ESTER 9 - Susula Malalaok Hehelu Palak Ma Hehelu Beuk

Hataholi Yahudi-la la'ban musun-nala

¹ Mate'en-na nai hataholi Yahudi-la bula Adar-ra, fain 13, ana losa, fo nde fai nananaketuk soaneu lakalala'ok manek-ka paletan neu hataholi Yahudi-la. Faik ndia nde leoina Yahudi-a musun-nala lahanin, fo ala koasa leoina ndia. Tehu se'kona, hataholi Yahudi-la nde sengis-sala.

² Hataholi Yahudi-la lakabubua, de ala teik esa-dalek esa lai basa kota lala'en-na, fo leu sapu-la basa hataholi fo lape'da dale mangalauk neus-sala. Leoina-la su'di nai bee boe, ala bii lanseli loo hataholi Yahudi-la, nalosa ta hapu hataholi esa boen, napalani nasasalematak no fas.

³ Lena-lenak, basa hataholi matua-madema manai propensi-la, basa gobelnol-lala, bupati ma basa manaho'u paleta nusak-ka, look hataholi Yahudi-la, nanahu basa-basas bii-lamata'u neu Mordekhai.

⁴ Basa hataholi manai nusak-ka lala'en-na, ala bubuluk lae Mordekhai maneni-mafa'dak nai uma manek-ka, ma boetai nanuu koasa boe.

⁵ Leondiak leoina Yahudi-a tao su'di bebe'ik-ka neu musun-nala, ma leni tafaina, fo leu sapu-lalas, boema taolisas.

⁶ Hataholi Yahudi-la taolisa hataholi natun lima nai Susan fo nusak-ka polon-na.

^7-10 Nai dalek hapu Hamedata ana manen Haman, anatou ka 10-nala, fo hataholi Yahudi-la musu matuainan-na. Haman anan ka 10-n sila-la nde: Parsandata, Dalfon, Aspata, Porata, Adalya, Aridata, Parmasta, Arisai, Aridai, ma Waizata. Tehu hataholi Yahudi-la ta bonga uma fa.

¹¹ Nai faik ndia boe, hataholi nafa'da manek-ka, hataholi nanataonisak nai Susan-na, dede'un-nala.

¹² Boema manek-ka nafa'da Ina Manek Ester-ra nae, “Nai Susan mesak-kana, hataholi Yahudi-la taolisa hataholi natun lima nai Susan mesak-kana, de nai dalek, hapu Haman ana tou ka 10-nala boe. Te beita leke manai propensi fe'ek-kala fa! Ta bubuluk ala tao hata nai naa fa! Na, besak ia, o moke seluk beek bai? Ka'da mafa'dan leona, te tao leo bee-o, neukose o hapun!”

¹³ Boema, Ester nataa nae, “Metema Ama Manek nau soona, ela leo been-na, hataholi Yahudi manaleo nai Susan ia, po'i fes balahaa fafaik soona, ala bole tao seluk hata fo ala taon nai faik ia. Nakalenak, ela leo been-na, lona Haman ana ka 10-nala popolan-na neu dii lolonak lain.”

¹⁴ Boema, manek-ka fe paleta, fo lakalala'ok Ester nonoken-na; susulak paleta soaneu kota Susan-na, de ala lona Haman ana ka 10-nala, popolan-na.

¹⁵ Da'di nai hataholi Yahudi-la bula Adar-ra, fain 14 boema, hataholi Yahudi manai Susan-nala lakabubua seluk, de ala taolisa hataholi natun telu seluk nai kota ndia. Ma oek ia boeo, ala ta bonga uma fa.

¹⁶ Hataholi Yahudi fo manaleo nai propensi-la boeo, lakabubua basa soaneu lasala'e aoinan-nala. Ala sengi musun-nala, ma ala taolisa hataholi manalape'da dalek loos ala 75.000. Tehu ala ta bonga uma fa.

¹⁷ Manda'dik ndia, ana da'di nai hataholi Yahudi-la bula Adar-ra fain 13. Balahaa, fo nai bulak-ka fain 14, ala ta taolisa hataholi esa boen, te ala tao lalalao faik ndia no namahokok.

