HAKIM-HAKIM 11 - Susula Malalaok Hehelu Palak Ma Hehelu Beuk

¹ Yefta nde been-na solda'du esa, ao matua, madema, balakaik ma palani. Ana leo nai Gilead. Aman na'de Gilead, tehu inan, hataholi manasosoa-piaok.

² Aman ndia boeo, nanuu ana touana fe'ek, neme sao ka'bin-na mai. Lelek ni'iana touanak sila-la lamatua boema, ala usi heni Yefta neme uma mai. Lafa'dan lae, “O ta hapu baba'ek hata esa boen, neme ami amam pusakan-na mai fa, nana o inam fe'e.”

³ Hu ndia de, Yefta nasi'da-naba'e neme tolanoon-nala mai, boema ana la'o, de ana leo nai nusa Tob-pa. Hataholi mangalauk bubuak esa nai naa, lakabubua lon, de leu lamanako.

⁴ Basa teuk de'ubee boema, hataholi Amon-nala sapu-la hataholi Israel-la.

⁵ Lelek, dede'ak ndia ana da'di, basa Israel lasi nggolon manai Gilead-tala leu, de ala leleko Yefta, fo ana la'oela nusa Tob-pa.

⁶ Lafa'dan lae, “Mauli-malanga ami, fo ata la'ban hataholi Amon-nala.”

⁷ Tehu, Yefta nataa nae, “ade, emi ta mahiik au nanseli fa hetu? Emi usi heni au eme au amang uman mai so. Tao le'e de, nai lelek emi nai toto'a-tataak-ka dalek boema, emi mai leo au mai?”

⁸ Boema lataa lae, “Ami mai, nanahu ami nau, o mauli-malanga basa laun Gilead-ta lala'en-na, fo tata'ti to leoina Amon-na, besak ia boe.”

⁹ Yefta nataa nae, “Metema, emi leleko au fali leo Gilead u, fo tata'ti to leoina Amon-na, fo Manetualain fe ita sengi soona, neukose au nde da'di manakoasa neu emi.”

¹⁰ Boema lataa lae, “Ami makaheik, Manetualain nde da'di sakasii.”

¹¹ Boema, Yefta la'o sama-sama no basa mauli-malanga Gilead-tala. Basa boema, laun Gilead-tala so'un da'di manakoasa ma mauli-malangan. Ma nai Manetualain matan, fo nai Mizpa, Yefta neni ndia nonoken-nala neu laun Gilead-tala.

¹² Basa ndia boema, Yefta nadenu hataholi neu leo mane Amon-na neu, fo nafa'dan nae leo ia, “Ami sala beek, de emi o mata'ti moo ami nusam-ma?”

¹³ Leoina Amon-na, manen-na nataa ladenu hataholi sila-la nae, “Lelek hataholi Israel-la, ala mai leme Masir mai-a, ala ho'i-la ami daem-ma, mulai neme Lee Arnon-na, losa Lee Yabok-ka, ma Lee Yarden-na. Besak ia, fe falik basa-basas, no mole-dame.”

¹⁴ Boema, Yefta nadenu hataholi neu seluk leo mane Amon-na neu,

¹⁵ fo lataa lae leo ia: “Hataholi Israel-la, ta latona-la hataholi Moab-pala, do hataholi Amon-nala daen-na fa.

¹⁶ Lelek hataholi Israel-la, la'oela Masir-ra, ala tunga moo solokaek-ka, de leu leo Namo Akaba leu, boema ala losa Kades.

¹⁷ Basa boema, ladenu hataholi neu leo mane Edom-ma neu, fo loke fes loak, fo ala tunga sila nusan dale. Tehu, ana ta fes loak fa. Basa boema, bei loke leondiak seluk neu mane Moab-pa, tehu manek ndia boeo, ta fes loak, fo ala tunga sila nusan dale fa. Hu ndia de, hataholi Israel-la, leo leme Kades.

¹⁸ Basa boema, ala la'ok lakandoo tunga moo solokaek-ka, tehu ala ta tunga Edom ma Moab nusan-na fa, te ala ho'i eno manalu, nalosa ala losa Moab boboan dulu, fo nai Lee Arnon-na selik. Ala ofu leme naa, tehu ala ta lena leo lee ndia selik leu fa, nanahu dae ndia, nai Moab nusan dale.

¹⁹ Basa ndia boema, hataholi Israel-la, ladenu hataholi neu leo Sidon, fo mane Amori-a, nai Hesybon, fo loke fes loak, fo ala tunga nusa Amori-a dalek, nanahu sanga leu leo sila nusa mesan-na leu.

²⁰ Tehu Sidon ta fes loak fa, nana ta namahele, nae sila ka'da la'ok-la'di tunga ndia mesak-kana fa. Boema, ana fo'a basa solda'dun-nala lala'en-na, de lakabubua leme Yahas, basa boema, leu sapu-la Israel.

²¹ Tehu Manetualain fo Israel Manetualain-na, fe hataholi Israel-la sengi Sidon no solda'dun-nala. Hataholi Israel-la, hapu la'iesak hataholi Amori manaleo nai nusak ndia, daen-nala lala'en-na, tutuin-na leondiak.

