HOSEA 13 - Susula Malalaok Hehelu Palak Ma Hehelu Beuk

Nakeketu mate'ek-ka la'eneu huhukuk neu Israel

¹ Makahulun-na leo Efraim nanafe ha'da-holomata, nalosa metema hapu paleta neme leo ndia mai soona, leo-leo fe'ek manai Israel-la, bii-lamata'u. Tehu leo Efraim-ma nasala-nasingo, nanahu ana sene-do'ok neu Baal-la, hu ndia de, neukose ana sapu-lalo.

² Losa besak ia, hataholi Efraim sila-la, bei tao sala-singok lahele. Ala tao dodoki-dudula lilofulak, fo ala sene-do'ok neun – dodoki-dudulak fo tunga hataholi daebafak-ka malelan-na, ma dale tutu'un-na, ma nanalulumu-eesek neme hataholi daebafak-ka liman-na mai. Lafa'da lae, “Tunu-hotu tutunu-hohotuk fe dodoki-dudulak ia-la!” Manada'di beuk, metema hataholi daebafak-ka de'i sapi ana nanadoki-dulak-ka!

³ Hu ndia de, neukose hataholi sila-la sapu-lalo, sama leo ko'dendenuk-ka do dinis-sa nai fafai anan-na. Neukose, sila sama leo anin-na fuu gandum aik-ka afun-na, nai mamana fefepa gandum ma, ma sama leo ha'imasuk fo ana kalua neme pipa dale mai.

⁴ Manetualain nafa'da nae, “Au nde Manetualain, fo emi Manetualaim-ma, nde noo emi kalua meme Masir mai. Emi ta manuu Manetualain fe'ek neme Au mai fa. Au nde emi manasoi-manatefam fo kisak.

⁵ Au nde anea emi nai dae tokotiik manai moo solokaek-ka.

⁶ Tehu nai lelek emi losa nusa malole-a, de emi makabete boema, emi mame'da-nana, dai so, de emi da'di manakoao-ndaeaok, boema emi mafandele heni Au.

⁷ Hu ndia de, neukose Au ko'bo-a emi, sama leo singa. Neukose Au soluk-a emi nai enok, sama leo meoasu kokoto mandaak ka.

⁸ Neukose Au sapu-a emi, sama leo meoasu manamopo anak-ka. Neukose Au sisii-lulu'i emi. Neukose Au kaa emi, sama leo singa kaa emi, nai emi mamanam-ma, ma neukose Au sisii-lulu'i emi, sama leo bana makaa-makisuk-ka.

⁹ Hai leoina Israel-la lemin! Neukose Au tao akalulutuk emi, fo see kande tulu-fali emi-a?

¹⁰ Emi moke manek ma mauli-malangan, tehu besak ia, basa-basas lai bee? Ade ala bisa soi-tefa-la emi laum-mala do ta?

¹¹ No nasa-meluk Au fe emi manek, ma no nasa manalua ponu-ponuk-ka, Au hela falik-kasa.”

¹² Manetualain nafa'da nae, “Israel sala-singon, ma salan-nala nanasula basak, de susulan-na nanape'dak so.

¹³ Israel hapu fai loak soaneu naso'da, tehu namanggoa de, ana ta pake matalolole fai loak ndia fa. Ndia sama leo ni'iana beuana, fo bei ela ka'da hatematak esa seluk soona, neukose bongin, tehu ana ta nau kalua neme inan tein dale mai fa.

¹⁴ Neukose, Au ta soi-tefa leoina ia, neme hataholi manamatek-kala daebafan-na mai fa. Hai mamates, nggali o he'di-laum mai leona! Makalala'ok o tatao-nono'im fo maneni nakalulutuk ndia leona! Nana, Au ta sue-lai leoina ia so'on.

¹⁵ Leomae Israel tetu-temak sama leo na'u manaeloakak-ka, tehu neukose Au haitua ani timu mato'bik-ka mai neme moo solokaek-ka mai. Neukose anin ndia, ana tao nama'da basa oemata lala'en-na, ma oedolu-la, nalosa basa hata kabelik lala'en-na mopok-kasa.