¹⁸ Tehu hataholi Yahudi manai Susan-nala, ala tao lalalao bula ka fain 15, fo da'di neu fai matua, nana ala taolisa musun-nala neu bula ka fain 13 ma 14, boema ala hahae nai bulak-ka fain 15.

¹⁹ Hu ndia de, hataholi Yahudi fo manaleo nai kota anak-kala, ala tao bula Adar-ra fain 14, da'di fai nasanene'dak, da'di leo fai namahokok, faik soaneu feta-dote, boema esa fe esa bua palsen, nalupa nana'a-nininuk.

Fai Malole Purim

²⁰ Basa ndia boema, Mordekhai sulak-na basa manda'dik sila-la, ma ana haitua susulak leo basa hataholi Yahudi manai nusa Persia lala'en-na, nau manai dook-kala, do manadek-kala boe.

²¹ Susulak ndia isin-na paleta nae, tunga teuk soona, tao feta nai bula Adar-ra fain 14 ma 15.

²² Nana nai faik sila-la nde ala sengi sila musun-nala, nalosa sila dale he'din ma dale susan-na, nasafali da'di namahokok ma maua-manalek. Hu ndia de, ala muse tao feta soaneu faik sila-la, fo la'a-linu sama-sama, boema esa fe esa nana'ak, ma ala fe hataholi nuu taa-hata taak-kala bua palsen.

²³ Hataholi Yahudi-la tunga Mordekhai paletan ndia, de tunga teuk ala tao feta ndia, da'di feta ha'dak.

Susula ka isi mate'en-na

²⁴ Haman, fo Hamedata anan-na, neme Agag bobongin-na mai, hataholi Yahudi-la musu matuainan-na, ana tu'u basa batu so, fo loke tu'u batu ndia soona lae “purim” boe, fo laketu faik bee, ala do'dolisa hataholi Yahudi-la; ana tutu'u basa, soaneu tao namopo-namate hataholi Yahudi-la so.

²⁵ Tehu Ester neu leo manek-ka neu, fo manek-ka fe susula paleta, de susulak ndia tao-na Haman dale tutu'u mangalaun-na, la'e seluk-kana, nalosa no anan-nala nanalonak nai dii lolonak-ka.

²⁶ Hu ndia de, loke fai-fai matua sila-la lae Purim. Hu kande Mordekhai susulan-na, ma basa hata fo hataholi Yahudi-la la'ola'din ndia,

²⁷ nininin-na, ala tao nakanenetek esa, ba'eneu sila, ba'eneu sila tititi-nonosin, ma ba'eneu basa hataholi fo neukose, ala masok leoina Yahudi-a. Tunga nakanenetek ndia, de tunga teuk soona, sila muse tao feta nai faik ka duak fo Mordekhai naketu basak-ka so.

²⁸ Boeo naketu nae, losa dodoon-na, muse ta bole nafandele heni Purim fain sila-la fa; ma basa teidalek Yahudi-a, neme bobongik leo bobongik neu, nai basa propensi ma kota-la, tao feta nai faik ndia.

²⁹ Boema Ina Manek Ester, fo Abihail anan-na, ana sulak susulak, sama-sama no Mordekhai susulan-na boe; Ester susula ka duan ndia, ana tao natea-nahele Mordekhai susulan-na isin fo la'eneu, Purim ndia.

³⁰ Susulak ndia nanahaituak neu basa hataholi Yahudi-la, ma ala haitua susulak-ka salinan-na, neu basa nusa Persia, propensi ka 127-nala. Susulak ndia sama-sama no huhule haladoik, fo ela leoina Yahudi-a so'da molek ma dalen-nala tesa-tama tataas esa.

³¹ Nai susulak ndia dalek boeo nafa'da, fo ela sila loo sila bobongin-nala, la'e fain-na soona, tao fai nasanene'dak neu fai Purim-ma, sama leo sila tao fai nasanene'dak nai lelek okaaok-ka, ma nai lelek ala susa. Mordekhai ma Ina Manek Ester-ra, susulan-na isin-na nde ndia.

³² Ester paletan fo naketu Purim-ma nakanenete nala, nanasulak nai susulak dale.