HAKIM-HAKIM 20 - Susula Malalaok Hehelu Palak Ma Hehelu Beuk

Hataholi Israel-la lai musu dale

¹ Boema hataholi Israel-la lala'en-na, ala mai leme Dan nai kii, losa Bersyeba nai kona, ma Gilead nai dulu, fo tao latetu hala nalolook ndia. Lakabubua, ma dalek esa lai Mizpa, nai Manetualain matan.

² Basa-basan lala'en-na, solda'du 400.000 leme solda'du manala'o eik-kala mai. Leoina Israel-la, mane leon-nala, lai naa boe.

^3-4 Ndia te, leo Benyamin-na, hataholin-nala lamanene basa, lae basa hataholi Israel fe'e-fe'ek-kala lakabubua basa lai Mizpa so. Boema hataholi Israel sila-la, latane hataholi Lewi, fo taolisa sao makahatun-na ndia lae, “So'ba tui su'dik ami, tao leo bee de, tatao-nono'i mangalauk ndia, ana da'di!” Hataholi Lewi ndia nataa nae, “Au o au sao makahatung ndia tuli neme Gibea, fo nai Benyamin nusan-na, de ami sungu meme naa.

⁵ Basa boema, hataholi Gibea-la mai sanga au, nai fai le'odaek. Ala sapu-la uma fo au sungu nai dalek-ka, nana ala dudu'a taolisa au, tehu basa boema, le'odaek ndia, ala tao tatao-nono'i mangalauk loo au sao makahatung ndia, losa maten.

⁶ Au ko'o-a popolan-na, boema au kee-keen, de basa boema, au haituan neu leo ka sanahuluduak manai ita leoinan-na dalek, esan-na biak esa. Au tao dede'ak ndia, nanahu hataholi Gilead sila-la, ala tao basa tatao-nono'i mangalauk, ma neni mamaek nai hataholi Israel-la dalek so.

⁷ Emi basa-basam manai ia-la nde been-na, hataholi Israel. Da'di, besak ia, au oke emi basa-basam-mala, tatai-dodoom!”

⁸ Hataholi makabubuak manai sila-la, ala fo'a lapadeik sama-sama ma lae, “Ita basa-basa-tala, esa boen, ta bole fali ne'un leo ofun do uman-na neu fa.

⁹ Ata taok-ka nde ia: Ata tu'u batu, fo taketu, hataholi fo muse leu sapu-la Gibea.

¹⁰ Touk Israel baba'ek 10 soona, baba'ek esa, muse sadia nana'a-nininuk soaneu hataholi fo leu latee-lata'ti. Fe'ek-kala, leu sapu-la Gibea fo hukus, nanahu ala tao basa tatao-nono'i mangalauk, nai hataholi Israel-la dalek so.”

¹¹ Hataholi Israel-la dalek esa soaneu leu sapu-la Gibea, enon-na leondiak.

¹² Hataholi Israel-la, ladenu basa hataholi-la leu leo basa leo Benyamin-na lala'en-na leu, fo landuku-lalosak halak-ka nde ia nae, “Tatao-nono'i mangalauk beek-ka, ana da'di la'e emi so?

¹³ Fe hataholi mangalauk maneme Gilead sila-la, leo ami mai, fo ela ami taomisas, fo no enok ndia, ami tao mamopo tatao-nono'i mangalauk ndia, neme Israel tala'da heon mai.” Tehu hataholi Benyamin-nala, ta taoafik neu hataholi Israel fe'ek sila-la, hala-kokolan ndia fa.

¹⁴ Nakalenak, hataholi Benyamin-nala, leme basa kota manai nusa Benyamin ndia, ala mai leo Gilead mai, fo lata'ti loo hataholi Israel fe'ek-kala.

^15-16 Faik ndia, lakabubua-la solda'du maneme sila kotan-nala mai, dede'un-na, solda'du 26.000. Ma fe'ek neme ndia mai boe, laun Gilead-ta mesak-kana, nakabubuan-na, hataholi nanahehelek natun hitu. Basa-basas hataholi kikodek, fo malelaina nai tapa batu nenik pipiluk. Metema, ala pilu soona, beita sala nita la'iesa boen.

