HOSEA 5 - Susula Malalaok Hehelu Palak Ma Hehelu Beuk

¹ Manetualain nae, “Hai imam-mala lemin! Mamanene leona. Hai hataholi Israel-la lemin, taoafik leona! Hai manek-ka tititi-nonosin-nala lemin! Huhukuk-ka, nana naketu basak soaneu emi so! Nana, tunga ndoon-na, emi maketu-mala'di tunga ndoos ma matetuk, tehu nasafalin-na, emi da'di sama leo meobesi nai Mizpa, sama leo hihi'ik nai Lete Tabor-ra so,

² ma sama leo bolo madema nai Sitim. Hu ndia de, neukose Au huku emi basa-basam-mala!

³ Hai Israel, Au bubuluk basa hata lala'en-na la'eneu emi! O ta bisa mafuni-mala hata esa boen, neme Au mai fa. O sene-do'ok neu sosongo-tatangok, ma o ta lilineka neu Au so'on. Hu ndia de, o laum-mala, ta landaa sene-do'ok seluk neu Au so'on.”

Nasanene'dak la'eneu sosongo-tatangok

⁴ Hataholi Israel-la, tao tatao-nono'i mangalauk-ka, nininin-na nde, ala ta hapu fali ma'is leo sila Manetualain-na mai fa. Sosongo-tatangok-ka, ana koasan-nalas so, nalosa ala ta taoafik seluk neu Manetualain fa.

⁵ Israel koao-ndaeaon, nananitak no mangale'dok, de ana da'di buti neu sila salan-na. Sila sala-singon tao nalas lakatunu, de ala tu'u leu, boema leoina Yehuda, ana tu'u sama-sama nos.

⁶ Leu sanga Manetualain nenik leni bi'ilopo ma sapi soaneu tutunu-hohotuk, tehu basa sila-la, sosoa-ndandaan ta. Nana Manetualain Ana la'oelas so, de ala ta hapu latongo loo fan.

⁷ Ala ta lilineka neu Manetualain fa. Sila anan-nala, Manetualain anan ta sila fa. Hu ndia de, ta dook-ka so'on te, neukose sila nanatao namopo-namatek, sama-sama no tinan-nala.

Yehuda ma Israel latee-lata'ti

⁸ Puu pupuuk-ka nai Gibea leona! Fo liin-na, da'di ta'du-tana hala nalolook esa, soaneu natee-natatik-ka nai Rama. Eki natee-natatik-ka nai Betel! Ayo, hataholi Benyamin-nala lemin, tutulu matak, fo matee-mata'ti leona!

⁹ Neukose, mopo-mate Israel, nana fai huhukun-na, losa so. Hai laun Israel-la lemin, mamanene leona, te tao leo bee o, neukose dede'ak ndia, ana da'di.

¹⁰ Manetualain, nafa'da nae, “Au amanasa, nanahu mauli-malangan Yehuda-la, sapu-la Israel, de ala latona-la daen-na so. Hu ndia de, neukose Au fe huhukuk neus, nono'kabai oe nanapo'a henik-ka.

¹¹ Israel nanatuni-ndenik, de ta nanuu dae baba'en-na fa, nanahu ka'da nangatuuk nau-nau, fo noke tutulu-fafalik neu hata fo tunga ndoon-na, ana ta bisa tulu-fali fan.

¹² Hu ndia de, neukose Au tao akalulutuk leoina Israel-la, ma Au tao amopo-amate hataholi Yehuda-la.

¹³ Leoina Israel-la, ma hataholi Yehuda-la, lame'da lita sila ha'da-tataon mangalaun-na, boema Israel neu leo Asyur neu, fo noke tutulu-fafalik neme manek matua mai. Tehu manek ndia, ta hapu tulu-fali, do tao matalolole sila ha'da-tataon fa.

¹⁴ Sama leo meoasu-a sapu-nalas, leondiak boe, neukose Au sapu-a hataholi Israel-la, ma hataholi Yehuda-la. Au nde, neukose sisii-lulu'is, boema Au la'oelas. Metema Au lele'a-lolosos la'o soona, ta hapu hataholi esa boen, bisa soi-po'i fas.

¹⁵ Neukose, Au la'oela Au anang-ngala, losa doi-doson-nala dai, nanahu sala-singon-nala, boema ala mai sanga Au. Fafa'kama, nai doi-doson-nala dalek, neukose ala sanga enok, fo latongo loo Au.”