HAKIM-HAKIM 3 - Susula Malalaok Hehelu Palak Ma Hehelu Beuk

Leoina manaleo lahele nai nusa Kanaan-na

¹ Soaneu fola hataholi Israel fo beita latee-latati lita nai Kanaan fa, de Manetualain po'ilotak leoina de'ubee, leo lahele leme nusak ndia.

² Manetualain tao dede'ak ndia, no ka'da dudu'ak, soaneu nanoli basa bobongi Israel-la, natee-natatik-ka, tehu ka'da soaneu sila fo beita tunga lita, natee-natatik-ka fa.

³ Leoina fo bei leo lahele nai nusak ndia: nde leoina fo manaleo nai Filistin kotan lima dalek-ka, basa leoina Kanaan-nala, leoina Sidon-na, ma leoina Hewi, fo manaleo nai letelepak Libanon-na, mulai neme Letek Baal-Hermon-na losa leo enok manaleo Hamat neu.

⁴ Sila lai naa, soaneu da'di batu sak, ba'eneu leoina Israel-la. No enok ndia, besak-ka hapu bubuluk, ade leoina Israel-la tunga paleta, fo Manetualain fen tunga Musa, soaneu sila bei-ba'i kain-nala do ta.

⁵ Hu ndia de, hataholi Kanaan, Het, Amori, Feris, Hewi ma Yebus-sala, ala leo lahele, sama-sama loo hataholi Israel-la, nai nusak ndia.

⁶ Hataholi Israel-la, saoana sese'do-babalik loo leoina sila-la, ma ala tunga sene-do'ok hataholi sila lamatua daebafan-nala.

Otniel

⁷ Hataholi Israel-la, lasala-lasingo neu Manetualain, fo sila Manetualain-na. Lafandele henin, nalosa ala hule-haladoi neu sosongo-tatangok Baal ma Asyera.

⁸ Boema, Manetualain namanasa hataholi Israel-la, de Ana po'ilotak Manek Kusyan-Risyataim neme Mesopotamia, ana sengis. Manek ndia koasas teuk 8 dalen-na.

⁹ Basa boema, hataholi Israel-la laloo bou-bou, loke tutulu-fafalik neu Manetualain, boema Manetualain fe Otniel neu soi-po'is. (Otniel nde bee-na, Kenas fa'din Kaleb, anan-na.)

¹⁰ Manetualain Duladalen-na koasa Otniel, nalosa ana da'di hataholi Israel-la, mauli-malangan. Neu natee-nata'ti boema, Manetualain, fen ana sengi mane Mesopotamia.

¹¹ Boema, nusak ndia nee-nee lino-linok, teuk haahulu dalen-na. Basa boema, mate Otniel.

Ehud

¹² Hataholi Israel-la, lasala-lasingo seluk neu Manetualain, nalosa Manetualain tao-na Eglon, fo mane Moab-pa, balakain-na lena heni Israel.

¹³ Mane Eglon-na nakabubua no leoina Amon ma leoina Amalek-ka, de ala sengi hataholi Israel-la, basa boema, langatuu-la Yerikho, fo kota kurma ndia.

¹⁴ Mane Eglon-na, paleta hataholi Israel-la, teuk sanahulu falu dalen-na.

¹⁵ Tehu lelek hataholi Israel-la laloo bou-bou, loke tutulu-fafalik neu Manetualain, boema Ana fe Ehud neu, fo ana soi po'is. Ehud hataholi kiiko'dek; Gera anan ndia, fo neme leo Benyamin-na mai, ma ndia nde biasa neni bea fo, muse hataholi Israel-la bae leo mane Eglon-na neu.

¹⁶ Faik esa boema, Ehud tao-na tafaina esa, tane ka duak, nalun-na, hihii nae metel seselik esa. Ana so'dok tafaina ndia neu boboa konan-na, fo nai ba'dun dale,

¹⁷ boema neni hataholi Israel-la bean-na leo Mane Eglon-na neu. Manek ndia, aon-na seli.

¹⁸ Lelek Ehud fe basa bea ndia boema, nadenu hataholi manandolo lilopilas sila-la, fali le'us.

^19-20 Tehu Ehud mesak-kana nate'e, nai lelek ana losa batu nanadoki-dulak-kala deka no Gilgal, boema ana fali ne'un leo Eglon neu. Nai lelek ndia, Eglon nai uma manen-na kaman dale, nai ta'dak lain. Boema Ehud nafa'da Eglon nae, “Ama Manek Fo Mandela-masa'ak! Atam-ma neni hala nafufunik, soaneu au Ama Maneng-nga.” Boema manek-ka nae, “Mahani dei,” boema ana paleta basa atan-nala, fo ala kalua la'oela ndia no Ehud mesak-kasa. Basa boema, Ehud neu deka no manek-ka, fo ndia te, bei nangatuuk, boema nae, “Hapu halak neme Manetualain mai, soaneu au Ama Maneng-nga!” Manek-ka namanene dede'ak ndia boema, ana fo'a napadeik.

^21-22 Tutik-ka Ehud fe'a-na tafainan-na nenik lima kiin-na neme boboa konan-na mai, de ana paun neu manek-ka tein-na, de ana tola deman-na seli. Basa tafaina ndia no ain-na, tola nakandoo leo manek ndia tein-na minan dale neu, losa sapiselik-kana leo dean-na neu. Ehud po'ilotak tafaina ndia nahele neme ndia,

²³ boema ana kalua, de ana kena kama ndia lelesun-na, de ana nggoenisan,

²⁴ basa boema, ana la'o. Lelek manek-ka atan-nala mai, de lita kama ndia lelesun-na nananggoek boema, laedaenga manek-ka bei nai dalek, de ana bei leo kama dea neu.

²⁵ Lelek lahani doon-na seli, te manek-ka ta soi lelesu boen, boema lapangamak, de leu ho'i nggoek, de ala soi lelesu ndia. Te se'kona sila manen-na maten lee-lee nai samen lain so.

²⁶ Lelek ala bei lahani talu-talu, te Ehud nalai leo Seira, tunga batu nanadoki-dulak-kala neu so.

²⁷ Lelek ana losa nusa letelepak Efraim-ma, boema no lai-laik, ana puu pupuuk-ka, fo naloo hataholi Israel-la leu latee-lata'ti. Ala mai boema, nauli-nalangas, de ala kona leme letelepak ndia mai.

²⁸ Boema, nafa'das nae, “Tunga au,” te Manetualain sengi hataholi Moab fo emi musu nom ndia, soaneu emi so. Boema no Ehud nauli-nalangan, de hataholi Israel sila kona leme letelepak lain mai. Latona-la, hataholi Moab-pala mamana lelenan-na, nai Lee Yarden-na. Ala ta po'ilotak musu sila-la esa boen, lena leo selik, no so'dak fa.

²⁹ Nai natee-natatik ndia dalek, ala taolisa solda'du Moab neulauk, fafa'kama lifun sanahulu; esa ta naladeak boen.

³⁰ Faik ndia, Moab kala neme hataholi Israel-la mai, boema nusak ndia nee-nee lino-linok, teuk faluhulu dalen-na.

Samgar

³¹ Mauli-malangan sila-la nde Samgar fo Anat anan-na. Ndia boeo, natee-nata'ti, de ana soi-po'i hataholi Israel-la. Ana taonisa hataholi Filistin natun nee, nenik aitete'e foo sapin-na.