HOSEA 2 - Susula Malalaok Hehelu Palak Ma Hehelu Beuk

¹ Hu ndia de, maloo o nonoo hataholim-ma, nenik na'dek “Manetualain Anan” ma “Manetualain sue-lais.”

Gomer fo ta lilineka fa, ana da'di dulak esa fo nde Israel

² Manetualain nafa'da nae, “Hai Au anang-ngala lemin, au saong ta emi inam so'on, ma ndia saon ta Au fa. Hu ndia de madede'a moon, fo ela ana boso hohonge ma ana boso boe da'di manasosoa-piaok seluk bai.

³ Metema, ana da'di manasosoa-piaok nahele soona, neukose Au o'du heni bua-lo'an, fo nakahola-la sama leo nai faik fo bongin-nana. Neukose Au tao-an, da'di sama leo dae ma'dak ma dae tokotik, soona neukose maten no maa ma'dak-ka.

⁴ Neukose, Au ta sue-lai emi, fo ndia anan-nala so'on, nanahu ina manasosoa-piaok-ka nde bongi emi.

⁵ Emi inam, fo manasosoa-piaok ndia, ta name'da mamaek fa. Nafa'da nae, ‘Neukose, au u leo au tou susue-lalaing, fo manafe au nana'ak ma nininuk, tema wol ma tema a'ba lutu, mina setun ma angol-la.’

⁶ Hu ndia de, neukose Au longan nenik makatema nggauk, ma kena enon-na nenik pa'a nanadamak.

⁷ Neukose, ana usi tou susuen-nala, tehu ana ta dai fas. Neukose ana sangas, tehu ana ta hapu fas. Boema neukose nafa'da nae, ‘Neukose au fali u'ung-nga leo au saotou makasososang-nga u, nanahu au ha'da-tatao makahulung-nga, malole lena neme besak ia mai.’

⁸ Emi inam beita manaku nita nae, Au nde fe ndia gandum, angol, mina setun, ma basa lilopilas lilofulak lala'en-na, fo ana paken soaneu sene-do'ok Baal-la ndia.

⁹ Hu ndia de, nai fai ketu-kolun soona, neukose Au hela falik Au baba'e-babating, fo nde gandum, ma angol, boema Au fen tema wol ma tema a'ba lutu, fo ana pake-nggao.

¹⁰ Neukose, Au o'du akaholak-kana, nai basa tou susuen-nala matan. Ta hapu sila hataholin esa boen, bisa soi-po'in neme Au koasang-nga mai fa.

¹¹ Neukose, Au ate'e basa feta-doten lala'en-na, nau feta teuk, do feta bulak-ka boe, ma fai Sabat-tala. Dede'a keke'un-na, basa agaman-na fai malolen lala'en-na.

¹² Neukose, Au tao amate basa ai angol-lala, ma ai kaak-kala, fo tunga ndia soona, ndia ngga'di lau-onon neu basa tou susuen-nala nde ndia. Neukose, Au tao asafali ndia osi angol-la, ma osi ai kaan-na da'di nula; ma neukose bana fuik-kala tao lakalulutuk-kasa.

¹³ Neukose Au hukun, nanahu ana pake fai-faik-kala, soaneu tunu boomenik fe Baal, boema ana balias aoinan-na nenik lilo-henu, fo neu usi tou susuen-nala, boema nafandele heni Au makandondook. Au, Manetualain, kokolak ae leondia.”

Manetualain sua-lai anan-nala

¹⁴ Manetualain Manakoasa nafa'da nae, “Hu ndia de, neukose Au on leo moo solokaek-ka neu. Nai naa, neukose Au fufu'din nenik dede'a tou-ta'ek.

¹⁵ Neukose Au fe falik osi angon-nala, ma neukose Au tao Bafak Toto'a-tataak-ka da'di lelesu namahehenak. Nai naa, neukose ana sipok Au, sama leo nai lelek bei muli-solun-na, fo nai lelek besak-ka ana kalua neme Masir mai.

¹⁶ Boema, neukose noke Au soona nae, ndia saotoun-na, te ta nde Baal so'on.

¹⁷ Neukose, Au ta fen loak seseik Baal-la na'den-na so'on, nalosa neukose hataholi-a nafandele heni na'dek ndia.

¹⁸ Nai faik ndia, neukose Au tao hehelu-balataak o basa bana mata-matak lala'en-na, fo ela ala boso sapu-la Au anang-ngala. Neukose, Au tao ate'e natee-natatik lala'en-na, ma Au pe'da heok tee-tafa natee-natatik-kala, leme Au anang-ngala nusan ndia mai, fo Au tao-alas, laso'da no tetu-temak ma nee-nee lino-linok.

¹⁹ Hai Israel, neukose Au tao o da'di Au saoinang, saoina matetuk losa dodoon-na. Neukose, Au daleng-nga tu'da kasian neu o, fo Au sue-lai tataasesa, neukose Au tao tunga ndoon-na, ma lilineka.

²⁰ Nandaa no Au hehelu-balatang, de neukose Au ka'bing o, o. Neukose, o sipok Au da'di leo o Manetualaim Manakoasam-ma.

^21-22 Nai lelek ndia, metema Au anang Israel hule haladoi soona, neukose Au amanenes. Au fe u'dan-na kona neme lalai mai, nalosa daebafak-ka fe buna-boa gandum, angol ma mina setun.

²³ Neukose Au tao-a Au anang-ngala, laso'da no tetu-temak ma ala leo lahele leme sila nusan-na. Neu sila fo loken lae, ‘Fo Ta Nanasue-laik-ka fa’ neukose Au atu'du ae, Au sue-lais, ma ba'eneu sila, fo lokes lae ‘Au anang ta sila fa’ neukose Au afa'da ae, ‘Au anang emi’. Neukose, lataa lae leo ia, ‘O nde ami Manetualaim-ma.’ ”