ESTER 6 - Susula Malalaok Hehelu Palak Ma Hehelu Beuk

Manek-ka fe ha'da-holomata neu Mordekhai

¹ Nai le'odaek ndia boe, manek-ka ta hapu sungu fa. Hu ndia de, noke ho'i fen susulak fo, ala sulak nusak-ka tutuin-na nai dalek-ka, de nadenu hataholi, fo ana lees-sana.

² Ana lees hapun, ala sulak-kana nai dalek, lae Mordekhai nafa'da basa hataholi-la nae, Bigtan ma Teres sanga enok, fo taolisa manek-ka. Duas hapu bela-ba'u hehelik, fo nde lanea manek-ka kaman-na.

³ Boema, manek-ka natane nae, “Ha'da-hololamata, ma tatao-nono'i malole beek kande nanafe basak neu Mordekhai ndia so?” Boema, malalau-maoonon-nala lataa lae, “Ana ta sipo hata-hata esa boen.”

⁴ Boema manek-ka nae, “Au hataholi mana'a ngga'ding see kande, besak ia nai uma manek-ka?” Ndia te, la'e Haman besak-ka masok-nala uma manek-ka so'dan-na; ana sanga noke manek-ka fen loak, fo ana lona Mordekhai, neu dii lolonak fo nananapadedeik basak ndia so.

⁵ Boema malalau-maoono sila-la lataa manek-ka lae, “Haman nai uma manek-ka, de ana nau natongon-no Ama Manek.” Boema manek-ka nae, “Madenun leo dalek mai.”

⁶ Lelek Haman mai boema, manek-ka nafa'dan nae, “Hapu hataholi fo au sanga fen ha'da-holomata matua. Ade, neukose au tao beek soaneu hataholi ndia?” Haman dodoo nai dalen dale nae, “Manek-ka sanga fe ha'da-holomata matua ndia, neu see bai? Tao leo bee-o, au so!”

^7-8 Hu ndia de, nataa nae, “Ela leo been-na, ho'i fe hataholi ndia papake matua-madema, fo biasa Ama Manek paken. Boema balias Ama Manek ndalan-na nenik nusak-ka dedeon-nala.

⁹ Nusak-ka hataholi matua-mademan esa neme leo manefetoana mai soona, muse pake papakek ndia neu hataholi fo, Ama Manek sanga fen ha'da-holomata ndia, boema fe hataholi ndia, sa'e Ama Manek ndalan-na, fo ana la'o-la'o tunga kota moo maloan-na. Hataholi matua-madema ndia, neukose ana la'ok nai uluk, boema naloo bou-bou nae, ‘Manek-ka fe ha'da-holomata neu hataholi fo ana fen ha'da-holomata, leoiak!’ ”

¹⁰ Boema, manek-ka nafa'da Haman nae, “Lai-lai muu ho'i-ma papakek ma ndala ndia, fo fe ha'da-holomata ndia lala'en-na neu Mordekhai, fo hataholi Yahudi ndia. Taon sama leo naka'sa au afa'dak ndia, boso kulang esa boen. O hapu matongo moon bei nangatuuk nai uma manek-ka lelesu inan-na matan-na.”

¹¹ Boema, Haman ho'i-na bua-lo'as ma ndala ndia, de ana pake bua-lo'as ndia neu Mordekhai. Lelek Mordekhai sa'e-nala ndala ndia lain boema Haman la'o-la'o noon tunga kota moo maloan-na, ma naloo bou-bou nae, “Mitak, manek-ka fe ha'da-holomata neu hataholi fo ana fe ha'da-holomata neun-na, leoiak!”

¹² Basa ndia boema, Mordekhai fali ne'un leo uma manek-ka lelesu inan-na neu. Tehu Haman fali lai-lai. Ana ta nau hataholi nita fan, nanahu ana mae nanseli, boema ana poti ketu mata-panan.

¹³ Ana tui saoinan-na, ma nonoon-nala, hata fo ana la'ola'din. Basa boema, saoinan-na ma nonoon fo manatee tenok sila-la, lafa'dan lae, “O balakaim-ma ta dai Mordekhai fa. Ndia hataholi Yahudi, de neukose o ta hapu la'ban-nana fa. Tao leo bee-o, ana sengi o.”

Haman nanahuku nisak

¹⁴ Lelek ala bei kola-kola loo Haman te, manaho'u paleta manai uma manek-ka, no lai-laik ala mai, fo sanga loo Haman leo Ester fetan-na neu.