HAKIM-HAKIM 1 - Susula Malalaok Hehelu Palak Ma Hehelu Beuk

Leo Yehuda ma leo Simeon-na ho'u-la Adoni-Bezek

¹ Mate basa Yosua boema, hataholi Israel-la latane Manetualain, lae, “Manetualain, ami leom beek-ka nde, muse makasososa neu sapun-na hataholi Kanaan-nala?”

² Boema Manetualain nataa nae, “Leo Yehuda. Au fe basa koasa neu sila so, fo leu langatuu-la nusak ndia.”

³ Boema, leo Yehuda nafa'da leo Simeon-na nae, “Tulu-fali ami, fo teu sapu-ta, hataholi Kanaan-nala, fo ata tangatuu-ta, nusak fo Manetualain naketu fen neu ami. Mahani te, neukose ami boeo tulu-fali emi, fo emi mangatuu-ma, nusak fo Manetualain naketu fen neu emi.” Boema leo Simeon

⁴ ma leo Yehuda, leu latee-lata'ti sama-sama. De Manetualain fes sengi hataholi Kanaan-nala, ma hataholi Feris-sala. Mate solda'du musu lifun sanahulu nai Bezek.

⁵ Ala hapu Adoni-Bezek, fo nusak ndia manen-na, de ala sapu-lan.

⁶ Nalai, tehu ala usin de ala ho'u-lan, boema ala te'te heni limaku'uinan-eiku'uinan.

⁷ Boema, Adoni-Bezek nae, “Makahulun-na, au te'te heni manek hituhulu, limaku'uinan-eiku'uinan-nala so, boema au po'ilotak-kasa la'a nana'a elak fo manatu'da leme au meing lain mai. Besak ia, Manetualain tao au, saman-na leo au tao sila.” Basa boema, ala fo leni Adoni-Bezek leo Yerusalem neu, de maten neme naa.

Leo Yehuda sengi Yerusalem

⁸ Hataholi Yehuda-la, leu sapu-la Yerusalem, boema langatuu-lan, de ala hotu heni kota ndia, boema taolisa laun-nala.

⁹ Basa ndia boema, leu sapu-la seluk hataholi Kanaan fo manaleo nai nusak letelepan-na ma pupukuk-kala huun-na; boeo manaleo manai nusa dae ma'dak manai boboan kona,

¹⁰ ma nai kota Hebron, fo nde kota fo makahulun-na, ala foin na'de Kiryat-Arba. Nai ndia, hataholi Yehuda-la sengi leo-ingu Sesai, Ahiman ma Talmai.

Otniel sengi kota Debir-ra

¹¹ Hataholi Yehuda-la leu sapu-la Kota Debir-ra, neme Hebron mai, fo nai lelek ndia, na'de Kiryat-Sefer.

¹² Hataholi esa neme leo Yehuda mai, na'de Kaleb nafa'da nae, “Ba'eneu see, fo ana bisa nagatuu-na Kiryat-Sefer soona, ana bole saon-na, au anafe'ong Akhsa.”

¹³ Otniel, fo Kaleb fa'din-na na'de Kenas, anan-na, nangatuu-na kota ndia. Boema Kaleb fe anafe'on Akhsa, da'di Otniel saoinan.

¹⁴ Neu faik fo ala ka'bing-nga boema, Otniel nakaseti Akhsa fo daenga noke aman, fo ana fes dae duduik esa. Akhsa kona neme keledein lain mai, boema Kaleb natanen, hata fo nahiik-kana.

¹⁵ Akhsa nataa nae, “Au hii oemata de'ubee, nana dae fo ama fe au ndia, nai mamana oe tak.” Boema Kaleb fen oemata manai lee-a langan-na, ma oemata manai lee-a dae.

Leo Yehuda ma leo Benyamin-na, sesengin-na

¹⁶ Musa aliaman-na, tititi-nonosin fo nde hataholi Keni-la tunga, leo Yehuda, de ala kalua leme Yerikho, fo kota kurma ndia mai, de leu leo nusa tokotiik-ka nai Arad boboan kona, fo nai Yehuda. Ala leo lahele leme naa, loo leoina Amalek-kala.

¹⁷ Basa boema, sama-sama loo leo Simeon, leo Yehuda ndia, de leu sapu-la hataholi Kanaan fo manaleo manai kota Zefat-ta, de ala sengis. Ala soo-supa kota ndia, basa boema, ala tao lakalulutuk-kana, boema ala foin na'de Horma.

