ESTER 5 - Susula Malalaok Hehelu Palak Ma Hehelu Beuk

Ester ka'i manek-ka no Haman, fo leu leo fetan-na leu

¹ Neu fai okaao ka telun-na boema, Ester pake papake ina manen-na, de neu leo uma manek-ka so'dan manai dalek-ka, de napadeik neu lelesu manek-ka matan-na. Manek-ka nangatuuk nai kandela manek lain, de nasale leo lelesu ndia neu.

² Lelek nita Ina Manek Ester-ra napadeik nai deak, boema ana sue seluk-kana, de natu'du aitete'e lilopilan-na neun. Boema Ester leo mata neu, de ana koi la'e aitete'ek ndia pedan-na.

³ Basa boema, manek-ka natane nae, “Te beek, au Ina Maneng-ngonei? O nau beek? Mafa'da leona! Leomae o moke au nusang-nga seli boeo, neukose au fe o boe.”

⁴ Boema, Ester nataa nae, “Metema Ama Manek nau soona, ela leo been-na le'odaek ia, Ama Manek ma Haman mai leo feta, fo atam-ma taon, soaneu Ama Manek.”

⁵ Boema manek-ka nae, madenu Haman, fo ana mai lai-lai, fo ela ala tao latetu Ester hala nonoken-na. Boema leu leo Ester tao feta ndia leu.

⁶ Nai lelek linu angol, boema manek-ka natane Ester nae, “Besak ia, mafa'da hata fo o mahiik-kana. Hata fo o moken, neukose au fe, leomae au nusang-nga seli boe!”

⁷ Boema, Ester nataa nae,

⁸ “Metema, Ama Manek nau sipok atam-ma dokodoen-na soona, ela leo been-na Ama Manek ma Haman, mai seluk leo feta fo balahaa le'odae atam-ma taon. Mahani te, nai feta ndia, neukose atam-ma nafa'da atam-ma dokodoen-na neu Ama Manek.”

Haman nape'da dalek, sanga taonisa Mordekhai

⁹ Haman fali neme Ina Manek Ester-ra fetan-na, no dale namahokok nanseli. Tehu nai lelek, ana losa uma manek-ka lelesu inan-na boema, nita Mordekhai ta fo'a fo nate'a fan, de namanasa nanseli.

¹⁰ Tehu nakatatakak dalen-na, de ana fali leo uman neu. Ana losa uma boema, nadenu nonoon-nala, leu lafa'da saoinan Zeres, fo ana mai nangatuuk nau-nau nos.

¹¹ Boema, Haman tui fes tutui me'i-afek, ma ana koao nenik su'i-beten, ana toun makadotok, ana hapu nangatutuu madema neme manek-ka mai, ma ndia nangatutuun-na, dema lena hataholi mana'a ngga'di fe'ek-kala.

¹² Boeo nae, “Lena-lenak, Ina Manek Ester-ra boeo, ana ka'i ka'da au ma manek-ka, leo feta fo ana taon soaneu ami, ma balahaa le'odae soona, ana ka'i seluk ami.

¹³ Tehu basa sila-la sosoa-ndandaan ta, metema au bei ita Mordekhai, fo hataholi Yahudi ndia, nangatuuk nai uma manek-ka lelesu inan-na.”

¹⁴ Lamanene dede'ak ndia boema, saoinan-na ma nonoon-nala lafa'dan lae leo ia, “Ka'da madenu ala tao-la dii lolonak esa, deman-na metel duahulu dua. Boema balahaa fafaik soona, moke manek-ka, fo ana po'i o lona Mordekhai neu dii ndia. No enok ndia, o hapu muu leo feta ndia, no o dalem-ma tesa-tama.” Tunga Haman hahapun-na soona, nonokek ndia malole nanseli, hu ndia de, no lai-laik nadenu hataholi-la, fo ala tao dii lolonak ndia.