²² Langatuu-la nusa Amori ndia, mulai neme Arnon nai boboan kona, losa leo Lee Yabok-ka boboan kii, ma neme moo solokaek manai boboan dulu, losa leo Lee Yarden-na boboan muli neu.

²³ Da'di, Manetualain, fo Israel Manetualain-na, nde usi heni hataholi Amori-la, soaneu Manetualain anan-nala paluun-na.

²⁴ De besak ia, ade, o nau ho'i falik-kasa do? O bole manuu mahele Kamos, fo o lamatua daebafam ndia, ana fe o dae-a. Tehu, hata fo Manetualain, fo ami Manetualaim-ma, fe basan neu ami so, neukose ami manea mahelen.

²⁵ O maedaenga, o malole lena neme Zipor anamanen Balak, fo mane Moab-pa mai do? Balak beita la'ban nita, do natee-nata'ti no ami la'iesa boen.

²⁶ Teuk natun telu dalen-na, Israel nangatuu-na Hesybon ma Aroer boema nggolo-nggolok manai titia-tatain-nala, ma basa kota-kota manai Lee Amon-na, su'un-na. Ma tao le'e de, doo-doo basa ndia, o ta ho'i falik-kasa fa?

²⁷ Ta, ami ta masala neu o fa. O nde masala, nanahu o mata'ti moo ami. Manetualain nde manamaketu-mala'dik-ka, de faik ia, naketu dede'ak ia, fo nde leoina Israel-la no leoina Amon-na, dede'an-na.”

²⁸ Tehu mane Amon-na, ta taoafik neu Yefta hala hehelun ndia fa.

²⁹ Basa boema, Manetualain Duladalen-na, koasan-na Yefta. Boema, Yefta neu donge-dama nusa Gilead ma nusa Manasye, de basa boema, ana fali ne'un leo Mizpa, fo nai Gilead. Ana la'ok nakandoo neme ndia, leo leoina Amon-na nusan-na neu.

³⁰ Yefta tao hehelu-balataak-ka nde ia no Manetualain nae, “Metema, Manetualain fe au loak, fo au sengi hataholi Amon-nala,

³¹ ma au fali no so'da molek, soona see boe, fo ana kalua makasososa neme au umang dale mai, fo ana sipok au soona, neukose au tunu-hotun, da'di leo tutunu-hohotu nanatunuk neu Manetualain.”

³² Boema, Yefta lena leo Lee Yarden-na selik neu, fo nata'ti no hataholi Amon-nala, de Manetualain fen sengi.

³³ Yefta nata'ti nos, no mamate-momopon neme Aroer losa leo nusak manai Meni titia-tatain – basa-basan lala'en-na kota 20 – ma dodoon-na losa Abel-Keramin. Mate hataholi Amon makadotok nanseli, nalosa hataholi Israel-la sengis.

Yefta anafe'on-na

³⁴ Lelek, Yefta fali ne'un leo Mizpa neu boema, anafe'on-na mai soluk-kana nenik lolongek ma li'u meko-la'bu. Ana kisan-na nde ndia.

³⁵ Leondiak Yefta nitan boema, Yefta dalen-na he'dis nanseli, nalosa ana sii-sii lulu'i ba'dun-na, ma nae, “Awii, anang-ngonei, au daleng-nga nakalulutuk! Tao le'e de, o taom-ma au daleng-nga he'dis-sa? Au soo-supa basa neu Manetualain so, de au ta hapu hela falik-kana so'on!”

³⁶ Boema, anafe'oanak ndia, nafa'da Yefta nae, “Ama soo-supa basa neu Manetualain so, de Manetualain sipok Ama balas hataholi Amon fo Ama musun sila-la, tatao-nono'i mangalaun-nala so. Da'di, hata fo Ama helu basan so, ela leo been-na, Ama nakalala'ok-kana.”

³⁷ Anafe'oanak ndia, kokolak nakandoo nae, “Au dokodoe ka'da dede'ak esa: Fe au loak bulak dua, fo au la'o-lao nai letelepak-ka, sama-sama o au nonoong-ngala. Nai naa, neukose au kii-makaleleu au ua-naleng, nana neukose, au mate nai lelek fo, au bei matatema.”

³⁸ Boema, Aman fen loak, de ana po'in neu leona. Anafe'oanak ndia no nonoon-nala leu leo letelepak-ka leu fo dalen-nala he'dis-sa nai naa, nanahu, neukose maten te, ana beita ka'bing fa, ma anan ta.

³⁹ Basa bulak dua boema, ana fali ma'in leo aman mai, boema aman tao hata, fo ana helu basan neu Manetualain so. Boema anafe'oanak ndia maten, nai lelek bei matatema. Ndia nde manada'di makasososan-na, tao le'e de, nai hataholi Israel-la dalek, biasan-na

⁴⁰ tunga teuk, anafe'oanak-kala la'o faik 4 dalen-na, soaneu leu dale he'di, fo lafandele Yefta anafe'on-na nai Gilead.