EZRA 10 - Susula Malalaok Hehelu Palak Ma Hehelu Beuk

Tutu'u fo, hahae saoana sese'do-babalik ndia

¹ Lelek Ezra hule-haladoi boema, ana kii ma ana manaku sala-singon nai Manetualain Uman-na matan-na, boema hataholi Israel makadotok nanseli, ala mai, de lakabubua, nau touk do inak, ma ni'iana boe. Ala okofeo-lan, boema ala dola-dola mesan.

² Basa boema, Sekhanya, fo Yehiel anan-na neme teidale-bobongi Elam-ma mai, nafa'da Ezra nae, “Ami masala-masingo neu Manetualain nanahu ami saoana hataholi neme leoina nusa dea mai. Leomae leondiak boe, bei hapu namahehenak ba'eneu Israel.

³ Mai fo ata soo-supa neu Manetualain, tae neukose ita usiheni basa ina fe'ek sila-la, sama-sama loo anan-nala. Neukose ami tunga o nanoli-nafa'dam lala'en-na, ma hataholi fe'ek, fo ala fe ha'da-holomata neu Manetualain paletan-nala, Neukose ami tunga Manetualain Hoholo-lalanen.

⁴ O nde muse ho'i nakeketuk. Neukose ami fali o, no dale katematuak. Ho'i nakeketuk no napalanik, losa babasan-na.”

⁵ Boema Ezra mulai ho'i nakeketuk. Nadenu malanga imam-mala, hataholi Lewi-la ma hataholi Israel fe'ek-kala soo-supa, lae neukose sila ta tunga, Sekhanya hahapun ndia so'on.

⁶ Ala soo-supa basa boema, Ezra fo'a neme Manetualain Uman-na matan-na mai, de neu leo Yohanan, fo Elyasib anan-na, kaman dale neu, fo ana sungu neme ndia. Ana ta nau na'a-ninu fa, nanahu dalen-na he'dis-sa, no ka'da ana dudu'a-dodoo hataholi nanafook sila-la, tatao-nono'in.

⁷ Basa boema, nai Yerusalem, ma Yehuda, paleta esa nanapo'a-bengak, neu basa hataholi manafali ma'is leme mamana tu'u-tapak mai, fo ela lakabubua lai Yerusalem.

⁸ Ba'eneu see, fo nai faik telu dalen-na, ana ta mai fa soona, neukose ala sita-la basa hata-heton lala'en-na, ma ala ta sipok-kana da'di laun so'on. Mauli-malanga laun-nala, limalee paleta ndia.

⁹ Basa faik telu, fo hataholi Yahudi-la, bula ka sion-na fain duahulu boema, basa touk manaleo nai nusa Yehuda, ma Benyamin-na, ala mai leo Yerusalem mai, de lakabubua lai Manetualain Uman so'dan-na. Nai lelek ndia, udaina mai. De basa hataholi-la dele bengge'be, nanahu makalenik-ka, ma boeo, nanahu nakabuak ndia sosoa-ndandaan ba'un-na seli.

¹⁰ Basa boema, Ezra fo'a napadeik, de ana kokolak nos. Nafa'da nae, “Emi basa-basam-mala, masala-masingo so, de emi popo-tama seluk Israel salan-na, nanahu emi sao ina leoina nusa dea.

¹¹ Hu ndia de, manaku emi sala-singom neu Manetualain fo ita bei-ba'i kain-nala sene-do'ok-ka, ma tao hata fo, nanda no Manetualain dalen-na. Madook emi aoinam-ma, neme hataholi nusa dea, fo manaleo nai ita nusan-na, ma usiheni basa saoinak maneme nusa dea sila.”

¹² Boema, hataholi sila-la lataa lapane'e lae, “Neukose ami tunga o hala-kokolam ndia.”

¹³ Boema, lafa'da seluk lae, “Tehu, hataholi manai ia-la, makadotok nanseli, ma u'dan-na, ba'uk-ka nanseli. Ami ta makatatakak mapadeik nai deak leoiak fa. Bai te, dede'ak ia, ta bisa naketun nai faik esa do dua dalen-na fa, nana ami hataholim makadotok nanseli, lai sala-singok ia dalek.

