HAKIM-HAKIM 12 - Susula Malalaok Hehelu Palak Ma Hehelu Beuk

Yefta, ma leo Efraim-ma

¹ Nai lelek ndia, leo Efraim-ma naheheleaon fo natee-nata'ti, boema ala lena Lee Yarden-na, de leu leo Zafon leu. Lafa'da Yefta lae, “Tao le'e de, o muu mata'ti moo leoina Amon-na, te o ta leleko moo ami fa? Besak ia, neukose ami hotu heni o, ma o uma isim-mala.”

² Yefta nae, “Hapu nale'a-napilik matuaina, nai hataholi Amon-nala loo ami hataholi Gilead-tala. Au aloo basa emi, fo tulu-fali au, fo soi-po'i au eme hataholi Amon sila-la mai, tehu emi ta mai fa.

³ Da'di, lelek au amahele te'e-te'e, neukose emi ta mai tulu-fali au fa, boema au aketu basa nai au daleng dale, fo au u ata'ti o hataholi Amon sila-la, leomae au muse mate boe. Boema Manetualain fe au sengis. Tao le'e de, besak ia, emi mai sapu-ma au?”

⁴ Basa boema, Yefta naloo nakabubua basa hataholi Gilead-tala, fo leu lata'ti, de ala sengi hataholi Efraim-ma. (Hataholi Gilead fo manaleo nai Efraim ma Manasye-a, hataholi Efraim-mala, kalaak-kasa, lae sila pasi fe'e leme Efraim, fo sila leon-na mai.)

⁵ Hataholi Gilead fo manamatee-matatik sila-la, langatuu-la mamana lelenak-kala nai Lee Yarden-na, fo ela ala hapu lapanggee-la, hataholi Efraim fo sanga lalai. Nai lelek hataholi Efraim esa, sanga nalai, de noke fen loak, fo ana lena leo selik neu boema, hataholi Gilead-tala latanen lae, “Ade, o hataholi Efraim do?” Metema nataa nae, “Ta,” soona,

⁶ ladenun, fo ana kokolak dede'a “Sybolet” Neukose nafa'da nae, “Sibolet”, nanahu ana ta hapu kokolak dede'ak ndia, no matetuk fa. Soona, neukose ala ho'u-lan, fo taolisan nai mamana lelenak sila-la, esa lain. Nai lelek ndia, ala taolisa hataholi Efraim 42.000.

⁷ Yefta nauli-nalanga hataholi Israel-la, teuk nee dalen-na. Basa boema, maten, de latoin nai nggolo-ta'dun, fo nde: kota Mizpa nai Gilead.

Ebzan, Elon ma Abdon

⁸ Basa Yefta boema, Ebzan neme Betlehem mai, nauli-nalanga hataholi Israel-la.

⁹ Ebzan anatoun teluhulu, ma anainan teluhulu. Ana fe anainan sila-la, sao hataholi-la leme leo fe'ek mai, ma ana ho'i-na anafe'oanak teluhulu, leme leo fe'ek mai, de ana fen neu anatoun-nala. Teuk hitu dalen-na, Ebzan nauli-nalanga hataholi Israel-la,

¹⁰ basa boema, maten, de latoin nai Betlehem.

¹¹ Basa Ebzan boema, Elon, neme leo Zebulon-na mai, nauli-nalanga hataholi Israel-la, teuk sanahuluh dalen-na.

¹² Basa boema maten, de latoin nai Ayalon, nai Zebulon nusan-na.

¹³ Basa Elon boema, Abdon, fo Hilel anan-na, neme Piraton mai, nauli-nalanga hataholi Israel-la.

¹⁴ Anatoun haahuluh, ma upu toun teluhulu. Sila esa-esak, nanuu keledei sasa'ek esa. Teuk falu dalen-na, Abdon nauli-nalanga hataholi Israel-la.

¹⁵ Basa boema maten, de latoin nai Piraton, fo nai Efraim nusan-na, nai hataholi Amalek-kala nusa letelepan-na.