ESTER 7 - Susula Malalaok Hehelu Palak Ma Hehelu Beuk

¹ Boema soaneu ka la'i dua-na, manek-ka ma Haman la'a-linu sama-sama loo Ester.

² Bei linu-linu loo angol-la, te manek-ka natane seluk Ester nae, “Na, au Ina Maneng-ngonei, O hii beek? Soona mafa'dan leona! Te tao leo bee-o, neukose au fe, leomae o moke au nusang-nga seli boe.”

³ Boema Ina Manek Ester-ra, nataa nae, “Metema Ama Manek nau soona, atam-ma dokodoe, fo ela atam-ma, ma atam-ma leoinan-na bole laso'da.

⁴ Nana atam-ma, ma atam-ma leoinan-na nananase'o basak soaneu taolisas so. Leounik-ka, ka'da lase'o ami, fo ala tao ami da'di ata soona, neukose atam-ma denge-denge, fo ta tao tasi'bu Ama Manek fa. Tehu besak ia, neukose ami nanatao namopo-namatek, fo mopo ami na'dem-ma nai daebafak-ka!”

⁵ Boema Mane Ahasyweros-sa, natane Ina Manek Ester-ra nae, “Se kande, napalani tao leondiak-ka? Hataholi ndia, nai bee?”

⁶ Boema Ina Manek Ester-ra nataa nae, “Haman, fo dale mangalauk ndia nde ana musu, ma ana fepa-li'u ami-a!” Haman nanganalo manek-ka, ma ina manek-ka no bibii-namata'uk nanseli.

⁷ Manek-ka namanasa nanseli, boema ana fo'a la'oela mei-a, tuti'ka ana leo deak neu, de neu leo uma manek-ka osin dale neu. Haman bubuluk, nae manek-ka ho'i basa nakeketuk soaneu hukun so, hu ndia de, ana leo nahele no Ina Manek Ester-ra, soaneu ana dokodoe, fo ela Ester soi-tefan.

⁸ No ketu namahehenak, Haman bala aoinan-na neu Ester pepe'un lain, soaneu noke do'o do ampon, tehu nandaa no li'u ndia boe, manek-ka fali ma'in neme uma manek-ka osin dale mai. Manek-ka nita Haman tao leondiak boema, nafa'da nae, “Beek ia? Ana bei napalani hohonge ina manek-ka nai ia, fo nai au matang, ma nai au uma maneng-nga?” Manek-ka kokolak basa nae leondia tutika, manaho'u paleta-la mai, de ala popoti ketu Haman mata-panan.

⁹ Boema Harbona, fo hataholi esa neme hataholi manaho'u paleta sila-la, nae, “Ama Manek, hapu dii lolonak esa, deman-na metel duahulu dua, deka no Haman uman-na. Haman napadedeik basan, soaneu lona Mordekhai, hataholi fo manasoi-tefa-na Ama Manek so'dan-na.” Boema, manek-ka fe paleta nae, “Lona Haman neu dii ndia leona!”

¹⁰ Haman nanalonak neu dii fo napadedeik basan soaneu Mordekhai-a, leondiak. Basa ndia boema, besak-ka manek-ka nasa-melun tenak.