EZRA 3 - Susula Malalaok Hehelu Palak Ma Hehelu Beuk

Makaluku-makatele mulai seluk

¹ Nai hataholi Yahudi-la, bula ka hitun-na boema, hataholi Israel-la, ala leo lahele nai esa-esak kotan-na. Nai bulak ndia fain esa boema, lakabubua nai Yerusalem,

² boema Yesua, fo Yozadak anan-na, boema nonoon-nala fo nde basa imam-mala, ma Zerubabel, fo Sealtiel anan-na ma tolanoon-nala, lafofo'a falik Israel Manetualain-na, mei tunu-hotun. No enok ndia, ala hapu tunu tutunu-hohotuk nai lain, fo nandaa no natutu'du-natutu'duk fo nanasulak nai Manetualain atan Musa, susula hoholo-lalanen dale.

³ Leomae ala bii nusak ndia laun-nala, tehu lafofo'a mei tunu-hotuk ndia neu mamana makasososan-na boe. Boema, ala mulai fe seluk tutunu-hohotuk nanatunuk, nai fai fafain-na ma le'donoson-na.

⁴ Sila boeo tao feta Fai Matua Lalaa Akidook-ka, nandaa no nakanenetek-ka; ma tunga faik, ala fe tutunu-hohotuk, fo nananaketu basak soaneu faik ndia.

⁵ Fe'ek neme ndia mai boe, ala fe tutunu-hohotuk nanatunuk tunga matetun-na, boema tutunu-hohotuk nai Fai Malole Bula Beuk, ma nai basa fai malole fe'ek fo ala taon, soaneu sene-do'ok neu Manetualain. Sila boeo tunu-hotu tutunu-hohotuk, fo ala fe no dale hihii-nanau mesan-nala neu Manetualain.

⁶ Leomae ala beita mulai lafofo'a falik Manetualain Uman-na fa, tehu nai hataholi Yahudi-la bula ka hitu-a fain esa, boema laun-na mulai tunu tutunu-hohotuk soaneu Manetualain.

Mulai lafofo'a Manetualain Uman-na

⁷ Laun-na fe doik fo bae tuka batu ma tuka ai-la ngga'din-na. Boeo ala haitua nana'a-nininuk, ma mina zetun leo kota-kota manai Tirus ma Sidon neu, fo ala tuka neu ai kaiou Libanon neme kota-kota sila-la mai. Leni ai sila-la leo Yafo, tunga tasi lai. Nanahu Kores, fo mane Persia nde fe laun-na loak, soaneu tao basa sila-la.

⁸ Boema neu hataholi Yahudi-la bula ka dua-na, fo nai lelek hataholi Israel-la fali ma'is leo Yerusalem mai nai teu ka dua-na, boema ala mulai lafofo'a falik Manetualain Uman-na. Zerubabel, Yesua no nonoon fo sila leoina esa, ma basa imam-mala, hataholi Lewi-la, dede'a keke'un-na, basa hataholi nanafoo haik-kala, ala tunga tao bela-ba'uk ndia. Ala hele hataholi Lewi, fo teun duahulu leo lain neu, fo lanea hataholi manalafofo'a Manetualain Uman-na ndia.

⁹ Boema Yesua fo hataholi Lewi ndia, no anan-nala ma tolanoon-nala, ma Kadmiel (fo teidale-bobongi Hodawya) no anan-nala sama-sama lanea hataholi manalafofo'a Manetualain Uman-na ndia. Hataholi Lewi maneme teidale-bobongi Henadad-ta lanea falis.

¹⁰ Lelek tuka uma-la mulai lafofo'a Manetualain Uman-na laten-na, boema basa imam-mala pake ba'du manalu no ala ho'u pupuuk, fo langatuuk leu esa-esak mamanan. Hataholi Lewi-la leme teidale-bobongi Asaf-fa mai boeo, lapadeik lai ndia no ala ho'u meko anak-kala. Ala koa-kio Manetualain nandaa no nakanenetek fo nananaketu basak, ndek Mane Dauk-ka tepo-lelen-na.

¹¹ Laun-nala lakamee nakamee kokoa-kikiok ba'eneu Manetualain, no lakamee lakafafalik nakameek-ka mate'en-na, fo liin-na nae leo ia, “Manetualain ndia malole; ma susue-lalain neu Israel, matea-mahelek losa dodoon-na.” Basa laun-nala eeki-latadale, ma koa-kio Manetualain, nana ala tao Manetualain Uman laten-na so.

¹² Nai imam-mala dalek, hapu imam ba'uk-ka, ma hataholi Lewi-la ma mane leo-la, lasi-lasik-kala lita hai Manetualain Uma makahulun-na so. Lelek lita matan, ala tao Manetualain Uman laten-na fo besak-ka ala taon ia, boema ala kii-lapane'e. Tehu hataholi manai sila-la, ala eeki-latadale no namahokok,

¹³ nalosa ta bubuluk manaeeki-matadalek-ka nde see do manakii-makaleleuk-ka nde see fa. Halan-nala tanen-na seli, nalosa lamanenen losa dook-ka.