HAKIM-HAKIM 21 - Susula Malalaok Hehelu Palak Ma Hehelu Beuk

Anafe'oanak-kala nanasadiak fo da'di hataholi Benyamin-nala saoinan

¹ Nai lelek hataholi Israel-la lakabubua lai Mizpa boema, laheluk basa neu Manetualain lae ta hapu sila hataholin esa boen, ana nau anafe'on-na da'di Benyamin hataholin-nala saoinan fa.

² Besak ia, leu leo Betel leu, de langatuuk losa le'odae no dale he'dik, nai Manetualain matan. Ala kii ma laloo bebou lae,

³ “Ou Manetualain, fo Israel Manetualain, tao le'e de, basa ia-la muse da'di? Leo Benyamin-na nde been-na, ami leoinam-ma, leon esa nde ndia, tehu hihii nae mopon so!”

⁴ Balahaa fafaik, fo bei fafaianak nanseli boema, hataholi Israel-la, lapadedeik-la mei tunu-hotuk esa neu mamanak ndia, boema ala tunu-hotu fe Manetualain tutunu-hohotu nanatunuk ma tutunu-hohotu mole-dame.

⁵ Basa boema, ala palisak lutu-lutuk, nai leo-leo manai leoina Israel-la dalek, fafa'kama makahulun-na, hapu nggelok, ta leu lakabubua fo lataa Manetualain nai Mizpa fa. (Nai lelek ndia, ala soo-supa basa lae, matema see ta tao natetu hala nalolook leo Mizpa neu fa soona, muse hukunisan.)

⁶ Hataholi Israel-la dalen-nala tu'da kasian neu sila tolano-tolanoon leo Benyamin-nala; lafa'da lae, “Faik ia, Israel namopo leon esa so.

⁷ Ita muse tao beek, fo ela bei ela Benyamin hataholin ia-la, bisa hapu saoinak, nanahu ita soo-supa basa neu Manetualain tae neukose ita ta nau ita anafe'onan-nala da'di Benyamin hataholin-nala, saoinan fa.?”

⁸ Boema, ala palisak lutu-lutuk, fafa'kama leoina Israel-la leon esa, ta leu lakabubua lai Mizpa fa. De ala hapu, neme hataholi Yabesh manai Gilead-tala, ta hapu hataholi esa boen, neu leo Mizpa neu fa.

⁹ Nanahu, lelek ala palisak susula na'dek-kala, ala ta hapu Yabesh hataholin-nala esa boen, na'den-na nai dalek fa.

¹⁰ Hu ndia de, hataholi fo lakabubua leme Betel ndia, ala haitua sila hataholi palani ta'ti batun 12.000 fo leu taolisa la'iesak hataholi Yabesh-sala, nai dalek, hapu inak ma ni'iana-la boe.

¹¹ Ala paletas, fo taolisa la'iesak touk-kala ma inak fo ta matatema so'on.

¹² Boema, nai hataholi manaleo lai Yabesh sila-la dalek, hapu anafe'oana matatema 400. Loo anafe'oanak sila-la leo mamana ofu manai Silo, nai nusa Kanaan-na.

¹³ Basa boema, basa hataholi Israel-la lala'en-na, ladenu hataholi neu leo Benyamin hataholin-nala, lai lete batu-la nai Rimon, fo loke dame.

¹⁴ Hu ndia de, Benyamin hataholin sila-la fali ma'is, boema hataholi Israel-la fes anafe'oana Yabesh, fo bei maso'dak sila-la. Tehu anafe'oanak sila dede'un-na, ta dai Benyamin hataholin sila-la fa.

¹⁵ Hataholi Israel-la dalen-nala tu'da kasian neu Benyamin hataholin-nala, nanahu Manetualain tao-na leoina Israel-la, leon-nala natandala so.

^16-18 Hu ndia de, lasi-lasik fo lakabubua nai Betel ndia, lafa'da lae, “Ta hapu inak nai leo Benyamin-na dalek so'on. Tehu, sanga tae leo bee; ita ta bisa fe ita anafe'on-nala loak, fo sao fas, nanahu ita soo-supa fe basa ita hataholin fo ana fe anafe'on-na loak sao Benyamin hataholin esa! Da'di, ade ita muse tao leo beek, soaneu bei ela hataholi ia-la, fo ela sila boeo, bisa hapu saoinak? Boso nalosak, Israel namopo leo esa neme leo ka sanahuluduan-nala mai. Ita muse sanga enok, fo ela leo Benyamin-na hapu tititi-nonosik nakandoo, ma nanuu nahele daen-na lala'en-na.”

¹⁹ Lafa'da lae, “Leo iak! Hapu eno kaluak esa, fo nde nai lelek fai malole teuk-ka, soaneu Manetualain nai Silo,” (Kota Betel-la, nai Silo ia boboan kona, ma Betel okofoon manaleo Sikhem neu, nai boboan muli, boema kota Lebona, nai boboan kii.)

²⁰ Boema lasi-lasik manai natotongok nai Betel sila-la, lafa'da bei ela Benyamin hataholin sila-la lae, “Meu ke'ke nai osi angol manai Silo-la dalek,

²¹ ma manea mahele meme ndia. Mahani te, metema anafe'oana Silo-la, ala kalua mai longe nai fai malole teuk-ka, soaneu Manetualain soona, emi muse kalua meme osi angol sila-la dalek mai. Soona emi esa-esak, ho'u-ma anafe'oanak sila esa, fo malai moon leo Benyamin nusan-na neu, fo taon da'di emi saoinam.

²² Metema, aman do tolanoo toun-na mai, fo nakasetin soona, emi bisa mafa'da mae, ‘Ami dokodoe, nemen-na fo loo ami. Ami ta matona malas nai natee-natatik dale fa. Ma hu kande, emi ta fes leo ami mai fa, de emi ta la'olena hehelu-balataak ndia fa, da'di salak ta.’ ”

²³ Boema Benyamin hataholin sila-la, tao tunga hala nafa'dak ndia. Sila esan-na nalai neni anafe'oanak esa, neme anafe'oanak manalonge nai Silo. Basa boema, ala fali le'us leo sila nusan-na leu, de lafofo'a falik kotan-nala, boema ala leo lahele leme ndia.

²⁴ Hataholi Israel fe'ek sila-la boeo, ala la'o leona. Ala fali le'us leo sila dae pusakan manai sila esa-esak nusan dale, tunga leo-ingu ma leon-nala.

²⁵ Nai tepo-lelek ndia, manek beita nai Israel. De hataholi-a esa-esak, tao su'di beek fo nafa'da nae la'en.