^18-19 Manetualain tulu-fali hataholi Yehuda-la, nalosa langatuu-la nusa letelepan-na. Tehu, ala ta hapu langatuu-la Gaza, Askelon do Ekron no nusa-nusak manai titia-tatain-nala fa, nanahu leoina manaleo ndolo-ndolo tasi su'uk-ka, lanuu kaleta besi; hu ndia de, hataholi Yehuda-la ta hapu usi heni fas.

²⁰ Sama leo hata, fo Musa paleta basan so, de ala fe Hebron leo Kaleb neu, nana makahulun-na, Kaleb usi heni Enak tititi-nonosin-nala, leo-ingu bubuak telu leme kota ndia mai so

²¹ Leo Benyamin-na, ta hapu usi heni hataholi Yebus-sala, kalua leme kota Yerusalem-ma mai fa. Hu ndia de, hataholi Yebus-sala, bei leo lai naa, sama-sama loo hataholi Benyamin-nala.

Yusuf tititi-nonosin leon-nala sengi Betel

^22-23 Leo Efraim ma leo Manasye, fo Yusuf tititi-nonosin-nala, leu sapu-la kota Betel-la, fo nai lelek ndia, na'de Lus. De Manetualain tulu-falis. Nai lelek ladenu mata-mata neu leo kota ndia neu,

²⁴ latongo loo touk esa neme kota mai. Boema lafa'dan lae, “Metema, o nau tulu-fali ami, fo ami bisa masok leo kota ndia dalek meu soona, neukose ami tao o, no malole.”

²⁵ Boema, hataholi ndia, natu'dus enok leo kota ndia dalek neu. Boema, Efraim ma Manasye hataholin-nala, masok leo kota ndia dalek leu, de ala taolisa la'iesak laun-nala, ela ka'da hataholi ndia no tolanoo ka'a-fa'din-nala.

²⁶ Basa boema, ana lali leo hataholi Het-tala nusan-na neu, de napadedeik-na kota esa neu ndia, de ana foin na'de Lus. Kota ndia na'den-na, bei nahele leondiak.

Hataholi Israel-la ta usi heni leoina-la fa

²⁷ Leo Manasye-a ta usi heni kota Bet-Sean-na laun-nala fo nde Taanakh, Dor, Yibleam ma Megido no nggolo-nggolok manai titia-tatain-nala fa. Da'di, hataholi Kanaan-nala leo lahele leme ndia.

²⁸ Memak, nai lelek hataholi Israel-la balakain-na popo-tama boema, lakaseti hataholi Kanaan-nala, fo laue-lale'di fes, tehu sila boeo, ta usi heni hataholi Kanaan sila-la makandondook leme ndia mai fa.

²⁹ Leo Efraim-ma, ta usi heni hataholi Kanaan fo manai kota Gezer ndia, laun-nala fa. Da'di, hataholi Kanaan-nala bei leo lahele sama-sama loos, leme ndia.

³⁰ Leo Zebulon-na, ta usi heni laun manai kota Kitron ma kota Nahalol-la boe. Hu ndia de, leoina Kanaan-na bei leo lahele sama-sama loos leme ndia, tehu lakaseti hataholi Kanaan sila-la, fo laue-lale'di fes.

³¹ Leo Asyer-ra, ta usi heni laun manai kota Ako, Sidon, Ahlab, Akhzib, Helba, Afek ma Rehob boe.

³² Hu ndia de, hataholi Kanaan, fo nusa isik nai nusak ndia, ala bei leo lai ndia, sama-sama loo hataholi Asyer-rala.

³³ Leo Naftali-a, ta usi heni laun manai kota Bet-Semes ma kota Bet-Anat-ta boe. Hu ndia de, hataholi Kanaan, fo nusa isik nai nusak ndia, ala bei leo lai ndia, sama-sama loo hataholi Naftali-la. Tehu lakasetis, fo laue-lale'di fes.

^34-35 Leoina Amori-a bei leo lahele lai Asyalon, Saalbim ma Letek Heres-sa, nana ala seseti leo Dan-na, leo letelepan-na neu, de ala ta po'ilotak-kasa kona leo nusak manai bafan dale mai fa. Tehu leo Efraim, ma leo Manasye-a, tuni-ndeni tataas esa loo leoina Amori sila-la, boema lakasetis, fo laue-lale'di fe leo ka duak sila-la.

³⁶ Nai Sela boboan kii, nakatoo no hataholi Amori-la daen-na, fo ana tunga Ndanda'ek Akrabim-ma.