HAKIM-HAKIM 10 - Susula Malalaok Hehelu Palak Ma Hehelu Beuk

Tola

¹ Mate basa Abimelekh boema, Tola, fo Pua anan-na, da'di mauli-malangan, fo soi-po'i hataholi Israel-la. Dodo neme leo Isakhar-ra mai, upun Tola ndia. Ana leo nai Samir, nai letelepak Efraim-ma.

² Nauli-nalanga hataholi Israel-la, teuk duahulu dua dalen-na, basa boema maten, de latoin nai Samir.

Yair

³ Basa Tola boema, Yair nauli-nalanga Israel, teuk duahulu dua dalen-na. Yair da'di neme Gilead mai.

⁴ Anatoun teluhulu. Lanuu keledei sasa'ek teluhulu ma desa teluhulu nai nusa Gilead-ta. Bei loke desa sila-la, lae desa Yair.

⁵ Mate Yair, de latoin nai Kamon.

Yefta

⁶ Hataholi Israel-la, lasala-lasingo seluk neu Manetualain. Ala ta taoafik neu Manetualain fa, ma ala ta sene-do'ok-kana so'on. Ala sene-do'ok neu lamatua daebafak Baal ma Asytoret, boema leoina Siria, Sidon, Moab, Amon ma Filistin lamatua daebafan-nala.

⁷ Hu ndia de, Manetualain namanasa hataholi Israel-la, nalosa Ana po'ilotak leoina Filistin ma leoina Amon-na, koasas.

⁸ Teuk 18 dalen-na, leoina ka duak sila-la, tuni-ndeni basa hataholi Israel manaleo manai Gilead-ta, fo nde hataholi Amori-la nusan manai Lee Yarden-na boboan dulu. Ala tao hataholi Israel-la no ta pake ha'da hataholi fa.

⁹ Nakalenak, hataholi Amon-nala lena Lee Yarden-na, fo latee-lata'ti loo leo Yehuda, Benyamin ma Efraim, nalosa hataholi Israel-la doi-doso lanseli.

¹⁰ Boema, hataholi Israel-la laloo bou-bou neu Manetualain lae, “Ami masala-masingo basa neu O so, nanahu, ami ta taoafik neu O fa, ou ami Manetualain! Ami sene-do'ok neu lamatua daebafak Baal-la.”

^11-12 Manetualain nataa nae, “Makahulun-na, leoina Masir, Amori, Amon, Filistin, Sidon, Amalek ma leoina Maon-nala paleta emi. Boema, nai lelek ndia, emi maloo bou-bou neu Au, hetu? So'ba mafandele, ade Au ta soi-tefa ala emi neme sila koasan-na mai fa do?

¹³ Leomae leondiak boe, lena-lenak emi boeo bei heok masadea Au, boema emi meu sene-do'ok lamatua daebafak-kala. Besak ia, Au ta nau soi-po'i emi so'on.

¹⁴ Ka'da meu leo lamatua daebafak, fo emi helek ndia. Maloo bou neus! Nemen-na, fo sila nde da'di manatulu-manafali, nai lelek emi nai toto'a-tataak-ka dalek.”

¹⁵ Tehu hataholi Israel-la, lafa'da Manetualain lae, “Ami masala-masingo so, Manetualain. Tao su'di beek, fo O mahiik-kana; sa'di faik ia, O tulu-fali ami.”

¹⁶ Basa boema, ala tu'u-tapa heni basa dodoki-dudulak sosongo kala, de ala sene-do'ok neu Manetualain. Boema Manetualain boeo, dalen-na tu'da, metes lai toto'a-tataak-ka dalek.

¹⁷ Nai lelek ndia, solda'du Amon-nala laheheleaon fo latee-lata'ti. Ala ofu nai Gilead. Hataholi Israel-la boeo, lakabubua basa so, de ala ofu lai Gilead boe.

¹⁸ Nai naa, laun-na ma basa mauli-malangan-nala leme leo-leo Israel sila-la, esa natane esa nae, ade, nai emi dalek, hapu hataholi napalani so'uk tafa-sisilo, fo la'ban leoina Amon-na do ta. Metema, hapu soona, tao hataholi ndia, da'di mauli-malangan neu laun Gilead-ta lala'en-na.