HAKIM-HAKIM 13 - Susula Malalaok Hehelu Palak Ma Hehelu Beuk

Bongi Simson

¹ Hataholi Israel-la lasala-lasingo seluk neu Manetualain, boema Manetualain po'ilotak hataholi Filistin-nala, koasas teuk 40 dalen-na.

² Nai lelek ndia, hapu touk esa nai Zora. Na'de Manoah, neme leo Dan-na mai. Saoinan-na, manabongi taak.

³ Tehu faik esa boema, Manetualain ata nusa so'dan-na, natu'du aoinan-na neun, de nae, “Doo-doo basa ia, o ta manuu anak esa boen, tehu ta dook-ka so'on te, neukose o mailu, fo o bongi-ma, ni'iana touanak esa.

⁴ Hu ndia de, manea matalolole o aoinam-ma. Boso minu angol, do nininuk fo neni mamafuk, do mu'a hata esa, nananalulik.

⁵ Bongi basa o anam ndia soona, boso nggute langadoon-na makandondook, nana nai lelek bei nai ilun dale-a, ni'iana ndia nananaketu basak, soaneu da'di hataholi nazir. Ndia nde neukose, puselaipana soaneu soi-po'i hataholi Israel-la neme hataholi Filistin-nala koasan-na mai.”

⁶ Basa ndia boema, Manoah saoinan-na, neu leo saotoun-na neu de nafa'dan nae, “Ka'a, Manetualain hataholi nadedenun-na, ana mai leo au mai; lupan-na sama leo Manetualain ata nusa so'dan-na, nalosa au bii anseli. Au ta atanen, neme bee mai fa, ma ndia boeo, ta nafa'da na'den-na neu au boen.

⁷ Tehu nafa'da nae, neukose au ailu, fo au bongi nii'ana touanak esa. Boeo nafa'da nae, au ta bole inu angol do nininuk fo neni mamafuk, do au u'a hata nananalulik, nana muse fe ni'iana ndia leo Manetualain neu, fo ana da'di hataholi esa, ana fe aoinan-na neu Manetualain, nai fai maso'dan-na dalek.”

⁸ Manoah namanene dede'ak ndia boema, ana hule-haladoi neu Manetualain nae leo ia: “Manetualain, sa'di leo been-na madenu seluk O atam ndia, ana mai leo ami mai, fo nafa'da hata fo ami muse taon soaneu ni'iana ndia, nai lelek bongi basan.”

⁹ Manetualain namanene Manoah nonoken ndia. Boema Manetualain ata nusan-na mai seluk, nai lelek Manoah saoinan-na bei nangatuuk nau-nau nai tina. Nai lelek ndia, saotoun-na ta nai ndia fa.

¹⁰ Da'di, nalai neu nafa'da saotoun-na dede'ak ndia. Nafa'dan nae, “Ka'a, mitak hataholi fo makahulun-na, ana mai leo au mai ndia, ana mai seluk!”

¹¹ No lai-laik, Manoah tunga saoinan-na. Neu deka no hataholi ndia, de natanen nae, “Tuan nde neni halak, fe au saoinang-nga do?” Boema nataa nae, “Tete'ek-ka.”

¹² Boema, Manoah natane nae, “Metema, Tuan nafa'dan ndia ana da'di soona, ni'iana ndia, muse tao beek? So'dan-na tao leo beek, nai fai makabuin?”

^13-14 Manetualain ata nusa so'dak ndia nataa nae, “O saoinam-ma, ta bole ninu angol do nininuk fo neni mamafuk, boeo ta bole na'a hata esa, taon neme ai angol-la mai, do hata esa nananalulik. Ana muse tao basa hata, fo au afa'da neun, ma nanea, fo ela ana tao basa hata, fo au afa'dak ia-la.”

¹⁵ Boema, Manoah nafa'dan nae, “Sa'di leo been-na, Tuan nahani ba'ihanak seluk fa. Fo ami tunu-nasu fe Tuan bi'ihiiana esa dei.”

^16-17 Tehu, Manetualain ata nusa so'dak ndia nae, “Leomae au ahani nai ia boeo, mahani te, neukose au ta u'a hata fo o sadian ndia fa. Tehu, metema o nau sadian boe, o sadiam ndia da'di leo tutunu-hohotu nanatunuk, fo tunu-hotu fen neu Manetualain.” Manoah beita name'da, nae manakokolak non ndia nde been-na, Manetualain ata nusa so'dan-na fa. Da'di, nafa'da nae, “Metema, leondiak soona, sa'di leo been-na, Tuan mafa'da na'dem-ma, fo ela, metema Tuan nafa'dak ndia, ana da'di soona, neukose ami fe ami ha'da-holomatam neu Tuan.”

¹⁸ Manetualain ata nusa so'dak ndia natane nae, “Tao le'e de, o nau bubuluk au na'deng-nga? Au na'deng ndia, na'de matabeuk.”

¹⁹ Boema, Manoah ho'un-na bi'ilopoana esa, no gandum faa anak, de ana taon neu batu lain boema ana tunu-hotu fen neu Manetualain, fo nde: Manetualain fo manatao dede'a matabeuk-kala.

^20-21 Lelek, ha'i pila neme batu tutunu-hohotuk ndia leo lain neu, Manoah no saoinan-na lita Manetualain ata nusa so'dan ndia, ana kae leo lain neu, nai ha'i pilak ndia dalek, leo lala'i neu. Besak-ka Manoah name'da, nae Manetualain ata nusa so'dan ndia; boema no saoinan-na sene-do'ok. Ta lita ata nusa so'dak ndia so'on.

²² Boema, Manoah nafa'da saoinan-na nae, “Tao leo bee-o, neukose mate ita, nana ita tita Manetualain so!”

²³ Boema, saoinan-na nataa nae, “Metema, memak Manetualain nau taonisa ita soona, tao leo bee-o, Ana ta nau sipo, ita tunu-hotu fen tutunu-hohotuk-ka; boeo, neukose ta natu'du basa ia-la neu ita, do nafa'da basa dede'a-dede'ak, fo nafa'da basan neu ita so.”

²⁴ Basa boema, Manoah saoinan-na, bongin-na ni'iana touanak esa, de ana foin na'de, Simson. Ni'iana ndia namatua boema, Manetualain ba'e-palan;

²⁵ ma lelek nai leo Dan-na ofun manai Zora ma Esytaol-la tala'da, boema Manetualain Duladalen-na fen be'i-balakaik.