HAKIM-HAKIM 17 - Susula Malalaok Hehelu Palak Ma Hehelu Beuk

Mikha sene-do'ok neu dodoki-dudulak-kala

¹ Hapu touk esa na'de Mikha. Ana leo nai letelepak manai nusa Efraim-ma.

² Faik esa boema, nafa'da inan nae, “Ina, lelek ina namopo doi fulak 1.100 boema, au amanene ina soo-supa hataholi nakok-ka. Ina doin-na nde ia! Au nde amanako-an nana.” Inan nataa nae, “Sa'di leo been-na, Manetualain ba'e-pala o, anang-ngo!”

³ Mikha fe falik doik sila leo inan neu, boema inan nae, “a Anang-ngonei, ela leo been-na, o matapo'i meme au soo-supang ndia mai, fo au tunu-hotu fe Manetualain doi fulak ia-la, fo paken soaneu tao dodoki-dudulak neme ai mai, soona nakadiditak-ka nenik do fulak. Da'di, au fe falik doik sila-la leo o neu.”

⁴ Mikha fe falik basa doik sila-la leo inan neu boema, inan ho'i-na doik sila-la 200, de ana fen leo tuka lilofulak esa neu. Boema, nadenu tuka ndia, tao dodoki-dudulak esa, neme ai mai, fo nakadiditak-kana nenik doi fulak sila-la. Basa boema, ana pe'da ai nanadoki-dulak ndia neu Mikha uman.

⁵ Mikha nanuu mamana tunu-hotuk esa so. Ana tao-na dodoki-dudulak sosongok de'ubee, ma tema babaafanak biak esa, efod boema ana so'u ana toun esa, da'di imam.

⁶ Nai lelek ndia, hataholi Israel-la manen ta; hataholi-la esa-esak tao su'di beek fo tunga mata memeten-na, la'en.

⁷ Nai lelek ndia boe, hapu ta'eanak esa neme leo Lewi-a mai. Makahulun-na, ana leo neme Betlehem, nai nusa Yehuda.

⁸ Tehu besak ia, ana la'oela kota ndia so, de ana bei neu sanga mamana leleo fe'ek. Nai leleo-lala'on ndia dalek, ana losa Mikha uman-na, nai letelepak Efraim-ma.

⁹ Mikha natanen nae, “Tolanook-ka, neme bee mai?” Hataholi ndia nataa nae, “Au hataholi Lewi neme Betlehem nai Yehuda. Au bei sanga mamana leleok.”

¹⁰ Mikha nae, “Leo moo au meme ia leona, fo ela o da'di ami manamanoli-mafa'dam, ma ami imam-ma. Mahani te, tunga teuk soona, au fe o doi fulak 10, ma papake-ngganggaok, boema nana'a-nininuk boe.”

^11-12 Boema ta'eanak Lewi ndia nakaheik, de Mikha so'un da'di ndia imam. Ana leo nai Mikha uman, de Mikha taon sama leo ana bongin.

¹³ Boema Mikha nae, “Nah, besak ia, au amahele, neukose Manetualain tao malole neu au, nana hapu hataholi Lewi esa, ana da'di imam ba'eneu au so.”