HABAKUK 2 - Susula Malalaok Hehelu Palak Ma Hehelu Beuk

Manetualain nataan neu Habakuk

¹ Au nau kae leo Au uma nanea puni mademang-nga u, fo au ahani hata fo Manetualain sanga nafa'dan neu au, ma natataan-na leobeek, la'eneu au dokodoeng-nga.

² Manetualain nataa au nae leo ia, sulak-ma, ninitak ia. “Dokik-kana no mangale'dok, hata fo Au afa'dan neu o, neu batu lei biak esa lain, fo ela lees-sana no mudak.

³ Sulak-ma, dede'ak ndia, nana besak ia fain-na beita losa fa. Tehu faik ndia ana losa lai-lai, ma hata fo Au afa'dan neu o ndia, neukose tao leo bee-o ana da'di. Leomae meten soona bei dook-ka, tehu ka'da mahani! Neukose tao leo bee-o faik ndia ana mai, ma neukose ta nakamama'ak so'on.

⁴ Mafandendelek te, hataholi mangalauk-ka, neukose ta naso'da fa, tehu hataholi manatao tunga Manetualain hihii-nanaun-na, neukose naso'da, nanahu ana lilineka neu Manetualain.”

Supa-sook ba'eneu hataholi mangalauk-ka

⁵ Su'i-betes ndia, ana ke'di-ndiu hataholi-a do'e-do'e. Hataholi manatenepetak ndia koao-ndaeao ma ana hela-hae. Sama leo mamates-sa, ndia boeo ta neme'da dai fa. Natona-na leoina esa; fo basa soona leoina esa seluk.

⁶ Tehu natona-na basa leoina sila-la, neukose lakamuun, ma ala hakinonolin. Neukose lafa'da lae, “O nanasoo-supak nana o pe'da madoudou buas fo ta o nuum fa! Losa fai hi'da, o tao mamasu'i o aoinam-ma nenik o laka hataholi manamahutak neu o-a, fo ana bae hutan-na?”

⁷ Tehu o ta mame'da fa te, o fufu'di-oo'dok-ma hataholi fe'ek-kala, neukose lahuta-labu'u boe, de lakasetis fo ala bae bunak. Neukose o musum-mala, ala mai fo ala tao-la o bii manseli. Neukose lamanako-la o hata-hetom!

⁸ O bonga basa leoina ba'uk-ka uman-nala so, tehu leoina fo o ta hapu bonga uman-nala fa, neukose ala bonga o umam-ma, nanahu o tao basa kanisak so, ma nanahu o tatao-nono'im, fo ta nanuu dale susue-lalaik ndia neu nusa-nusak-kala, kota-kota-la, ma laun-nala.

⁹ O nanasoo-supak! No o tataom ndia de, o teidalem-mala lamasu'i nenik nanalak fo hapun tunga tatao-nono'i susue-lalai taak-ka, fo ela o umam-ma nee-nee lino-lino, ma o mala susa-soe deak.

¹⁰ Tehu o dale tutu'um ndia ka'da neni mamaek fe o teidalem-mala. No o bonga leoina ba'uk-ka uman-nala, de o makatutu'dak seluk o aoinam-ma.

¹¹ Bai te, batu-batu manai papala nanamadak-ka, laloo bou-bou soo-supa o, ma uma-la diin-nala po'a-benga halak manamaloo bou-bouk ndia.

¹² O nanasoo-supak! O mapadedeik kota neu tatao-nono'i mangalauk lain, ma o mafofo'an nenik kanisak.

¹³ O matona-ma leoina-la, ala sota-mangu te sosoa-ndandaan ta, ma ha'i na'a heni basa lapadedeik-la hata lala'en-na. Manetualain Fo Manakoasa, hihi-nanaun basa sila lala'en-na.

¹⁴ Tehu sama leo oe henu tasi-a, leondiak boe daebafak-ka, neukose henuk no malelak la'eneu Manetualain, ma koasan-na.

¹⁵ O nanasoo-supak! O makadadaek ma makamumulu-makamamaek o uma titia-tataim. Hu no o tatao-nono'im de laleu-lilok sama leo hataholi manamafuk-ka.

¹⁶ Besak ia, o baba'em-ma losa, soaneu nananakamamaek, te ta soaneu nanafe ha'da-holomata fa. Neukose O ha'da-holomatam, nasafali da'di nananakadadaek. Neukose Manetualain laka o minu neme nggalas fo isin-na huhukuk. Neukose o minun fo maleu-lilok.

¹⁷ O lo'o ai nai Libanon nulan dale, de besak ia neukose o nde nanalo'o henik. O taomisa banan-nala, de besak ia, bana-la lakatata'u o. Basa sila-la ala da'di, nanahu kanisak ma tatao-nono'i susue-lalai tak fo o tao basan soaneu nusa-nusak-kala, kota-kota-la ma laun-nala.

^18-19 O nanasoo-supak! O mafa'da ai bibiak esa mae, “Fo'a leona!” do o mafa'da batu matua esa mae, “Mapadeik leona!” Ade, dodoki-dudulak esa, bisa nafa'da o hata esa do? Bole da'di, dodoki-dudulak ndia nananakadidita lilopilas do lilofulak, tehu ani hahaen ta. Dodoki-dudulak sosongo-tatangok-ka sosoan-na beek? Ka'da hataholi daebafak-ka lima leen ndia. Fo o hapu neme dodoki-dudulak ndia mai, ka'da masapepeko-masandandalik-ka mesak-kana. Manatao sosongo-tatangok fo ta bisa kokolak fa ndia, namahehelen-na manada'di tak.

²⁰ Manetualain nai Uma malalao-malalafun dale. Ela leo been-na basa hataholi manai daebafak-ka, ta hala nai matan-na.