¹⁴ Fe basa ami mauli-malangam, fo manaleo nai Yerusalem-mala loak, fo ala ito-ato dede'ak ndia. Boema metema, hataholi manai ami kotam-mala, saoinan-na neme nusa dea mai soona, muse ana mai nai fai nananaketuk-ka, sama-sama no basa mauli-malangan, ma manakee-manafula, manai esa-esak kotan-na. No enok ndia, neukose Manetualain ta namanasa ita so'on, hu kande dede'ak ndia.”

¹⁵ Basa hataholi-la sipok tutu'u enok ndia, te ka'da Yonatan, fo Asael anan-na, ma Yahzeya, fo Tikwa anan-na, ta sipok fa, nana hataholi Lewi dua, fo nde Mesulam ma Sabetai, look-kasa.

¹⁶ Hataholi nanafook fo, manafali ma'is sila-la, latea lahele, fo sanga lakalala'ok tutu'u enok ndia, hu ndia de, Imam Ezra, ana hele hataholi de'ubee nai mane leo-la dalek, fo ala sulak-la na'den-nala. Nai hataholi Yahudi-la, bula ka sanahulun-na, fain esa, boema ala mulai lakabubua, fo ala palisak matalolole dede'ak ndia.

¹⁷ Ala palisak basa touk manasao inak neme nusa dea mai, bulak telu dalen-na, besak-ka laketun.

Basa hataholi manasao inak neme nusa dea mai

¹⁸ Hataholi manasao inak neme nusa dea mai-a, susulan-na nde ia: Basa Imam-mala, nanasulak no teidale-bobongin-nala: Teidale-bobongik Yesua no tolanoon-nala, Yozadak anan-nala: Maaseya, Eliezer, Yarib ma Gedalya

¹⁹ Laheluk lae, neukose ala elaheni saoinan-nala, boema ala tunu-hotu bi'ilopo mane, soaneu tutunu-hohotuk, fo sila sala-singon hapu do'o do ampon.

²⁰ Teidale-bobongik Imer-ra: Hanani ma Zebaja.

²¹ Teidale-bobongik Harim-ma: Maaseya, Elia, Semaya, Yehiel ma Uzia.

²² Teidale-bobongik Pasyhur-ra: Elyoenai, Maaseya, Ismael, Netaneel, Yozabad, ma Elasa.

²³ Hataholi Lewi-la: Yozabad, Simei, Kelaya (boeo loken lae Kelita), Petahya, Yuda ma Eliezer.

²⁴ Basa manamakameek-kala: Elyasib. Basa manamanea lelesuina manai Manetualain Uman-na: Salum, Telem ma Uri.

²⁵ Hataholi Israel fe'ek-kala: Teidale-bobongik Paros-sa: Ramya, Yezia, Malkia, Miyamin, Eleazar, Malkia, ma Benaya.

²⁶ Teidale-bobongik Elam-ma: Matanya, Zakharia, Yehiel, Abdi, Yeremot, ma Elia.

²⁷ Teidale-bobongik Zatu-na: Elyoenai, Elyasib, Matanya, Yeremot, Zabad ma Aziza.

²⁸ Teidale-bobongik Bebai-a: Yohanan, Hananya, Zabai ma Atlai.

²⁹ Teidale-bobongik Bani: Mesulam, Malukh, Adaya, Yasub, Seal ma Yeramot.

³⁰ Teidale-bobongik Pahat-Moab-pa: Adna, Kelal, Benaya, Maaseya, Matanya, Bezaleel, Binui ma Manasye.

^31-32 Teidale-bobongik Harim-ma: Eliezer, Yisia, Malkia, Semaya, Simeon, Benyamin, Malukh ma Semarya.

³³ Teidale-bobongik Hasum-ma: Matnai, Matata, Zabad, Elifelet, Yeremai, Manasye ma Simei.

^34-37 Teidale-bobongik Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai,

^38-42 Teidale-bobongik Binui-a: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya ma Yusuf.

⁴³ Teidale-bobongik Nebo: Yeiel, Matica, Zabad, Zebina, Yadai, Yoel, ma Benaya.

⁴⁴ Basa hataholi sila-la, ala sao inak neme leoina nusa dea mai. Boema ala elaheni saoinak sila-la, de ala usihenis, sama-sama loo anan-nala.