HAKIM-HAKIM 6 - Susula Malalaok Hehelu Palak Ma Hehelu Beuk

Gideon

¹ Hataholi Israel-la lasala-lasingo la'iesa seluk neu Manetualain nalosa Ana po'ilotak leoina Midian-na koasas teuk hitu dalen-na.

² Hataholi Israel-la bii lanseli neu hataholi Midian-nala, nalosa leu ke'ke lai leak-kala dalek, ma lai mamana fe'ek fo nee-nee lino-linok nai letek-kala.

³ Tama seluk, metema hataholi Israel-la leu tao tina-osi soona, hataholi Midian-nala mai sama-sama loo hataholi Amalek ma hataholi fe'ek-kala leme moo solokaek-ka mai, fo ala sapu-la hataholi Israel-la.

⁴ Ala ofu lai Israel nusan-na, ma ala tao lalutu basa bubu'u-palusa manai sila-la, losa leo nusak manai Gaza titia-tatain-nala nai Gaza boboan kona. Boeo, lalai leni hataholi Israel-la bana-manun, fo leo bi'ilopo, sapi ma keledein-nala. Ala ta ela hata esa boen, nalosa hataholi Israel-la, ta lanuu nana'a-nininuk makandondook so'on.

⁵ Hataholi sila-la, ala mai bua-buak-kala, loo sila bana-manun, ma lalaa teman-nala makadotok nanseli. Sila ma sila ontan-nala makadotok nanseli, de ta hapu leke-nala fas. Ala mai tao lalutu nusak ndia,

⁶ tehu hataholi Israel-la, ta taos le'e esa boen.

⁷ Basa boema, hataholi Israel-la, laloo bou-bou loke Manetualain tulu-fali sila, fo ala la'ban hataholi Midian-nala.

⁸ Manetualain nadenu nabi esa neu, de nabi ndia nafa'da nae, “Manetualain, fo Israel Manetualain-na, nafa'da nae leo ia: ‘Au soi-po'i basa emi, neme lelek emi da'di ata nai Masir so.

⁹ Au soi-tefa basa emi neme hataholi Masir-rala mai, ma neme nusak ia hataholin fo latee-lata'ti loo emi so. Au usi henis leme nusak ia mai, nai lelek emi sapu-malas, boema Au fe sila daen-na neu emi.

¹⁰ Au afa'da basa emi, ae Au nde Manetualain fo emi Manetualaim-ma, ma ae emi ta bole sene-do'ok neu leoina Amori, fo besak ia, emi leo nusan-na so, lamatua daebafan-na. Tehu, emi ta nau tunga Au paletang-ngala fa.’ ”

¹¹ Nai faik esa boema, Manetualain ata nusa so'dan-na mai leo kota Ofra mai, boema nangatuuk neu luluu aifula esa huun-na, fo Yoas hataholi esa neme Leo-ingu Abiezer-ra mai, luluu aifulan ndia. Anan-na na'de Gideon, ana bei aa'i gandum, nai mamana he'e angol-la. Ana tao ndia no nafufunik, fo ela hataholi Midian-nala boso litan.

¹² Manetualain ata nusa so'dak ndia, natu'du aoinan-na neun, de nafa'dan nae, “Hai toana makadelek-konei! Manetualain no o!”

¹³ Boema Gideon nataa nae, “Ampon tuan! Metema tete'ek-ka, Manetualain no ami soona, tao le'e de, basa dede'ak ia-la tuni la'e ami? Basa manada'di beuk fo makahulun-na Manetualain tao hai-ka, nai bee, ma hata fo ami bei-ba'i kaim-mala tuin la'eneu, tao leo beek, de Manetualain kalua heni sila leme Masir mai? Besak ia, Manetualain la'oela ami so, de Ana po'ilotak hataholi Midian-nala, koasa ami.”

¹⁴ Basa boema, Manetualain fe paleta ia neu Gideon nae, “No basa o be'i-balakaim lala'en-na, muu soi-po'i hataholi Israel-la, leme hataholi Midian-nala koasan-na mai. Au nde adenu o.”

