HAKIM-HAKIM 2 - Susula Malalaok Hehelu Palak Ma Hehelu Beuk

Manetualain ata nusa so'dan-na nai Bokhim

¹ Manetualain ata nusa so'dan-na, neu leo Bokhim neu, de nafa'da hataholi Israel-la nae, “Au kalua basa emi neme Masir mai so, de Au o emi leo nusak fo Au helu basan neu emi bei-ba'i kaim-mala so. Au boeo afa'da ae, ‘Hehelu-balataak, fo manapa'a Au o emi-a, neukose Au ta tao ketu fan.

² Hu ndia de, emi ta bole tao hehelu-balataak esa boen, moo nusak ia laun-nala fa. Emi muse tao matu'u mei tunu-hotun-nala.’ Tehu, emi ta tao hata fo Au paleta basan ndia fa. Nakalenak emi tao hata, fo Au ta paletan neu emi fa!

³ Da'di, besak ia mamanene! Te metema, emi matee-mata'ti moos soona, neukose, Au ta usi heni nusak ia hataholin-nala fa. Neukose, ala da'di emi musum-mala, ma neukose lakahihi'ik-la emi, nalosa emi tunga sene-do'ok neu sila-lamatua daebafan-nala.”

⁴ Lelek ata nusa so'dak ndia, nanduku-nalosak basa halak ndia boema, basa leoina Israel-la lala'en-na, dola-dola mesan.

⁵ Hu ndia de, mamanak ndia, nanafoik na'de Bokhim. Boema, hataholi Israel-la tunu-hotu tutunu-hohotuk fe Manetualain nai mamanak ndia.

Yosua mamaten-na

⁶ Lelek Yosua po'i hataholi Israel-la la'o, boema sila boeo la'o fo leu langatuu-la, dae fo ana da'di sila esa-esak baba'en.

⁷ Lelek Yosua bei naso'da, hataholi Israel-la lakaluku-lakatele neu Manetualain. Lelek nate Yosua boeo, lakaluku-lakatele lahele neu Manetualain nai lelek hataholi fo nita matan, manada'di beuk lala'en, fo Manetualain taon soaneu hataholi Israel-la, bei hela-noles.

⁸ Yosua fo Nun anan-na – fo Manetualain atan ndia – maten nai teun natun esa sanahulu.

⁹ Latoin nai ndia daen dale, nai Timnat-Serah, fo nai nusa letelepak Efraim-ma, nai Letek Gaas-sa, boboan kii.

¹⁰ Basa boema, mate bobongik ndia lala'en-na boe. De bobongik manatungak-ka, ta lalelak Manetualain fa, nanahu ala ta la'ola'di hata fo Manetualain, tao basan soaneu leoina Israel-la fa.

Israel ta sene-do'ok neu Manetualain so'on

^11-14 Basa boema, hataholi Israel-la, lasala-lasingo neu Manetualain. Ala ta sene-do'ok seluk neu Manetualain, fo sila bei-ba'i kain-nala Manetualain-na, fo nde Manetualain, fo nos kalua leme Masir mai-a. Ala mulai sene-do'ok neu Baal-la, ma Asytoret boema lamatua daebafak fe'ek fo leoina manai sila titia-tatain-nala, sene-do'ok-ka. Boema, Manetualain namanasas, de Ana po'ilotak hataholi mangalauk-kala sapu-lalas, de lamanako leni hata-heton-nala. Ta lapalani lasasalematak loo musu-musu manai titia-tatain-nala fa.

¹⁵ Metema, leu latee-lata'ti soona, Manetualain la'ban-nasa, sama leo Ana fe basa nasanene'dak neus so. Boema ala la'ola'di toto'a-tataak matuaina.

¹⁶ Manetualain fes mauli-malangan do'e-do'e, fo ala sanga enok soaneu soi-po'is leme hataholi mangalauk, ma hataholi nakodaa-la mai.

¹⁷ Tehu, ala ta lafaduli mauli-malangan sila-la fa. Ala sene-do'ok neu lamatua fe'ek-kala, ma ala ta liineka neu Manetualain fa. Ala ta tunga bei-ba'i kain-nala ha'da-tataon, fo manatunga Manetualain paletan-nala fa.

¹⁸ Metema Manetualain fe leoina Israel-la mauli-malangan esa soona, Manetualain tulu-fali mauli-malangan ndia do'e-do'e. Ma nai lelek mauli-malangan ndia bei naso'da, Manetualain soi-po'is do'e-do'e leme musun-nala mai. Metema namanenes ala hoonggu'u, nanahu ala fepa-li'us, ma ala tuni-ndenis soona, dalen-na ta tu'da kasian neu fas.

¹⁹ Tehu metema, mate mauli-malangan sila soona, leoina sila ha'da-tataon, mangalauk lena seluk neme bobongi makahuluk-ka mai. Lakaluku-lakatele neu lamatua fe'ek-kala, ma ala sene-do'ok lamatua fe'ek sila-la. Ala fali leo sila ha'da-tatao mangalaun-nala neu, ma ala ta nau lasafali ha'da-tataon-nala fa.

²⁰ Hu ndia de, Manetualain namanasa nanseli hataholi Israel-la, de nafa'da nae, “Au paleta basa leoina ia bei-ba'i kain-nala, fo ela ala ho'u lahele hehelu-balataak, fo Au taon no sila. Tehu leoina ia, tao ketu hehelu-balataak ndia; ala la'olena Au paletang-ngala.

²¹ Besak ia, Au ta nau usi heni seluk, su'di leoina bee boen, fo bei nai nusak ia, nai lelek Yosua maten-nana.

²² Neukose, Au pake leoina sila, fo Au fola leoina Israel-la, fo ela Au bubuluk, ade hataholi Israel-la, ana nau tunga Au paletang-ngala, sama leo sila bei-ba'i kain-nala do ta.”

²³ Hu ndia de, Manetualain ta fe Yosua sengi leoina sila fa. Nasafalin-na, Manetualain po'ilotak-kasa leo nai nusak ndia, de Ana ta usi henis no lai-laik fa.