HAKIM-HAKIM 18 - Susula Malalaok Hehelu Palak Ma Hehelu Beuk

Mikha ma leo Dan-na

¹ Nai tepo-lelek ndia, Israel manen ta. Leo Dan-na, bei sasanga mamanak fo da'di sila mamanan mahelen, nana sila boeo beita hapu dae, sama-sama no leo-leo fe'ek manai leoina Israel-la dalek fa.

² Hu ndia de, ala hele-la hataholi ao makadelek 5, neme basa leo-ingu nai sila leon fo, manaleo nai Zora ma Esytaol-la dalek, boema ala fe hataholi ka limak sila bela-ba'uk, fo palisak lutu-lutuk nusak ndia. Boema hataholi sila-la la'o, de ala losa letelepak manai nusa Efraim-ma. Ala losa naa boema, ala sungu nai Mikha uman.

³ Lelek ala sanga masok lala uma ndia dalek boema, lamanene ta'eanak Lewi ndia kokolak, de lalelak halan-na. Da'di, lakandoo leo matan-na neu, de latanen lae, “Tao le'e de, o nai ia? O paluu beek? See nde noo o leo ia mai?”

⁴ Ta'eanak ndia nataa nae, “Au nai ia, nanahu Mikha. Ndia nde so'u au da'di ndia imam-ma, de ana fe au ngga'di.”

⁵ Boema, hataholi sila lafa'dan lae, “Metema leondiak soona, sue-na matane Manetualain, ade ami leleo-lala'om ia, neukose neni buna-boak do ta.”

⁶ Imam ndia nataa nae, “Boso bii, te Manetualain sipok emi leleo-lala'om ia so.”

⁷ Basa ndia boema, hataholi ka limak sila-la la'o, de leu leo Lais leu. Ala taoafik neu laun manai sila-la. Se'kona laun Lais sila-la, so'dan-nala sama leo leoina Sidon-nala so'dan-na. Leomae ala pasi fe'e, ma dook-ka leme leoina Sidon-na mai, te so'dan-nala nee-nee lino-linok, ma tetu-temak, ta lanuu musu, lamasu'i-lakabete, boema ala ta to'a-taa hata esa boen.

⁸ Lelek hataholi ka limak sila-la fali leo hataholi, fo sila leo esa nai Zora ma Esytaol, lokes, fo lafa'da sila hahapun-na.

^9-10 Boema lae, “Mai, fo teu sapu-ta Lais. Ami meu leo naa meu so, de ami mita, daen-na malole, maloa, ma maoe-maisik, basa hata lala'en-na nai naa. Boso mahele ka'da ia, fo ta tao hata esa boen. Teu lai-lai leo naa teu, fo tatona-ta, nusak ndia. Neukose emi bubuluk, laun-na ta bubuluk hataholi neu sapu-na sila fa. Ami mamahele, Manetualain fe basa nusak ndia neu emi so.”

¹¹ Hu ndia de, leo Dan-na hataholin 600 leme Zora ma Esytaol mai. Leni tafa-sisilo manadaik, de

¹² leu leo Kiryat-Yearim boboan muli, nai nusa Yehuda, boema ala ofu leme ndia. Hu ndia de, ala bei foi mamanak ndia, na'de Dan Ofun-na.

¹³ Ala la'ok lakandoo leme naa leo letelepak Efraim-ma leu, de ala losa Mikha uman.

¹⁴ Makahulun-na, ladenu mata-mata ka limak-kala, lafa'da nonoon-nala lae, “Emi bubuluk, mae nai uma ia-la esa dalek, hapu dodoki-dudulak nakadiditak doi fulak do ta? Boeo hapu dodoki-dudula fe'ek-kala, ma Tema Babaa Fanak. So'ba dodoo su'dik, ita muse tao beek.”

¹⁵ Boema leu leo Mikha uman, fo ta'eanak Lewi ndia mamana leleon-na, de latanen, so'dan-na leo beek.

¹⁶ Nai lelek ndia, leo Dan-na solda'dun natu ka 6-n, fo manaho'u tafa-sisilo manadaik sila-la, bei lapadeik lai lelesuina matan-na.