¹⁵ Gideon nataa nae, “Manetualain, tao le'e de, au? Masa bole, au soi-po'i hataholi Israel-la leme hataholi Midian-nala koasan-na mai. Nai leo Manasye dalek, au leo-ingug-nga nde tapandoe nanseli-a. Ma nai au teidaleng-nga dalek boeo, au nde sosoa-ndandaa tak nanseli.”

¹⁶ Manetualain nae, “Tao leo bee-o, o bisa, nana neukose Au nde tulu-fali o. Neukose o bisa tao makalulutuk hataholi Midian-nala no mudak, nono'kabai o masasalematak mo ka'da hataholi esa mesak-kana.”

¹⁷ Boema, Gideon nataa nae, “Metema tete'ek-ka Manetualain nahiik au soona, so'ba fe ta'du-tana esa, mae memak Manetualain nde fe au paleta ia.

¹⁸ Au dokodoe ela leo bee-na, Manetualain mahani meme ia, losa au sadia nana'ak fe Manetualain.” Manetualain, nataa nae, “Hei, neukose Au ahani losa o fali ma'im-ma.”

¹⁹ Boema, Gideon fali ne'un, de ana tunu-nasu bi'ihiana esa, ma ana ho'i-na ha'desopuk kilo sanahulu, de ana tao loti, fo ta pake laluteik fa. Basa ndia boema, ana tao paa ndia neu sapai esa dalek, ma paaoe nai ulek esa dalek, boema, ana ho'i neni basa sila-la, de ana sadia fen neu Manetualain ata nusa so'dan, fo bei nahani nai luluu aifula huun-na ndia.

²⁰ Manetualain ata nusa so'dan ndia nae, “Pe'da paa ma loti ndia, neu batu-a ia lain, soona di'a paaoe neu lain.” Gideon tao tunga ata nusa so'dak ndia paletan-na.

²¹ Basa boema, Manetualain ata nusa so'dak ndia look liman-na neu, de ana due paa ma loti ndia, nenik ana ho'u aianak-ka pe'dan-na. Boema, batu ndia ana pila, de ha'i na'a heni paa ma loti ndia. Basa boema, ata nusa so'dak ndia, mopok-kana.

²² Gideon name'da, nae manamaik leo ndia neu ndia, nde been-na, Manetualain ata nusa so'dan-na. Boema Gideon kokolak no bibiik nae, “Soe ba'eneu au, ou Manetualain Fo Mademaina! Nana au asasalematak o, O ata nusa so'dam-ma so!”

²³ Tehu, Manetualain nafa'dan nae, “Makatetesak o dalem-ma! Boso bii. Te neukose, ta mate o fa.”

²⁴ Boema, nafofo'an-na, mei tunu-hotuk esa neu ndia, de ana foin na'de “Manetualain Oemata so'da-molek.” Mei tutunu-hohotuk ndia, bei nai Ofra, fo nde hataholi Abiezer-ra kotan-na.

²⁵ Nai le'odaek ndia, Manetualain fe paleta ia neu Gideon nae, “Pa'a-ma, o amam sapi mane neulaun-na, teun 7. Ofeheni mei tunu-hotuk fo o amam napadedeik-kana soaneu Baal, boema tao matu'u dii fo ana da'di ta'du neme lamatua daebafa inak Asyera, nai mei tunu-hotuk ndia boboan-na.

²⁶ Mapadedeik-ma, mei tunu-hotu neulauk esa neu ai batu manadodouk ndia lain. Basa soona, o muse tunu la'iesak sapi mane ndia paan-na fo da'dileo tutunu-hohotuk soaneu Manetualain. Pake o tao matu'u lamatua daebafak inak Asyera diin manada'di ta'du ndia, da'di ai ha'i.”

²⁷ Boema, Gideon helen-na, atan sanahulu, de leu tao hata, fo Manetualain paleta neun ndia. Tehu, hu kande ana bii nanseli neu teidalen-na, ma neu hataholi manai desan ndia dalek-ka, de ta napalani taon nai fai lele'dok fa. Da'di, ana taon nai fai le'odaek.

