EZRA 7 - Susula Malalaok Hehelu Palak Ma Hehelu Beuk

Ezra losa Yerusalem

¹ Teuk lamalala basa boema, nai lelek Artahsasta paleta Persia, boema hapu touk esa na'de Ezra, fo ana da'di neme Imam Matuaina Harun-na, tititi-nonosin mai. Tititi-nonosin-nala tuin neme dae leo lain neu nde ia: Ezra, Seraya, Azarya, Hilkia

² Salum, Zadok, Ahitub,

³ Amarya, Azarya, Merayot,

⁴ Zerahya, Uzi, Buki,

⁵ Abisua, Pinehas, Eleazar, Imam Matuaina Harum-ma.

^6-7 Ezra hataholi malelaina esa, de ana bubuluk ba'uk-ka, la'eneu Hoholo-lalanek, fo Israel Manetualain-na, fen neu Musa. Hu kande Ezra Manetualain-na ba'e-palan, de Ana fen basa hata fo ana noken. Mane Artahsasta paleta neu teu ka hitun-na, boema Ezra neme Babel leo Yerusalem neu, sama-sama no hataholi Israel bubuak esa, fo nde imam de'ubee, hataholi Lewi-la, manamakameek-kala, boema manamanea nai Manetualain Uman-na, lelesuinan-na, ma basa manatao bela-ba'uk-kala.

^8-9 Ala la'oela Babel ndek hataholi Yahudi-la bula ka esa, fain esa, boema no Manetualain tutulu-fafalin, de hataholi Yahudi-la bula ka lima, fain esa, boema ala losa Yerusalem.

¹⁰ Ezra tao la'iesak dudu'a-aafin neu palisak besa-besa no, Manetualain Hoholo-lalanen, ana tao tungan, boema nanoli basa nakeketuk lala'en-na no nakaneneten-nala, neu leoina Israel-la.

Susula teu netek fo, Mane Artahsasta fen leo Ezra neu

¹¹ Susula teu netek fo, Mane Artahsasta fen leo Ezra, fo imam esa, ma malelaina nai hoholo-lalanek dalek-ka, isin-na nae leo ia

¹² “Nanafek neme Mane Artahsasta neu Ezra, fo malelaina nai Manetualain, fo manakoasa nai nusa so'dak-ka, hoholo-lalanen.

¹³ Au fe paleta, ae basa Imam, hataholi Lewi, ma hataholi Israel fe'ek manai au nusang dale lala'en-na, fo nahiik neu leo Yerusalem neu, au po'is la'o loo Tolanook-ka.

¹⁴ Nana, au ma au manamanoli-mafa'da hitung-ngala, madenu Tolanook-ka neu leo Yerusalem ma Yehuda neu, fo palisak matalolole, tao leo beek, ma mete, ade Manetualain Hoholo-lalanen, fo ala fen neu Tolanook-ka, tete'ek-ka ala tao tungan do ta.

¹⁵ Au o au manamanoli-mafa'dang-ngala, nau tunu-hotu lilopilas ma lilofulak fe Israel Aman Manetualain, fo manaleo nai Yerusalem-ma Da'di ho'i meni ami tunu-hotum ndia leona.

¹⁶ Boeo ho'i meni basa lilopilas ma lilofulak fo Tolanok-ka makabubuas neme Babel lala'en-na, ma basa tutulu-fafalik neme leoina Israel-la, ma imam-mala fo soaneu sila Manetualain Uman manai Yerusalem-ma.

¹⁷ Pake doik sila no malolen-na, fo asa sapi mane, bi'ilopo mane, bi'ilopo ana, gandum ma angol. Tunu hotu basa sila-la nai mei tunu-hotuk lain, nai Manetualain Uman manai Yerusalem-ma.

¹⁸ Tolanook-ka bole pake bei ela lilofulak ma lilopilas-sala soaneu Tolanook-ka ma Tolanook-ka tia-lain paluun-na, nandaa no Tolanook-ka Manetualain-na hihii-nanaun.

¹⁹ Fe basa bua-lo'as fo ala fen neu Tolanook-ka lala'en-na, neu Manetualain nai Yerusalem, soaneu mamasok-ka nai Manetualain Uman.

²⁰ Ma basa paluu fe'ek lala'en-na, soaneu Manetualain Uman-na, Tolanook-ka bole moke neme kas nusak-ka mai.

²¹ Neu basa manaito-ato nusak-ka kas manai propensi Efrat Muli, au fe paleta, fo ela su'di beek, fo Imam Ezra, fo malelaina nai Manetualain, fo manakoasa nai nusa so'dak-ka Hoholo-lalanen-na, noke soona, fen no lai-laik,

²² fen losa dede'uk ia: lilofulak kilo losa lifun telu natun haa, gandum kilo losa lifun sanahulu, angol litel losa lifun dua, mina zetun litel losa lifun dua, ma fen masik, nandaa no paluun-na.

²³ Ho'i nakeketuk besa-besa, nai sadia basa hata lala'en, fo Manetualain manakoasa nai nusa so'dak-ka noken, soaneu Uman-na, fo ela boso namanasa au do hataholi mananggati au-a.

²⁴ Emi basam-mala, ta bole susu bea neme imam-mala, hataholi Lewi-la, manamakameek-kala, manamanea lelesuina-la, do su'di see fo Manetualain Uman-na hataholin.

²⁵ Tolanook Ezra, pake manatee-tenok fo, Manetualain fe basan neu Tolanook-ka so, fo so'u mauli-malangan, ma manakee-manafula-la, fo ala paleta basa hataholi manai propensi Efrat Muli, fo laso'da tunga Tolanook-ka Manetualain-na, Hoholo-lalanen. Ela leo ben-na, Tolanook-ka manoli Hoholo-lalanek ndia, neu basa hataholi fo, ala beita bubuluk-kana fa.

²⁶ Hataholi see, fo ana ta tunga Tolanook-ka Manetualain-na hoholo-lalanen do nusak-ka hoholo-lalanen fa soona, muse hukunisan lai-lai, do tu'u-tapa henin, do loso-ma, hata-heton, do hukun.”

Ezra koa-kio Manetualain

²⁷ Boema Ezra nae, “Koa-kio Manetualain fo ita bei-ba'i kain-nala, sene-do'ok-ka! Ana nakababale basa manek-ka dalen-na, nalosa ana nau taoafik neu ka'da Manetualain Uman-na nai Yerusalem.

²⁸ No Manetualain tutulu-fafalin, de manek-ka, manamanoli-mafa'dan-nala, manapaleta fo manakoasa sila-la, dalen-nala lahiik au; Au Amang Manetualain fe au manggate so, nalosa au hapu leleko ala mane leo Israel ba'u-ba'uana, de ala fali leo Yerusalem leu.”