HOSEA 14 - Susula Malalaok Hehelu Palak Ma Hehelu Beuk

¹ Muse huku Samaria, nanahu ana lena-la'ban Au. Neukose mate laun-nala nai natee-natatik dale, ma neukose lona lisa ana beuanan-nala, ma ina kailun-nala, nanasai teik.”

Hosea dokodoe fo ela Israel tuka tei-sale dale

² Hai leoina Israel-la lemin, fali me'um-ma leo emi Manetualaim-ma meu leona! Emi sala-singom tao-na emi kosik, de emi tu'u meu.

³ Fali me'um-ma leo Manetualain meu leona, fo manduku-malosak hule-haladoik ia, da'di leo emi tutunu-hohotum neu Manetualain nae, “Manetualain, fe do'o do ampon neu ami sala singom lala'en-na, ma sipo-ma ami hule-haladoim ia, soona neukose ami koa-kio O, sama leo ami hala hehelum-ma.

⁴ Neukose, Asyur ta soi-tefa-nala ami fa, ma ndala natee-natatik-kala, ta hapu tulu-fali ami fa. Neukose ami ta kokolak seluk moo dodoki-dudulak-kala mae, ami Manetualaim-ma nde sila. Ou Manetualain, O sue-lai hataholi fo, ta namahena neu hataholi esa boen.”

Manetualain helu so'da beuk-ka soaneu Israel

⁵ Manetualain nafa'da nae, “Au aloo falik Au anang manatao tofa-tafik-kala, fo Au sue-lais no dalek-katema tuak; neukose, Au ta amanasa seluk-kasa fa.

⁶ Au sama leo u'dan, ba'eneu hataholi Israel-la, fo tao nakadoe dae tokotiik-ka. Neukose, lakapela sama leo bunga, ma sama leo ai kaiou, fo okan-na tola demak-ka.

⁷ Neukose, laso'da ma lamade'u, sama leo bubu'u-palusa, fo nanupu su'di nai bee boe, lole-napun, sama leo ai setun-na, naboomeni, sama leo ai kaiou-a!

⁸ Neukose, ala fali ma'is leo Au mai, fo ala leo nai Au nasulu-nahapang dale. Neukose so'dan-nala, boetai da'di tetu-temak, sama leo gandum-ma moli nai tina maoe-maisik-ka, ma sama leo osi angol-la. Na'den-nala nanakoa-nanakiok, sama leo oe angol Libanon-na.

⁹ Hataholi Israel-la neukose tu'u-tapa heni dodoki-dudula sosongon-na, Au akabobois ma Au sipok huhule-haladoin-nala. Sama leo ai fo doon-na makadotok tataas esa, Neukose Au asulu-ahapas. Au nde ai huuk neme sila baba'e-papalan lala'en-na. Au, Manetualain nde manakokolak-ka.”

Susulak-ka kekenan-na

¹⁰ Ela leo been-na basa hataholi manatee-teno kala lalelak hata fo nanasulak nai ia, ma ana taoafik neun. Natutu'du-natutu'duk neme Manetualain mai a nde been-na tete'e ka, ma hataholi fo kamahehele ka naso'da tunga natutu'du-natutu'duk sila-la. Tehu hataholi masala-masingo ka ta taoafik neu fan nalosa ana kosik de ana tu'u neu.