EZRA 5 - Susula Malalaok Hehelu Palak Ma Hehelu Beuk

¹ Nai lelek ndia nabi dua fo nde, Hagai ma Zakharia fo Ido anan-nala, ala mulai kokolak pake Israel Manetualain-na na'den-na, neu hataholi Yahudi fo manaleo manai Yehuda ma manai Yerusalem-mala.

² Lamanene nabi ka duak sila-la hala hehelun-na boema, Zerubabel fo Sealtiel anan-na, ma Yesua fo Yozadak anan-na, no lai-laik, ala mulai lafofo'a falik Manetualain Uman manai Yerusalem-ma, de nabi ka duak sila-la tulu-falis.

³ Tehu Tatnai, fo filana nai Efrat Muli, ana sama-sama no Syetar-Boznai, ma tia-lain-nala lai-lai leo Yerusalem leu, de latane hataholi Yahudi-la lae, “See kande nadenu emi, fo mafofo'a Uma Mamasok ia, ma sadia-ma hata-heton lala'en-na lamadai?”

⁴ Sila boeo latane basa hataholi manafalis, fo lapadedeik Manetualain Uman ndia, na'den-nala.

⁵ Tehu Manetualain taoafik, ma nasulu-nahapa mauli-malanga Yahudi sila, nalosa basa manapaleta Persia-la laketu, fo ala ta ho'i nakakeketuk hata esa boen, metema ala beita haitua fe Darius susulak, fo ala hapu hala natataa na fa.

⁶ Hala nafa'dak fo ala haituan leo Manek-ka neu-a nae leo ia,

⁷ “Neu Mane Darius-sa. Ela leo been-na, Ama Manek paleta no so'da molek!

⁸ Ela leo been-na, Ama Manek bubuluk, mae ami meu leo propensi Yehuda meu so, de ami mita Manetualain Fo Matuaina Uman-na, lafofo'a falik-kana, nenik batu matuaina mesa-mesan, ma lapadedeik tama seluk ai neu papala nanadaman-nala. Ala tao besa-besa loo bela-ba'uk ndia, de ta nakakai fa, ma lai-laik.

⁹ Basa boema, ami matane basa leoina ndia, mauli-malangan-nala mae, See kande po'i emi, fo mafofo'a falik Uma Mamasok ndia, ma sadia-na, basa hata-heton lala'en-na lamadai.

¹⁰ Ami boeo matane sila na'den-nala, fo ela ami fe hala nafafa'dak neu Ama Manek, see kande nalanga nai bela-ba'uk ndia.

¹¹ Boema lataa lae, ‘Ami ia, Manetualain manakoasa lalai ma daebafak-ka, atan. Besak ia, ami mafofo'a falik Manetualain Uman, fo Israel mane matua-mademan esa, napadedeik-kana, de ana sadia-na, basa hata-heton lala'en-na lamadai, ndek teu-teuk makahulun eli.

¹² Tehu, hu kande ami bei-ba'i kaim-mala, ala tao lakananasak Manetualain fo mana koasa nai nusa so'dak-ka, boema Ana fe henis leo Nebukadnezar, fo mane Babel-la, ana da'di neme Kasdim tititi-nonosin mai. Ana tao nakalulutuk Uma ndia, ma ana foo neni ami leoinam-ma, leo Babel neu.

¹³ Basa boema, Kores da'di manek nai Babel, de ana paleta neu teu makasososan-na boema, ana kalua paleta fo nafofo'a falik Manetualain Uman ndia.

¹⁴ Nakalenak bai, ana fe falik bua-lo'a lilopilas ma lilofulak, fo paken nai Manetualain Uman dale, ma Nebukadnezar ho'i neni bua-lo'as-sala leme Yerusalem mai, de ana pe'das leo lamatua daebafan-na uman manai Babel-la dalek neu. Mane Kores-sa, ana fe bua-lo'as sila-la leo hataholi mana'de Sesbazar, fo ana so'u basan da'di filana nai Yehuda so.

¹⁵ Manek-ka nadenun, fo ana ho'i-na bua lo'as sila-la fo fe falik-kasa leo Manetualain Uman-na, nai Yerusalem, boema nafofo'a falik Uma ndia.

¹⁶ Boema Sesbazar neu leo Yerusalem neu, de ndia nde tao Manetualain Uman ndia laten-na batu makasososan-na. Neme lelek ndia mai, losa besak ia, Uma ndia tataon-na la'ok nakandoo, tehu beita basa fan boe.’

¹⁷ Metema Ama Manek po'i soona, ami mafa'da ami hahapum-ma, fo ela palisak matalolole nusak-ka susula makahulun-nala, nai Babel. No enok ndia, bisa nanabubuluk, ade tete'ek-ka, hapu Mane Kores-sa paletan, soaneu nafofo'a falik Manetualain Uman manai Yerusalem ia do ta. Basa soona, ami moke fe ami halak, la'eneu Ama Manek nakeketun, la'eneu dede'ak ndia.”