EZRA 9 - Susula Malalaok Hehelu Palak Ma Hehelu Beuk

Ezra namanene hala nafa'dak la'eneu hataholi Yahudi, fo ala sao hataholi ta Yahudi fa

¹ Tao basa hata sila-la lala'en-na boema, leoina lasi Israel de'ubee, ala mai leo au mai. Lafa'da lae laun Israel-la, fo basa imam-mala lai dalek boe, ma hataholi Lewi-la, ala leo lakabubua loo leoina manaleo lai titia-tatain sila la, fo nde leoina Amon, Moab, Masir, Kanaan, Het, Feris, Yebus, ma Amori. Nakalenak, basa imam-mala, ma hataholi Lewi-la, ala tao leondiak boe. Sila basa-basas tao tatao-nono'i manggengeok, fo leoina sila-la tao-no'ik-ka.

² Hataholi Yahudi-la, ana toun-nala sao ina leoina fe'ek anafe'on-nala, nalosa Manetualain ana hehelin-nala, ta neuisik so'on. Lena-lenak manatao nakahuluk tataos ndia, nde basa lasi ha'dak-kala, ma manapaleta Israel-lala.

³ Au amanene dede'ak ndia boema, au asasale dale anseli, nalosa au sisii-lulu'i au bua papakeng-nga, ma au sisii-lulu'i au langadoong-nga, ma au nggolomeing-nga, boema au angatuuk no dale nakalulutuk.

⁴ Au angatuuk ka'da leondiak ahele, losa li'u tunu-hotu tutunu-hohotu le'donosok-ka. Basa boema, hataholi-la mai okofefeo-la au. Ala bii lanseli, nanahu lafandele Israel Manetualain-na, Ana fe nasanene'da kahelek, neu hataholi manafali ma'is leme mamana tu'u-tapak ndia mai, sala-singon-nala.

⁵ Lelek, mulai tunu-hotu tutunu-hohotu le'donosok-ka boema, au fo'a eme mamanak fo, au angatuuk no dale nakalulutuk ndia mai, no bua papake si'da-saek, de au akaluku-akatele, ma au look au lima nga, leo au Manetualain neu.

⁶ Au afa'da ae, “Ou au Manetualaing, au mae botik au langang-nga nai O matam-ma. Ami sala-singom nadodou nai ami langam lain, losa ana koila'e lalai-a.

⁷ Neme ami bei-ba'i kaim-mala tepo-lelen, losa besak ia, ami fo O anam-mala, masala-masingo neu O. Hu ndia de, mane nusa fe'ek-kala sengi ami, moo basa ami manem-mala, boema basa ami imam mala. Ala taolisa ami, ma bonga ami umam-mala, ma foo loo ami da'di leo hataholi nanafook. Lakamumulu-lakamamaek langge'a ami, sama leo nai faik ia.

⁸ Tehu, besak ia, ou ami Manetualain, besak-ka, O madale malole neu ami. O soi-po'i hataholi de'ubee nai ami dalek, neme mamana ata mai, fo ami maso'da no mole-dame nai mamana hehelik ia. O fe ami so'da beuk.

⁹ Nai lelek, ami bei nai mamana ata, O ta la'oela ami fa. O taom-ma mane Persia-la sue-lai ami, ma ala fe ami loak maso'da, fo ami mafofo'a falik O Umam fo, ela ka'da ai-batu mana tapasasalak ndia so. O masulu-mahapa ami nai ia, boema nai Yehuda ma nai Yerusalem.

¹⁰ Tehu besak ia, ou Manetualain, basa manada'dik ia soona, ami bisa mafa'da mae le'e? Ami ta tao tunga O paletam

¹¹ fo O fen neu ami, tunga basa nabi-la, fo O atam-mala. Lafa'da ami, lae dae fo ami sanga leon ndia, ta balisi fa, nanahu basa laun lala'en-na, neme pe'dak leo pe'dak neu, ala tao manggenggeok so.

¹² Nabi sila-la kena-ka'i ami, fo boso sao sese'do-babalik moo hataholi sila-la, do tulu-falis, fo lamasu'i-lakabete, ma so'da-molek. Metema, ami tunga soona, neukose ami da'di balakaik, ma ami mi'a mita dae ndia buna-boan, boema ami ba'e-bati elan, neu ami tititi-nonosim, losa dodoon-na.

¹³ Ami masala-masingo basa, ma ami la'olena O hoholo-lalanem, de O huku basa ami so. Tehu ami bubuluk, ou ami Amam Manetualain, O fe huhukuk-ka, belan-na ta nandaa no hata fo ami sipok-ka fa, nakalenak O bei malak soi-tefa-mala ami.

¹⁴ Da'di hapu nai bee, ami ta taoafik neu O paletam-mala so'on, ma ami sao sese'do-babalik moo hataholi mangalauk sila-la? Metema ami taon soona, tao leo bee-o, neukose O mamanasa manseli, nalosa O tao mamopo-mamate la'iesak ami, fo O ta po'ilotak hataholi esa boen, bisa naso'da fa.

¹⁵ Amak, fo Israel Manetualain-na. O ndoos ma matetuk, tehu, leomae leondiak boe, O po'ilotak ami maso'da. Ami manaku ami salam-ma neu O; ami ta manuu hak, soaneu mai leo O matam-ma mai fa.”