¹⁷ Neme hataholi Israel fe'ek-kala, lakabubua-la solda'du nanoli basak, 400.000.

Natee-nata'tik la'ban hataholi Benyamin-nala

¹⁸ Hataholi Israel-la solda'dun sila-la, leu leo mamana makaluku-makatele manai Betel-la, de latane Manetualain lae, “Ou Manetualain, leo beek-ka nai ami dalek, nde muse makasososa, neu sapu-na hataholi Benyamin-nala?” Manetualain nataa nae, “Leo Yehuda.”

¹⁹ Balahaa fafaik boema, ala la'o, de ala ofu deka loo kota Gibea.

²⁰ Ala fe sila solda'du matee-mata'tin-nala, lasasalematak loo kota ndia, boema leu sapu leona.

²¹ Boema, Benyamin solda'dun-nala, ala kalua, mai sapu boe, de taolisa solda'du Israel 22.000 nai faik ndia boe.

^22-23 Hu kande kakalak ndia, de hataholi Israel-la leu leo mamana makaluku-makatele leu, de ala kii losa le'odae neu Manetualain nai naa. Latane lae, “Manetualain, ami muse meu mata'ti seluk moo ami tolano-tolanoom fo hataholi Benyamin sila-la do?” Manetualain, nataa nae, “Hei, meu leona.” Hu ndia de, solda'du Israel-la lapalani seluk, nalosa ala ito-ato falik sila solda'dun-nala, sama leo fai makasososan-na.

²⁴ Soaneu ka la'i dua-na, leu sapu-la Benyamin solda'dun sila-la.

²⁵ Ma soaneu ka la'i dua-na boe, Benyamin hataholin sila-la, ala kalua fo ala sapu. Oek ia, ala taolisa Israel solda'dun nanananoli basak 18.000.

²⁶ Boema, hataholi Israel-la leu seluk leo Betel leu, de ala kii neu Manetualain. Ala okaaon-nala losa le'odae nai naa, ma ala tunu-hotu tutunu-hohotu mole-dame, ma tutunu-hohotu nanatunuk soaneu Manetualain.

^27-28 Nai tepo-lelek ndia, Manetualain Peti Hehelu-Balataan nai Betel, ma Eleazar anan Pinehas, fo Harun upun-na, nalalau-naoono da'di leo imam. Boema hataholi Israel-la latane Manetualain lae, “Manetualain ami nde muse meu sapu-ma seluk, ami tolano-tolanoom fo Benyamin hataholin sila-la, do ami muse hahae natee-natatik ia do?” Manetualain nataa nae, “Sapu-malas leona! Balahaa te, neukose Au fe emi sengi.”

²⁹ Hataholi Israel-la, lamanene Manetualain natataan ndia boema, ala pe'da sila solda'dun-nala neu mamana nafunik-kala nai Gibea boboa-kaisun.

³⁰ Boema neu fai ka telun-na, ala sapu-la Benyamin solda'dun-nala, nenik ala fe sila solda'dun-nala lasale leo Gibea leu, sama leo ala taon nai fai-fai maneuk-ka.

³¹ Benyamin hataholin-nala, mai sapu boe, de ala fu'dik-kasa, fo ala kalua leme kota mai. Sama leo fai-fai maneuk-kala, de ala mulai taolisa hataholi Israel manai mamana loak-kala, nai kota deak, nai enok manaleo Betel neu, ma nai enok manaleo Gibea neu. Ala taolisa hataholi Israel 30.

³² Hu ndia de, Benyamin hataholin-nala, laedaenga sila sengi seluk hataholi Israel sila-la, sama leo makasososan-na. Tehu solda'du Israel-la tutu'u basa, soaneu lakadedeak, fo ela ala hela Benyamin solda'dun sila-la leo okofoo-la lain leu, fo dook-ka neme kota mai.

³³ Lelek Israel solda'dun-nala lakadedeak, ma ala ito-ato seluk sila solda'dun-nala nai Baal-Tamar, boema sila hataholin fo ala pe'das nai Gibea boboa-kaisun-na, no lai-laik, ala kalua leme sila mamana nafunin-nala nai kota deak.

