HAKIM-HAKIM 15 - Susula Malalaok Hehelu Palak Ma Hehelu Beuk

¹ Basa boema, nai lelek fai ketu-kolu gandum-ma, Simson neu donge-dama saoinan-na. Nini fe saoinan-na, bi'ihiiana esa. Simson nafa'da aliaman-na nae, “Au hii u leo kama dale u, fo atongo o au saoinang-nga.” Tehu aliaman-na, ta nau fa.

² Nafa'da Simson nae, “Au aedaenga, o mamanasan te'e-te'e, da'di, au fe henin leo o tia-laim-mala neu so. Tehu o bole ho'i-ma fa'din-na. Ndiak-ka, mana'an-na lena.”

³ Simson nae, “Oek ia, neukose hata fo au taon soaneu hataholi Filistin-nala, au salang ta ndia fa!”

⁴ Boema, neu ho'un-na, busa fuik natun telu. Ana pa'a nakabubua busa fuik sila-la buin-nala, dua-dua. Ana pa'a obol esa neu tali papa'ak sila-la, esa-esak pe'dan-na.

⁵ Basa ndia boema, ana de'de ha'i neu obol sila-la, de ana po'i busa fuik sila, leo hataholi Filistin-nala, tinan-nala dalek neu. Ha'i na'a heni basa, ala kolu-la gandum manai ndia. Nakalenak, ha'i na'a heni bubu'u-palusa gandum, ma osi angol dale boe.

⁶ Hataholi Filistin-nala leu palisak matalolole, see kande tataon ndia. Boema, hataholi nafa'das, nae Simson tataon ndia, nanahu aliaman-na nai Timna, ana fe heni saoinan-na leo, Simson tia-lain esa neu so. Hu ndia de, hataholi Filistin-nala hotu heni inak ndia, ma aman umaisin-nala, losa basa la'iesak-kasa.

⁷ Boema, Simson nafa'da hataholi Filistin sila-la nae, “Ou, emi tataom-ma, enon-na leondiak? Au soo-supa, metema au beita balas emi tatao-nono'im ndia fa soona, neukose au ta denge-denge fa!”

⁸ Basa boema, ana sapun-nalas no ta pake dale susue-lalaik fa, de ana taonisa hataholi makadotok. Basa ndia boema, ana la'o, de ana leo nai leak esa dalek, nai pupuku batu esa nai Etam.

Simson sengi hataholi Filistin-nala

⁹ Boema, hataholi Filistin-nala mai leo nusa Yehuda mai, de ala ofu leme ndia, basa boema, ala sapu-la kota Lehi-a.

¹⁰ Hataholi Yehuda-la, latane hataholi Filistin-nala lae, “Tao le'e de, emi sapu-ma, ami?” Boema lataa lae, “Ami mai ho'u Simson, fo daenga ami taon, sama leo ana tao ami-a.”

¹¹ Lamanene dede'ak ndia boema, hataholi Yehuda lifun telu, leu leo leak manai pupuku batu manai Etam leu. Ala losa naa boema, lafa'da lae, “Simson, ade o ta bubuluk, mae hataholi Filistin-nala koasa ita fa do? O tao ami le'e ia so!” Boema, Simson nataa nae, “Ka'da au balas sila tatao-nono'in neu au-a.”

¹² Boema, lafa'da lae, “Ami mai henge o, fo fe o leo hataholi Filistin-nala neu.” Simson nataa nae, “Maheluk makahuluk, mae neukose emi ta taomisa au fa.”

¹³ Boema, lae, “Hei, memak ka'da ami sanga henge o, fo fe o leo hataholi Filistin-nala neu. Neukose ami ta taomisa o fa.” Boema, ala hengen nenik tali beuk 2, de loon neme leak ndia mai.

¹⁴ Lelek loo Simson losa Lehi boema, hataholi Filistin-nala lalai mai latongo loon, ma ala eeki-latadalen. No kaiboik, ana da'di mabe'i-balakaik, hu kande Manetualain koasan-na. Ana tao ketu, ala pa'a tali-tali manai liman-na ndia, ana tao ketus leondiak mesan, nono'kabai, tali sila, tali ha'i na'ak.

¹⁵ Basa boema, nita keledei timi duik esa, bei beuk. Ana helen-nan, de ana fepanisa hataholi lifun esa, nenik keledei timi duik ndia.

¹⁶ Boema, Simson nakamee nae, “Au anoli hataholi lifun esa, nenik keledei timi; au pe'da akaduduluk popolan-nala, nenik keledei timi.”

¹⁷ Basa ndia boema, ana tapa heni timi duik ndia. Hu ndia de, ala foi mamanak ndia na'de Ramat-Lehi.

¹⁸ Basa boema, Simson name'da maana ma'da nanseli, nalosa naloo bou-bou neu Manetualain. Nafa'da nae, “Manetualain, besak-ka O fe au sesengi matuaina ia. Besak ia, nemen-na, fo au mate no maa ma'dak-ka, nalosa hataholi Filistin fo ta lalelak O ia, ala ho'u-la au do?”

¹⁹ Boema, Manetualain soi bolok nai pupuku batu manai Lehi ndia, de oe kalua neme bolok ndia mai. Simson ninu, de basa boema, name'da aon-na malole falik. Hu ndia de, loke oemata ndia lae Oemata Hakor. Oemata ndia bei nai Lehi.

²⁰ Simson nauli-nalanga hataholi Israel-la, teuk 20 dalen-na, ndek lelek hataholi Filistin-nala koasa hataholi Israel-la.