¹⁷ Tuti'ka mata-mata ka limak sila-la leo uma dale leu, de ala ho'i-la dodoki-dudulak nakadiditak lilofulak ndia, sama-sama no dodoki-dudula fe'ek-kala, ma Tema Babaa Fanak-ka. Ta'eanak Lewi ndia, bei napadeik no solda'du natu ka 6-k sila-la, nai lelesuina.

¹⁸ Lelek hataholi ka limak sila-la, lala Mikha uman dale, de ala ho'i-la, tema babaa fanak-ka, ma dodoki-dudula fe'ek sila-la boema, ta'eanak Lewi ndia natane nae, “Emi tao beek ia?”

¹⁹ Boema, lataa lae, “Denge-denge! Boso matane. Ka'da tunga moo ami, fo mahani te, o da'di imam, ma ami manamanoli-mafa'dam. Neme da'di imam ka'da soaneu uma isi esa mesak-kana, malole lenak, da'di imam soaneu leo esa!”

²⁰ Ta'eanak Lewi ndia namahoko, hu kande halak ndia. Da'di, ana ho'i-na tema babaa fanak-ka, ma dodoki-dudulak sila-la, de ana tunga nos.

²¹ Basa boema, hataholi sila-la'ok lakandoo sila leleo-lala'on, de ni'iana-la, bana-manu ma bua-lo'an-nala lakahuluk.

²² Lelek ala losa dook-ka so, boema Mikha naloo uma titia-tatain-nala, de basa-basas leu usi leo Dan-na, hataholin-nala. Lelek, ala deka loos boema,

²³ Mikha no hataholin sila-la, nggasi ma laloos. Leo Dan-na hataholin sila-la lipa leo dea mai, de latane Mikha lae, “Te beek ia? Tao le'e de, o moo hataholi de'u-de'u basa ia, mai usi ami?”

²⁴ Boema, Mikha nataa nae, “Emi malai meni au dodoki-dudulang, ma au imam-ma, nalosa au ta anuu hata-hata so'on, boema emi mafa'da mae, ‘Te beek ia!’ ”

²⁵ Leo Dan-na hataholin-nala lae, “Malole lenak, o denge-denge; boso nalosak hataholi ia-la lamanasa, fo ala sapu-la o. Mahani te, neukose mate o moo o teidalem-mala lala'en-na.”

²⁶ Lafa'da basa lae leondia boema, leo Dan-na hataholin sila-la, la'ok lakandoo sila leleo-lala'on. Mikha bubuluk, nae sila be'i-balakain lena heni ndia be'i-balakain, hu ndia de, ana lepos fali, de ana fali ne'un.

^27-28 Leo Dan-na hataholin sila-la, lalai basa loo imam ndia, boema bua-lo'as makaluku-makatele fo Mikha tao-nak sila-la, boema leu sapu-la Lais, kota fo laun-na laso'da nee-nee lino-linok ma tetu-temak ndia. (Kota ndia no kota Bet-Rehob-pa, nai bafak esa dalek.) Dan hataholin sila-la, taolisa la'iesak laun Lais-sala, boema ala hotu heni kota ndia. Ta hapu manatulu-fali esa boen, tulu-fali hataholi Lais sila-la fa, nana sila mamanan-na pasi fe'e, ma dook-ka neme Sidon mai. Basa ndia boema, Dan hataholin-nala lafofo'a falik kota ndia, basa boema ala leo leme naa.

²⁹ Ala nggati heni kota ndia na'den-na, de na'de Dan, tunga sila ama kain-na, na'den-na, fo nde Dan, fo Yakob anan-na.

³⁰ Sila leni dodoki-dudulak sosongok ndia, de lapadedeik-kana nai kota ndia, boema ala so'u Gerson anan Yonatan, fo Musa upun-na, a'di sila imam ma. Gersom ia, tititi-nonosin da'di lahele leo Dan-na imam, losa tepo-lelek hataholi Israel-la nanafook ma nanatapak leo nusa fe'ek neu.

³¹ Dodoki-dudulak sosongok fo Mikha taok ndia, nahele nai Lais, losa lelek Manetualain Lalaa Teman-na bei nai Silo.