ESTER 8 - Susula Malalaok Hehelu Palak Ma Hehelu Beuk

Leoina Yahudi-la hapu paleta fo la'ban musun-nala

¹ Nai faik ndia, Mane Ahasyweros-sa, ana fe basa Haman, fo hataholi Yahudi-la musu matuainan ndia, hata-heton lala'en-na leo Ina Manek Ester-ra neu. Ester nafa'da manek-ka nae Mordekhai nde been-na, ndia tolanoo daen ndia, boema mulai faik ndia, Mordekhai hapu hak, fo leomae beita naloo fan-o, bole neu nataa manek-ka.

² Boema manek-ka o'du-na, ndelin fo ana ho'i falik-kana neme Haman mai-a, de ana fen leo Mordekhai neu. Ma Ester so'u Mordekhai da'di manakoasa neu Haman hata-heton.

³ Basa ndia boema, Ester neu seluk leo manek-ka neu. Ana senek, boema ana kii ma ana dokodoe, fo ela manek-ka boso pake dale tutu'u mangalauk fo Haman tutu'un, soaneu hataholi Yahudi-la.

⁴ Manek-ka natu'du aitete'e lilopilan-na leo Ester neu, boema Ester fo'a de nae,

⁵ “Metema Ama Manek nau, ma sue-lai atam-ma soona, ela leo been-na, Ama Manek kalua susula paleta, fo boso pake Haman susulan fo isin-na paleta soaneu tao namopo-namate la'iesak hataholi Yahudi manai nusak ia.

⁶ Da'di, tao leo bee fo, atam-ma bole mete, ala do'do lisa la'iesak atam-ma leoinan-na, ma tolanoo ka'a-fa'ding-ngala?”

⁷ Boema, Mane Ahasyweros-sa nafa'da Ina Manek Ester-ra, ma Mordekhai nae, “Memak au lona basa Haman so, nanahu ana sanga tao namopo-namate hataholi Yahudi-la, ma au fe hata-heton leo Ester neu.

⁸ Tehu susulak fo, nanasulak pake manek-ka na'den-na, ma nanacap nenik cap manek-ka, ta bisa hela falik-kana fa. Tehu au po'i emi, bole sulak susulak, la'eneu leoina Yahudi-a, su'di beek fo emi meten malole. Sulak susulak ndia pake au na'deng-nga, ma cap-pana menik nusak-ka cap-pa.”

⁹ Nai faik ndia boe, fo nai hataholi Yahudi-la bula ka telun-na, fo nde bula Siwan-na, fain 23 boema, Mordekhai naloo basa manek-ka hataholi manasulak susulan-nala, de ana paletas, fo ala sulak susulak fe basa Gobelnol-la, basa bupati-la, ma propensi ka 127-kala hataholi matua-mademan-nala, neme India losa Sudan. Sulak susulak sila-la, tunga propensi-la esa-esak dede'an-na, ma susula de'en-nala. Ana haitua susulak ndia leo hataholi Yahudi-la, nai hataholi Yahudi-la dede'an-na, ma susula de'en-na boe.

¹⁰ Mordekhai lima lee susulak sila-la, pake Mane Ahasyweros-sa na'den-na, ma ana cap nenik nusak-ka cap-pa. Boema, Mordekhai nadenu hataholi-la, sa'e leni manek-ka ndala manggafan-nala, fo leni susulak sila-la, leo nusak-ka propensin-nala leu.

¹¹ Susulak sila-la, liin-na nae manek-ka, po'i hataholi Yahudi manai kota lala'en-na, fo ala teik esa-dalek esa, ma lasala'e aoinan-nala. Metema, hataholi manaho'u tafa-sisilo-la, ala mai leme leoina ma su'di propensi bee mai boe, fo ala sapu-lalas soona, ala bole la'ban-nasa, ma ala bole taolisa hataholi manasapu-nalas sila, loo saoinan-nala, ma anan-nala; ala bole do'do lisa la'iesak sila musun sila-la, boema, ala bole loso-la hata-heton-nala.

¹² Muse nakalala'ok paleta ndia, nai basa nusa Persia lala'en-na, nai faik fo Haman naketu basan, soaneu taonisa hataholi Yahudi-la, nai hataholi Yahudi-la bula ka 12-na, fo nde bula Adar-ra, fain 13.

¹³ Muse kalua susula paleta ndia, da'di leo susula nakeketuk, ma po'a-bengan neu basa hataholi manai basa propensi-la, fo daenga hataholi Yahudi-la lanea matalole, fo metema faik ndia losa soona, ala la'ban sila musun-na.

¹⁴ Boema, ladenu hataholi sila-la, ala sa'e-la manek-ka ndalan-nala, de ala la'o leona. Ala lees susula paleta ndia, nai Susan fo nusak-ka polon-na boe.

¹⁵ Basa ndia boema, Mordekhai kalua la'oela uma manek-ka, no ana pake papake matua-madema momo'dok, ma fulak, ba'du manalu pilabalanggeok-ka neme tema abalutu-a mai, ma bulamolik lilopilas-sa, mana'ahiik nanseli. Kota Susan-na eeki-latadale, nanahu lamahoko lanseli.

¹⁶ Hataholi Yahudi-la, dalen-nala loa-loak mesan, ma lamahoko, laua-lanale ma lamahoko.

¹⁷ Boeo, nai basa kota ma propensi-la, su'di nai bee boe, fo ala lees manek-ka susula paletan-na soona, hataholi Yahudi-la lamahoko, dalen-nala loa-loak mesan, ma ala tao feta-dote. Nakalenak bai, laun ba'uk-ka masok leo leoina Yahudi dale leu, nanahu ala bii-lamata'u neu leoina ndia.