lenak-ka neu hataholi ndia langan lain, soaneu feta tao nalalao-nalalafu aoinan-na, nai Manetualain matan.

³⁰ Basa soona, imam-ma muse tunu-hotu manupui kaluaana esa do kateuana esa,

³¹ soaneu tutunu-hohotuk fo sala-singok hapu do'o do ampon, ma esa seluk, soaneu tutunu-hohotu nanatunuk-ka, sama-sama no tutunu-hohotu nana'an-na. No enok ndia, imam-ma tao hataholi ndia feta nalalao-nalalafu aoinan-na, nai Manetualain matan.

³² Nakanenetek ndia, ana da'di nakanenetek la'eneu feta tao nalalao-nalalafu aoinak-ka, ba'eneu hataholi nuu taa-hata taak fo ana lea-hai neme he'di lou mangalauk-ka mai.

Pulu po'ok-ka la'e uma

³³ Manetualain fe Musa no Harun

³⁴ nakanenetek la'eneu pulu po'ok manasii dapa-dapak-ka la'e uma. Pake nakanenetek sila-la, nai lelek leoina Israel-la masok leo Kanaan, nusak fo Manetualain fen neu sila.

³⁵ Ba'eneu see, fo ana hapu pulu po'ok nai uman dale soona, muse nafa'da dede'ak ndia neu imam-ma.

³⁶ Imam-ma beita mai palisak pulu po'ok ndia fa te, muse ana fe paleta, fo daenga kalua heni basa uma ndia oe-isin lala'en-na. Metema ta soona, su'di beek fo nai uma ndia dalek, ala da'di manggenggeok. Boema imam-ma muse mai,

³⁷ fo ana palisak ta'du-tana ndia. Metema, hapu kokoto momo'dok do pilabalanggeok, fo meten soona, nono'kabai, ana susi leo papala nanadamak dale neu,

³⁸ Imam-ma, muse la'o, fo po'ilotak uma ndia nananggoek faik hitu dalen-na.

³⁹ Neu fai ka hitun-na soona, muse ana mai palisak seluk-kana. Metema pulu po'ok ndia, ana sii dapa-dapa soona,

^40-41 muse ana fe paleta, fo daenga ala ofe heni basa pulu po'ok-ka la'e papala nanadamak-ka batun sila-la, ma pulu po'ok-ka na'a faa-faa no batu manai papala nanadamak-ka dalek ndia. Muse tapa heni pelestel ma batu fo pulu po'ok-ka na'a faa-faa non sila-la, leo mamana manggenggeok esa nai kota deak.

⁴² Boema, muse nggati batu nanakalua henik sila-la, nenik batu beuk. Muse nggati heni, uma ndia papala nanadaman-na lala'en-na, nenik pelestel beuk.

⁴³ Metema, nggati basa uma ndia batun-nala, ma lose basa papala nanadaman-na, boema pelestel seluk-kana so, tehu ta'du-tana ndia da'di seluk,

⁴⁴ soona imam-ma muse mai, fo ana palisak seluk uma ndia. Metema, pulu po'ok ndia memak ana sii dapa-dapa, soona uma ndia manggenggeok,

⁴⁵ de muse ofe henin. Muse neni ai-batu-nala, ma palesten-nala, leo mamana manggenggeok-ka nai kota deak.

⁴⁶ Nai lelek, uma ndia bei nananggoek, boema su'di see, ana masok leo dalek neu soona, nangenggeo losa le'do tenak.

⁴⁷ Ba'eneu see, fo ana sungu do na'a-ninu nai uma ndia dalek soona, muse ana safe bua papaken-na.

⁴⁸ Tehu, metema imam-ma mai, de tunga palisan-na nae, ta'du-tana ndia, ta da'di seluk nai lelek uma ndia nanapalestel seluk-ka soona, muse nafa'da nae, uma ndia balisi, nana mopo la'iesak, pulu po'ok ndia so.

⁴⁹ Soaneu tao nalalao-nalalafu uma ndia, de imam-ma muse ho'in-na manupui dua, ai kaiou, tali pilas ma aiana esa na'de hisop ndanak esa.

⁵⁰ Muse do'do manupui esa, nai uledae lain, tehu uledae ndia oemata beuk nai dalek.

⁵¹ Boema, muse dope ai kaiou, tali pilas-sa ma aiana hisop-pa ma manupui kalaok-ka leo manupui nanado'dok-ka daan dale, ma leo oemata beuk dale neu. Basa ndia soona, muse pisi uma ndia la'i hitu.

^52-53 Muse po'i manupui kalaok-ka leo mook manai kota deak neu. Feta tao nalalao-nalalafu uma, leondiak, de uma ndia balisi.

⁵⁴ Nakanenetek-kala nde ndia, la'eneu he'di lou mangalauk-ka,

^55-56 la'eneu lou manakasipopotok-ka, bisu do kokoto fulak, do petaaok ma la'eneu pulu po'ok nai bua papakek do uma.

⁵⁷ Nakanenetek sila-la sosoan-na, soaneu naketu, ade buas ndia, balisi do manggenggeok.