HOSEA 8 - Susula Malalaok Hehelu Palak Ma Hehelu Beuk

Manetualain huku Israel nanahu ala sene-do'ok neu sosongo-tatangok

¹ Manetualain nafa'da nae, “puu pupuuk-ka, te soe-a mai! Musu sapun-na Au nusang-ngala, sama leo manupui balupua la'u manuana! Au anang-ngala, la'olena Au hehelu-balataang no sila, ma ala la'ban Au nanoling-ngala.

² Leomae loke Au lae sila Manetualain-na, ma lafa'da lae sila nde been-na, Au anang fo lalelak Au,

³ tehu ala ta nau sipo hata malole-a fa. Hu ndia de, neukose musu noon-nala usis.

⁴ Au anang-ngala hele manek, tehu ta latane Au hahapung-nga fa. Ala so'u mauli-malangan, tehu ta latane Au dale hihiing-nga fa. Ala ho'i sila lilopila lilofulan, fo ala tao dodoki-dudula sosongo-tatangok, fo mate'en-na neni nakalulutuk ba'eneu sila seluk.

⁵ Au ta ahiik anseli neu sapi lilopilas fo kota Samaria laun-nala sene-do'ok-ka fa. Au amanasas nanseli. Neukose losa faihi'da, ala tao langgenggeo aoinan-nala tataas esa, nenik ala sene-do'ok neu sosongo-tatangok-ka?

⁶ Sapi lilopilas fo Samaria sene-do'ok ndia nde been-na, Israel tukan-nala nde tao-nana! Manetualain ta nde ndia fa, de muse tao nakalulutu kana!

⁷ Au anang-ngala sele-nggali anin, de neukose ala ketu-seu ani-sangu! Sila tina gandum-ma ta namalatu fa, de neukose ana ta fe buna-boak, fo ala tao ha'desopuk soaneu sila nana'an-na fa. Tehu, metema tina ndia namalatu boeo, neukose leoina fe'ek-kala, la'a heni gandum-mala.

⁸ Sama leo ule ba'ek-ka, leondiak boe, Israel ta masosoa-ndandaak so'on, de ana da'di leoina biasa, sama leo leoina fe'ek-kala.

⁹ Sama leo keledei fuik manalena-la'bak-ka, leondiak boe, hataholi Israel-la tunga ka'da sila hihii-nanau mesan-na. Ala sanga tutulu-fafalik neme Asyur mai, ma ala asa tia-laik loo leoina fe'ek-kala.

¹⁰ Leomae leondiak boe, neukose Au tao akabubuas, fo Au hukus. Ta dook-ka so'on te, metema mane Asyur-ra tuni-ndenis soona, lahoo he'dis.

¹¹ Hataholi Israel-la, boetai lafofo'a mei tunu-hotuk ba'uk-ka, soaneu lose heni sala-singok-ka, tehu boetai hapu mamanak ba'uk-ka, soaneu tao sala-singok!

¹² Au sulak fes nanolik makadotok, tehu ala ta sipok-kasa fa, nanahu lafa'da lae sila ta paluu nanolik sila-la fa.

¹³ Ala nau tunu-hotu tutunu-hohotuk fe Au, ma la'a tutunu-hohotuk ndia paan-na, tehu Au, fo Manetualain Manakoasa, ta hii tutunu-hohotuk sila-la fa. Besak ia, neukose Au afandele sala-singon-nala, fo Au hukus, nanahu sala-singok sila-la; neukose Au haitua falik-kasa leo Masir leu!

¹⁴ Hataholi Israel-la, lafofo'a uma manek-kala, tehu lafandele heni manamakadada'dik sila. Hataholi Yehuda-la, ala tao lamaba'u sila kota-kota makota musun-nala, tehu neukose Au akona ha'i-a mai, fo ana hotu heni sila uma manen-nala ma sila kotan-nala.”