²⁸ Lelek balahaa fafaik, de kota ndia laun-na fo'a boema, lita mei tunu-hotu Baal-la ma dii manada'di ta'du neu lamatua daebafak inak Asyera, tu'u neu so. Boeo lita, lafofo'a basa mei tunu-hotuk esa, nai mamanak ndia, ma ala tunu basa sapi mane, da'dileo tutunu-hohotuk so.

²⁹ Boema, Esa natane esa nae, “See tatao-nono'in ia?” Ala palisak matalolole basan boema, ala bubuluk, Gideon, fo Yoas anan-na, nde taon-nana.

³⁰ Boema, lafa'da Yoas lae, “O anam-ma, ana ofe heni Baal mei tunu-hotun, ma ana tao natu'u dii manada'di ta'du neu lamatua daebafa inak Asyera, fo nai mei tunu-hotuk ndia boboan-na so. Hu ndia de, moo o anam ndia kalua leo ia mai. Ndia muse mate!”

³¹ Tehu Yoas nataa basa hataholi manala'ban sila-la nae, “Ade emi mook Baal, de emi nau masala'en do? See kande nok-kana soona, neukose nanataonisak faik ia! Metema, memak Manetualain nde Baal ndia soona, nemen-na, fo ndia mesak-kana nasala'e aoinan-na, nana nanaofe henik ndia, nde been-na, Baal mei tunu-hotun-na.”

³² Hu kande Yoas nafa'da nae, “Nemen-na, fo Baal mesak-kana la'ban Gideon, nana ana ofe heni mei tunu-hotun so,” boema mulai neme ndia mai, hataholi-la foi Gideon na'de “Yerubaal.”

³³ Nai lelek ndia, basa hataholi Midian, Amalek ma leoina fe'ek-kala leo-leon manai moo solokaek Yarden-na boboan dulu, lakabubua so. Ala lena Lee Yarden-na, de ala ofu nai Bafak Yizreel-La.

³⁴ Tehu, Manetualain Dula dalen-na koasa Gideon, nalosa ana puu pupuuk-ka, fo naloo leo-ingu Abiezer hataholin-nala, fo daenga, ala mai lakabubua lon.

³⁵ Boeo, nadenu hataholi neu leo, leo Asyer, Zebulon, Naftali ma leo Manasye, nau manai Lee Yarden-na boboan dulu do manai boboan muli boe, fo nokes mai lakabubua lon. Boema basa-basas mai, soaneu tulu-fali Gideon.

³⁶ Boema, Gideon nafa'da Manetualain nae, “Manetualain, O mafa'da basa, mae O nau pake au soaneu soi-po'i hataholi Israel-la.

³⁷ Metema, memak leondiak soona, nai dae ia lain, nai mamanak fo ami biasa aa'i gandum-ma, au pe'da basa, nggunggute bi'ilopo bulu-a so. Metema balahaa, dinis-sa la'e ka'da bi'ilopo ia bulun-na, te ta la'e dae-a fa, soona ndia nde da'di buti, nae neukose O pake au, soaneu soi-po'i hataholi Israel-la.”

³⁸ Boema, ana da'di leo iak: Lelek balahaa, de Gideon fo'a, de neu he'e bi'ilopo ndia bulun-na, te ana hapu dinis mango esa.

³⁹ Boema, nafa'da Manetualain nae, “Manetualain, sa'di leo been-na, metema au kokolak la'iesa seluk soona, boso mamanasa. Fe au loak, fo au so'ba seluk-kana nenik nggunggute bi'ilopo bulu ia. Tehu oek ia soona, ela leo been-na, bi'ilopo ia bulun-na ma'dak nahele, tehu dae-a makadoek.”

⁴⁰ Le'odaek ndia, Manetualain tao natetu Gideon nonoken ndia, nalosa balahaa te, bi'ilopo ndia bulun-na ma'dak, tehu dae-a makadoek, nanahu dinis-sa la'en.