HAKIM-HAKIM 4 - Susula Malalaok Hehelu Palak Ma Hehelu Beuk

Debora ma Barak

¹ Mate basa Ehud boema, hataholi Israel-la lasala-lasingo seluk neu Manetualain.

² Boema Manetualain po'ilotak Yabin, fo mane Kanaan-na, nangatuuk nai kota Hazor-ra, ana sengis. Malanga solda'du matuainan-na nde Sisera, ana leo nai Haroset-Hagoyim.

³ Yabin nanuu kaleta musu besi natun sio. Ana paleta hataholi Israel-la no balakaik, teuk duahulu dalen-na. Basa boema, laloo bou-bou loke tutulu-fafalik neu Manetualain.

⁴ Nai lelek ndia, manamauli-malanga Israel-la nde been-na, nabi inak esa, na'de Debora, fo Lapidot saon-na.

⁵ Biasan-na, Debora nangatuuk nai ai kurma huun-na, nai Rama ma Betel tala'da, nai letelepak Efraim-ma. Ma nai ndia nde, hataholi Israel-la mai loken, nanoli-nafa'dak.

⁶ Faik esa boema, nadenu hataholi neu naloo Barak, fo Abinoam neme kota Kedes-sa, nai nusa letelepak Naftali-a, anan-na. Boema nafa'da Barak nae, “Israel Manetualain-na paleta neun, ‘Maloo makabubua touk lifun sanahulu leme leo Naftali ma leo Zebulon-na mai, fo moos leo Letek Tabor-ra neu.

⁷ Mahani te, neukose au tao-a Sisera, fo Yabin malanga solda'du matuainan-na, ana mai no solda'dun-nala, ma kaleta musun-nala, fo latee-lata'ti loo emi. Tehu, neukose Au fe emi sengi nai natee-natatik ndia dalek.’ ”

⁸ Boema, Barak nafa'da Debora nae, “Metema, o tunga soona, au nau u. Tehu, metema ta soona, au boeo, ta nau u fa.”

⁹ Boema, Debora nataa nae, “Hei, neukose au tunga! Tehu mafandendelek, mahani te o ta nde manahapu ha'da-holomata fa. Neukose Manetualain sengi Sisera, tunga ka'da inak esa.” Boema Debora no Barak sama-sama leu leo Kedes leu.

¹⁰ De Barak fo'a la'iesak leo Zebulon ma leo Naftali leo Kedes leu. Lelek ndia, hataholi manatunga Barak ma Debora, hataholi lifun sanahulu.

¹¹ Nai lelek ndia, Heber, fo hataholi Keni esa, ta nakabubua no leoinan-na fa. (Leoina Keni nde been-na, Hobab, fo Musa kelan-na, tititi-nonosin.) Heber neu pasak basa lalaa teman-nala deka no ai terpentin manai Zaanaim-ma so, ta dook-ka neme Kedes mai fa.

¹² Lelek Sisera namanene, lae Barak neu leo Letek Tabor-ra neu so,

¹³ boema no lai-laik, ana tao nakabubua kaleta musu besi natu ka sion sila-la, loo solda'dun-nala lala'en-na, de nos leme Haroset-Hagoyim leo Lee Kison-na leu.

¹⁴ Boema, Debora nafa'da Barak nae, “Ayo, tutulumatak leona! Te Manetualain nde nauli-nalanga o. Faik ia, Ana fe o sengi Sisera.” Boema Barak sama-sama no hataholi lifu ka sanahulu duan-nala, kona leme Letek Tabor-ra lain mai;

¹⁵ basa boema, ala sapu-la Sisera. Boema, Manetualain tao tapasasala Sisera solda'dun-nala, ma kaleta musun-nala, nalosa Sisera kona neme kaletan lain mai, de nalai no ana la'o eik.

¹⁶ Barak usi kaleta musu, ma solda'du sila-la, losa Haroset-Hagoyim, boema ana taonisa la'iesak Sisera solda'dun-nala; ana ta po'ilotak hataholi esa boen, naso'da fa.

¹⁷ Ndia te, Sisera nalai leo Yael, fo Heber hataholi Keni ndia saoinan-na, lalaa teman dale neu. Nana, Mane Yabin fo neme Habor mai, tao tia-laik no teidalek Heber sila.

¹⁸ Lelek Sisera mai boema, Yabin sipok-kana, ma nae, “Mai Tuan, masok leo au lalaa temang dale mai; boso bii.” Boema Sisera masok leo lalaa temak ndia dalek neu, de Yael poti ketun nenik tema jendela, fo ela ana ke'ke neme ndia.

¹⁹ Sisera nafa'da Yael nae, “Sue-na, fe au oe faa, fo au inu; te au maang-nga ma'dak-ka.” Boema Yael se'i alukosu banalouk, fo mamana kapaoen-na, de ana fe Sisera ninu; basa boema, ana poti ketu seluk-kana nenik tema jendela.

²⁰ Boema, Sisera nafa'da Yael nae, “Muu fo mapadeik muu lalaa temak-ka, lelesun-na, matan-na. Metema hataholi mai, fo natane o, ade hapu hataholi nai ia do ta, soona mae ta.”

²¹ Sisera sota nanseli, de ana teekauk, boema ana sungu namanee. Boema Yael ho'i-na ai kalapu'ak esa, ma lalaa temak-ka susin esa, de no denge-dengek, neu deka no Sisera. Basa boema, ana paku susik ndia neu Sisera matabu'un-na, losa ana tola dae-a. Yael taonisa Sisera, enon-na leondiak.

²² Lelek Barak mai sanga Sisera boema, Yael soluk-na Barak de nafa'dan nae, “Mai, fo au sanga atu'du o, o sanga hataholi-a.” Barak masok sama-sama no Yael leo dalek leu, boema nita Sisera maten so, de lee-lee nai dae lain, te lalaa temak-ka susin-na, bei nanapauk nai matabu'un-na.

²³ Faik ndia, Manetualain fe hataholi Israel-la sengi Yabin, fo mane Kanaan-na.

²⁴ Hataholi Israel-la boetai ne'e manek ndia, losa mate'en-na, mopon-maten.