³⁴ Hataholi sila-la, hataholi nanahelek neme Israel-lala'en-na mai; dede'un-nala, hataholi lifun sanahulu. Natee-nata'ti matuaina ana da'di, nai lelek hataholi lifun ka 10-k sila-la, ala sapu-la Gibea. Benyamin hataholin-nala ta bubuluk te'e-te'e, lae ta dook-ka so'on te, ala kala fa.

³⁵ Manetualain fe hataholi Israel-la sengi Benyamin hataholin-nala, nalosa nai faik ndia, hataholi Israel-la, taolisa Benyamin solda'dun 25.100.

³⁶ Besak-ka Benyamin hataholin-nala lame'da, lae sila kala so. Israel solda'dun manai uluk-kala, lalai keke'dik leme Benyamin hataholin-nala mai, nanahu lamahele sila solda'dun manake'ke nai mamana nafunik-kala, nai Gibea boboa-kaisun.

Keke'dik-ka nde tao-na hataholi Israel-la sengi

³⁷ Hataholi manake'kek sila-la, no lai-laik, ala masok, de ala sapu-la Gibea; lakapepela su'di leo bee leu, nai kota ndia dalek, de ala taolisa la'iesak hataholi manai sila-la.

³⁸ Tehu nakahuluk, lalahalak basa, lae metema hapu ha'imasuk makateina, masu-masu leo lain neu, neme kota tala'daheon mai soona,

³⁹ solda'du manai uluk fo lakadedeak-ka, muse fali ma'is, fo sapu-la musu-a. Nai hatematak ndia, Benyamin hataholin-nala, taolisa solda'du Israel 30, de laedaenga sila sengi seluk hataholi Israel-la, sama leo makasososan-na.

⁴⁰ Tehu no kaiboik, ha'imasuk-ka, mulai masu-masu leo lain neu, neme kota Gibea tala'daheon mai. Benyamin hataholin-nala nggenge, nai lelek ala lipa leo dea leu te lita, ha'i na'a heni la'iesak sila kotan-na so.

⁴¹ Ma nai hatematak ndia, Israel solda'dun manai uluk-kala, sapu-la falik-kasa, nalosa Benyamin solda'dun sila-la nggenge no bibiik, nanahu lame'da, lae tao leo bee-o, neukose sila kala.

⁴² Da'di, lalai leme hataholi Israel-la mai, de leu leo moo solokaek-ka leu, tehu ala ta hapu laladeak fa. Lakahapi-lalas nai Israel solda'dun manai uluk-kala, ma solda'du fo nai hatematak ndia, ala mai leme kota dalek lala'en-na, tala'da. Benyamin hataholin-nala kala matuaina nanseli.

⁴³ Hataholi Israel-la lakahapi-lalas, de ala usi laheles losa mamanak esa nai Gibea boboan dulu. Ala usi-usi, ma ala taolisa

⁴⁴ Benyamin solda'dun nanananoli basak, 18.000.

⁴⁵ Benyamin solda'du fe'en-nala lepos fali, de lalai tunga moo solokaek manaleo lete batu-la, nai Rimon. Ala taolisa sila hataholin 5.000 nai eno tala'dak. Ala usi fe'ek-kala losa Gideom. Ala taolisa hataholi 2.000, neme hataholi sila-la mai.

⁴⁶ Da'di, nai faik ndia dalen-na, ala taolisa Benyamin solda'dun 25.000 basa-basas solda'du ao makadelek, ma palani mesa-mesan.

⁴⁷ Tehu, neme sila manamalaik tunga moo solokaek-ka leo lete batu-la nai Rimon, hapu hataholi 600, laladeak. Ala leo leme Rimon, bulak 4 dalen-na.

⁴⁸ Basa boema, hataholi Israel-la fali seluk, de ala sapu-lalas, boema ala taolisa la'iesak Benyamin hataholin fo bei elak-kala – touk, inak, ni'iana ma bana-manu boe. Ala hotu heni basa kota manai nusak ndia lala'en-na.