HAKIM-HAKIM 5 - Susula Malalaok Hehelu Palak Ma Hehelu Beuk

Debora ma Barak nakameen-na

¹ Faik ndia, Debora ma Barak, fo Abinoam anan-na lakamee, lae leo ia:

² Koa-kio Manetualain, nana palani ta'ti batu Israel-lala, laketu basa nai dalen-nala dalek, fo leu latee-lata'ti, ma laun-nala leu latee-lata'ti no dale hihii-nanau mesan-nala.

³ Mamanene leon, hai basa mane-manek-kala ma maneana-la lemin, au akamee ba'eneu Israel Manetualain-na, fo nde Manetualain.

⁴ Lelek O la'o meme Seir mai, ou Manetualain ma O la'oela nusa Edom-ma, daebafak-ka dele, lalai-a oelolon-nala boeo, latahuka, ma ko'as-sala, po'a oen-na mai.

⁵ Letek-kala langgengo nai manakoasa Sinai matan, nai Manetualain, fo Israel Manetualain-na matan.

⁶ Nai Samgar, fo Anat anan-na tepo-lelen-na, ma nai Yael tepo-lelen-na boeo, ta hapu manasa'e onta nai nusak-ka fa, ma ta hapu hataholi manala'ok, nai okofoo lain fa.

⁷ Kota-kota Israel-la, louk, nee-nee lino-lino, nalosa o mai, hai Debora; o mai sama leo inak fo nanasue-laik.

⁸ Lelek Israel mulai sene-do'ok neu lamatua daebafak-ka, natee-natatik-ka, da'di nai sila nusan-na; palani ta'ti batu lifun haahulu nai leoina dalek, ta hapu hataholi esa boen, ana so'uk tafa-sisilo fa.

⁹ Neu basa Israel malanga solda'du matuainan, ala fe aoinan-nala no sila dale hihii-nanau mesan-na, au anduku-alosak au kokoa-kikiong neus. Koa-kio Manetualain leona!

¹⁰ Hai emi fo manasa'e keledei fulak-kala lemin, emi fo manamangatuuk nai ne'a madulak lain, ma basa emi, fo manala'o eik-kala lemin, tui-benga tutui sesengik ia!

¹¹ Lamanene hataholi makadotok lakamee, nai deka no oedolu-la, ala tui Manetualain sesengin-na do'e-do'e, Israel, fo Manetualain anan-nala sesengin-na. Boema ala la'ok lakadadalak lasale leo kota lelesuinan-na leu.

¹² Fo'a leon Debora, fo so'uk nakameek. Fo'a leon Barak, fo lele'a-loloso hataholi nanahukuk-kala!

¹³ Bei ela manefetoana-la, ala mai leo mauli-malangan-na mai, ala mai de laheheleaon, fo latee-lata'ti ba'eneu Manetualain.

¹⁴ Ala la'ok leme Efraim leo bafak-ka leu, ala tunga Benyamin solda'dun, fo ala la'ok lakadadalak nai sila matan-na. Basa malanga solda'du matuaina-la, ala mai leme Makhir mai, ma basa malanga solda'du matuaina-la, ala fo'a leme Zebulon mai

¹⁵ Basa Isakhar lasi nggolon-nala, ala mai sama-sama loo Debora, hei, Isakhar mai, de Barak tunga boe; ala tungan, fo ala kona leo bafak-ka leu. Tehu leo Ruben-na, bei dodoo-tatai, nana sila ta dalek esa fa.

¹⁶ Tao le'e de, ala leo lai bi'ilopo-la tala'da? Ade, soaneu lamanene manafoo-a, naloo bana-manun do? Memak leo Ruben-na bei dodoo-tatai, nana sila ta dalek esa fa.

^17-18 Zebulon ma Naftali bei latee-lata'ti leni mamate-momopon nai natee-natatik dale, te leo Dan-na, nangatuuk nau-nau nai ofak lain, ma leo Gad-ta, nahele nai Yarden boboan dulu, boema leo Asyer-ra, denge-denge, ma ana ta nau heok neme sila mamanan-na, nai ndolo-ndolo tasi su'un-na mai fa.

¹⁹ Mane-manek-kala, latee-lata'ti nai Taanakh, fo deka no lee manai Megido, mane-mane Kanaan-nala, puselaipana, tehu ala ta leni lilofulak, da'di leo bua kakalok fa.

²⁰ Nduuk-kala boeo, ala puselaipana tunga la'ban Sisera neme sila enon-na nai lalai.

²¹ Lee Kison-na, lua ponu-ponu, de nabolo musu nok-ka. Tutulumatak, tutulumatak leon no napalanik, hai au samaneng-ngonei!

²² Ndala-la lalaik, de ei ndu'un-nala, lakandu'u, nana manasa'en-nala fotis.

²³ Manetualain ata nusa so'dan-na nafa'da nae, “Soo-supak ba'eneu Meros, ma laun-nala, nana, ala ta mai, fo ala fe tutulu-fafalik da'di leo palani ta'ti batu, fo ana puselaipana soaneu Manetualain fa.”

²⁴ Maua-manalek neu Yael, fo Heber, hataholi Keni ndia, saoinan-na; neme basa lalaa temak-ka isin-na mai, ndia nde nanaba'e-palak nanseli.

²⁵ Sisera noke oe, tehu ana fen kapoe, ana sadia fen kapaoe, nai manek-kala mango nininun-na.

²⁶ Yael fepa Sisera nenik ai kalapu'ak, ma susik, losa langan-na lutu-lutu.

²⁷ Ana bala neu, de ketu hahaen-na lee-lee nai dae lain, de natongo no mamaten-na.

²⁸ Sisera inan mete neme jendela mai, de nafa'da nae, “Tao le'e de, kaletan-na ta losa boen, tao le'e de, ta tamanene ndalan-na, ei ndu'un-na fa?”

²⁹ Fo manatee-tenok manai atan-nala dalek-ka, ana fe natataak, fo ana hapun nai dale mesan-na dalek, nae:

³⁰ “Ala bei baba'e bua-lo'a kakalok-kala, soaneu solda'du esan-na, ana hapu anafe'oana matatema esa do dua. Sisera, hapu tema ba'du mabeliina, ina manek-ka, hapu salendang nanaseu dula mata-matak.”

³¹ Ou Manetualain, sa'di leo been-na, mate O musum-mala, sama leo Sisera, tehu basa O tia-laim-mala nanakoa-nanakiok, sama leo le'do-a nai lalai! Basa ndia boema, nusak ndia tetu-temak, teuk haahulu dalen-na.