HABAKUK 1 - Susula Malalaok Hehelu Palak Ma Hehelu Beuk

¹ Manetualain nafa'da hala heheluk neu Nabi Habakuk-ka nde ia.

Habakuk dalen-na to'a-sota la'eneu ndoos ma matetuk ta so.

² Ou Manetualain, au muse oke tutulu-fafalik losa faihi'da? Faihi'da fo besak-ka O mamanene ma soi-tefa-mala ami neme tuni-ndenik-ka mai?

³ Tao le'e de, O po'ilotak au mete tatao-nono'i mangalauk makadotok leondiak-ka? Masa bole, O makatatakak mete la'o lenak, makadotok leondiak-ka? Nai mamanak lala'en-na, hapu nakalulutuk ma naseti-nalakak, nahotek, ma nale'a-napilik.

⁴ Ala heheta-aa'i hoholo-lalanek, ndoos ma matetuk-ka ta nanaho'un-nahelek la'iesa boen. Hataholi mangalauk-ka sengi hataholi manatao tunga ndoon-na, de ala puta-pai ndoos ma matetuk-ka.

Manetualain natataan-na

⁵ Basa boema, Manetualain nafa'da anan-nala nae, “Metema emi taoafik neu laoina manai emi boboa-kaisum-mala soona neukose emi dodoo doak-kana, ma emi nggenge-la. Nana nai emi fai maso'dam-ma dalek, neukose Au tao hata esa, fo metema ka'da ala tui emi soona, emi ta mamahele fan.

⁶ Leoina Babel fo makaa-makisuk ndia, neukose Au taon da'di leoina manakoasa. Ala kalua lakadadalak leme nusan-na mai, fo ala la'ok okofefeo basa daebafak-ka, soaneu ala paleta leoina fe'ek-kala.

⁷ Bibii-namata'uk da'di nai mamanak lala'en-na; no koao-ndaeaok, ala ta sipok hoholo-lalanek lala'en-na fa; ala sipok ka'da hoholo-lalanek bee kande nandaa no dale hihiin-nala.

⁸ Ndalan-na nggafan-na lena heni meoasu ma makaa-makisun lena heni busafui kamala'ak-ka. Solda'du manasa'e ndalan-nala, ala mai leme nusa dook-kala mai; mamain-nala sama leo manupui balupua la'u manuana.

⁹ Solda'dun-nala sapu, fo leni naseti-nalakak, basa hataholi-la lita mamai nala soona ala dele bengge'be. Ala ho'u-la hataholi-la, ta leke-na dede'un-nala fa.

¹⁰ Ala hakinonoli mane-manek-kala ma ala hika hataholi mana'a ngga'di matua-madema-la. Ala heheta-aa'i solda'du-la kota musun-na, fo lakadofun nenik dae, boema ala loso-la solda'du-la kota musun ndia.

¹¹ Boema, hataholi fo ala koao-ndaeao lenik be'i-balakain sila-la, ala la'o no lalaik sama leo anin-na.”

Habakuk dalen-na haladoin seluk neu Manetualain

¹² Manetualain, O nde been-na Manetualain neme makahulun eli mai. O nde been-na au Manetualaing fo malalao-malalafuk, ma manaketu basa tak. Manetualain fo au Manetualaing ma au manamasulu-mahapang; O hele leoina Babel ndia, de O fen be'i-balakaik fo ana huku ami.

¹³ Tehu, tao le'e de O makatatakak, mete hataholi manatao mangalauk fo dale susue-lalai tak sila-la? Ade O ta malalao-malalafuk manseli, soaneu mete tatao-nono'i magalauk fa hetu? Ade O ta malua mete ta ndoos ma matetuk-ka fa hetu? Da'di, tao le'e de, O ka'da denge-denge, nai lelek hataholi malenalanga-masa'basok-kala tao lakalulutuk hataholi kamahehelek-kala?

¹⁴ Tao le'e de, O mete hataholi daebafak-ka, sama leo i'ak manai tasi dale-la, ma sama leo lama-bobo'i mauli-malanga tak-ka?

¹⁵ Leoina Babel-la ho'u hataholi-la nenik dolu, nono'kabai, i'ak hataholi sila-la. Ala lele'a-loloso hataholi sila-la leo dala-la dalek neu, de leoina Babel-la namahoko, hu ka nde sila dalan-na maisik.

¹⁶ Basa boema, ala sene-do'ok neu dala ndia, de ala fen tutunu-hohotuk, nana no dala ndia de ala hapu nana'a-nininuk sasi kao-kao, de ala da'di hataholi kamsu'i-makabetek.

¹⁷ Masa bole, ala fe'a tafainan-nala lakandoo, fo taolisa leoina-la ta no do'o do ampon fa?