HOSEA 7 - Susula Malalaok Hehelu Palak Ma Hehelu Beuk

¹ Manetualain nafa'da nae, “Nai lelek fo Au hii akahahaik Au anang Israel, ma tao atalolole sila ha'da-tataon, boema Au ita ka'da sila tatao-nono'i mangalaun-na, ma sala-singon-nala. Sila esa ke'dindiu esa, leu lamanako nai hataholi uman, ma laseti-lalaka hataholi hata-heton nai enok-kala.

² Ala ta hapu dudu'a-lan nai dudu'a-aafin-nala dalek, lae neukose Au afandele-a basa sila tatao-nono'i mangalaun sila-la fa. Tehu sala-singon-nala lakahapi-lalas, nalosa Au itas no mangale'dok.”

Nakabua makahatuk-ka nai uma manek-ka

³ Manetualain nafa'da nae, “Laun-na sanga enok, fo ala tao lamahoko manek-ka, ma manapaleta-la dalen-nala, nenik tipu-daik ma tatao-nono'i mangalauk.

⁴ Sila basa-basas manadea-dalek, ma ta manalilinekak-kala fa. Sila dale nakamuu-nakadaun-na, sama leo ha'i nai la'o dale, fo nai lelek manatunu loti-a, beita kame ha'desopun-na fo ana tunun, de ana ta nggengge'u ha'i ndia fa.

⁵ Nai faik manek-ka fetan-na, ala fe manek-ka no manapaletan-nala linu angol losa ala mafuk, de ala tao tatao-nono'i nggoak. Mate'en-na manek-ka namahoko-setelee no basa hataholi manadea-dalek sila-la.

⁶ Sama leo ha'i nai la'o dale, leondiak boe, sila dale manatutu'u eno mangalaun-na, ma nasa-melun-nala, pila lo'a-lo'a nai dalen-nala dalek, nai le'odae katemak esa dalen-na, ma nai fai fafain-na, ana pila lo'a-lo'a sama leo ha'i pilak-ka, ana sii lapa-lapa.

⁷ No nasamelu mangalaun-nala, ala taolisa sila mauli-malangan-nala. Ala taolisa basa manek-kala bee iko. Tehu leomae ha'da-tataok-ka da'di mangalauk leondiak so, te ta hapu hataholi esa boen, hule-haladoi neu Au, fo noke tutulu-fafalik fa.”

Israel ma leoina-la

⁸ Manetualain nafa'da nae, “Leoina Israel-la, dalek esa loo leoina manai titia-tatainala, nalosa ala da'di sama leo loti fo namatasa seselik.

⁹ Ta lame'da lae, hu ka nde ala da'di esa loo leoina sila-la, de mopo be'i-balakain-nala so. Sila so'da mate'en-na sanga deka ndia so, tehu ala ta bubuluk-kana fa.

¹⁰ Hataholi Israel-la, koao-ndaeaon nananitak no mangale'dok, de ana da'di buti neu sila salan-nala. Leomae basa sila-la ala da'di so, te ala ta sanga Au boen, do ala fali leo Au, fo Manetualain, fo sila Aman Manetualain fa.

¹¹ Israel neu-mai, sama leo manupui kalua nggoak-ka. Makasososan-na, hataholi Israel-la loke tutulu-fafalik neme Masir mai, basa boema, lalai leu loke tutulu-fafalik neme Asyur mai!

¹² Tehu, neukose Au lona hihi'ik, fo nai lelek ala la'ok tunga ndia soona, Au ho'u-alas, sama leo hataholi-a ho'u-na manupui-a. Neukose Au hukus, nanahu Au bubuluk basa sila tatao-nono'i mangalaun-na so.

¹³ Ala soe, nana ala-la'oela Au so. Neukose lakalulutuk, nanahu ala lena-la'ban basa Au so. Au ahiik soi-tefas, tehu sila makaluku-makatelen neu Au-a, ka'da pepekok mesan.

¹⁴ Ala ta hule-haladoi te'e-te'e neu Au fa. Metema ala hulu-haladoi soona, ala bala aoinan-nala leu pepe'uk lain, fo ala makaleleu sama leo hataholi fo ta lamahele neu Au-a, tatao-nono'in. Metema ala hule-haladoi, fo loke gandum ma angol soona, ala tao lahina aoinan-nala, sama leo hataholi manasene-do'ok neu lamatua daebafak-ka, tatao-nono'in. Te'e-te'e, ala lena-la'ban Au!

¹⁵ Leomae Au nde akabobois de lamatua, ma Au fes be'i-balakaik, tehu ala tao nakabua makahatuk, fo ala lena-la'ban Au.

¹⁶ Ala tunga lahele ka'da lamatua daebafak fo ta lanuu koasa hata-hata fa. Ta bisa namahena fas, nana sila sama leo kokouk fo tali-na nakama'a. Sila mauli-malangan kokolak no koao-ndaeaok, hu ndia de, neukose taonisas nenik tafaina, fo hataholi Masir-rala hikas.”