HOSEA 10 - Susula Malalaok Hehelu Palak Ma Hehelu Beuk

¹ Israel sama leo ai angol fo boan-na inu-inu. Su'i-beten-nala boetai lamaba'uk-ka boema, ala boetai tao mei tunu-hotuk ba'uk-ka. So'dan-nala boetai da'di malole boema, ala boetai tao matalolole lutu batu sosongo-tatangok fo ala sene-do'ok-kala.

² Hataholi fo dalen-nala ta ndoos sila-la, besak ia ala muse lu'a-lepa sala-singon-nala buna-boan. Neukose Manetualain tao nakalulutuk sila mei tunu-hotun-nala, ma Ana ofe heni sila lutu batu sosongon-nala.

³ Ta dook-ka so'on te, neukose lafa'da lae, “Ita manen ta, nana ita ta bii-tamata'u neu Manetualain fa. Manek esa, sosoa-ndandaan beek ba'eneu ita?”

⁴ Ala kokolak dede'ak sosoa-ndandaa taak, ma ala tao hehelu-balataa pepekok, boema ala tao hengenee-balataak fo sosoa-ndandaa taak-ka. Ala po'de lasafali hoholo-lalanek, nalosa tatao-nono'i ta ndoos ma matetuk-ka, ana moli sama leo bubu'u-palusa malasok-ka, nai tina fo ala foi-falak-ka so.

⁵ Neukose, kota Samaria laun-nala bii-lamata'u. Sila ma imam-imam fo lalalau-laoono sapi lilopilas manai Betel ndia, neukose dalen-nala he'dis-sa ma ala kii, nanahu mopo basa sila sosongo-tatangon ndia matua-mademan so.

⁶ Neukose, ala ko'o leni sosongo-tatangok ndia leo Asyur neu, fo ala fe hiik-kana neu mane matua. Israel tunga dale tutu'uk, fo manatao-nalas hapu mamaek ma nakamumulu-nakamamaek ndia.

⁷ Neukose Samaria nakalulutuk, fo loo manen-na, sama leo oe-a faa neni ai bibiak esa.

⁸ Uma sosongo-tatangok manai pupuku-pupukuk nai Betel fo hataholi Israel-la mamana sene-do'ok neu sosongo-tatangok-ka, neukose nanatao nakalulutuk. Dila-nggauk ma na'u-la, neukose ala moli nai sila mei tunu-hotun. Boema neukose, laloo lapane'e neu letek-kala lae, “Mapaluni-mala ami leona!” ma laloo neu pupukuk-kala lae, “Tuni-mala ami leona!”

Israel huhukun-na nananaketuk

⁹ Manetualain nafa'da nae, “Lelek manada'dik manai Gibea, hataholi Israel-la boeo, beita hahae tao sala-singok la'ban Au fa. Hu ndia de, nai Gibea boeo, neukose natee-natatik tuni-nalas.

¹⁰ Neukose Au sapu-a hataholi masala-masingok sila-la, fo Au hukus. Neukose leoina-la lakabubua, fo ala lena-la'ban-nasa, ma neukose sila nanahukuk, nanahu sala-singo makadoton sila-la.

¹¹ Makahulun-na, Israel sama leo sapi fa'di esa malelak-ka, fo ana nau heheta-aa'i gandum. Au ta paluu tao lange neu kandoo mana'a hiin ndia fa. Tehu besak ia, Au aketu basa soaneu Au lakan fo naue-nale'di belak. Au adenu Yehuda, fo nakau'uk, ma Au adenu Israel, fo nalelenu.

¹² Au afa'da ae, ‘Hai, Israel! Ta'ti tina beuk soaneu o, fo sele-nggali bini-ngge ndoos ma matetuk, fo ketu-kolu baba'e-papalak, fo buna-boak neme o susue-lalaim te'e-te'e neu Au-a. Nana fain-na losa, o sanga Au, fo o Manetualaim-ma. Neukose Au mai, fo Au akona fe o, Au u'da baba'e-papalang.’

¹³ Tehu o ta tao tunga fan. O sele-nggali tatao-nono'i mangalauk-ka, de o ketu-kolu ta ndoos ma matetuk-ka fa. O mu'a basa, o masapepeko-masandandalim buna-boan so.” Manetualain nafa'da seluk nae, “Hai leoina Israel-la lemin, hu kande emi mamahena emi kaleta natee-nata'tim-mala, ma emi solda'du makadotom-mala,

¹⁴ soona neukose emi laum-mala lasasale matak loo natee-natatik-ka, ma neukose emi kota musum-mala, nanatao nakalulutuk. Dada'din-na, neukose sama leo nai faik fo mane Salman-na, tao nakalulutuk kota Bet-Arbel-la nai natee-natatik dale, ma ana lolenisa inak-kala sama-sama loo anan-nala.

¹⁵ Hai laun Betel-la lemin, ndia nde neukose, ana da'di la'e emi, nanahu emi tao-no'i basa tatao-nono'i mangalauk matuaina so. Nai lelek dulufula, fo lelek natee-natatik-ka mulai tutika, neukose mate emi manem-ma.”