DANIAL 8 - Susula Malalaok Hehelu Palak Ma Hehelu Beuk

Danial ninitan la'eneu bi'ilopo mane ma bi'ihi mane

¹ Mane Belsyazar-ra paleta neu teu ka telun-na boema, au hapu ninita ka dua.

² Nai ninitak ndia dalek, au ita au nai propensi Elam, nai Sudan fo nusa Persia polon-na. Au apadeik deka Lee Ulai

³ de nai lee ndia su'un-na, au ita bi'ilopo mane esa susulan 2 manaluina, de esa nalu lena ma beuk neme esak-ka mai.

⁴ Au ita bi'ilopo mane ndia, ana puka nasale leo muli, kii ma kona neu. Ta hapu bana esa boen, bisa nakatatakak nasasalematak no fan, do nala koasan-na deak fa. Ana tao tunga ka'da dale hihiin-na, ma ana da'di manakoao-ndaeaok.

⁵ Lelek au bei meten te, au ita bi'ihii mane esa, nalai-nalai mesan neme muli mai tunga daebafak-ka poin-na. Nalaik nakamiu, nalosa ein-na ta deta dae-a fa. Nai matan duas tala'da, hapu susulak esa namanalu.

⁶ Bi'ihii mane ndia neu deka no bi'ilopo mane fo au itan nai lee ndia su'un-na, boema no nasa-melun, neu sapu-nan.

⁷ Au taoafik ahelen neu sapu-na bi'ilopo mane ndia. Nasan-na mangalau nanseli, nalosa ana puka nala'di heni bi'ilopo mane ndia susulan duas. Bi'ilopo mane ndia balakain ta soaneu ana la'ban-nana. Ana fepa neu dae, boema bi'ihii mane ndia heheta-aa'in, tehu ta hapu hataholi esa boen, neu tulu-fali fan.

⁸ Bi'ihii mane ndia boetai namatuak-ka. Tehu lelek ana losa koasan-na mate'en-na boema, la'di heni susula matuainan ndia, boema susulak mata beuk 4, ala moli nai mamanak ndia, de esa-esak natu'du leo mamana fe'ek neu.

⁹ Susula anak esa moli neme susulak sila-la esa mai, boema ana da'di matuaina nanseli, de koasan-na namaloa leo kona, leo dulu ma leo dae fo maoe-maisik-ka neu.

¹⁰ Susulak ndia boetai namatuak-ka, losa balakain-na dai soaneu sapu-na solda'du nusa so'dak-kala fo nde nduuk-kala, nakalenak ana tapa nggelok leo dae lain neu, de ana heheta-aa'is.

¹¹ Nakalenak naheek no solda'du nusa so'dak-kala malangain manai lain-na, ma ta bole tunu-hotu tutunu-hohotu su'di faik fo ala tunu-hotu fen neu malanga solda'du manai lain ndia, ma ana tao natu'u uma mamason-na.

¹² Boema hataholi manai naa-la mulai lasala-lasingo, ma ala ta tunu-hotu tutunu-hohotuk fo muse ala fen ndia fa. Boema, ana lokopilo heni uma makaluku-makatele matetuk-ka neu dae lain. Susulak ndia tatao-nono'in lala'en-na neni buna-boak.

¹³ Basa boema, au amanene ata nusa so'dak-kala, esa nafa'da esa nae, “Basa hata fo nananitak nai ninitak ndia dalek-ka, neukose ana da'di losa faihi'da? Sala-singo matuaina ndia, ana nggati tutunu-hohotu su'di faik-ka losa faihi'da? Ana heheta-aa'i solda'du nusa so'dak-kala ma uma mamasok ndia losa faihi'da?”

¹⁴ Au amanene ata nusa so'dak esa seluk nataa nae, “Losa faik 1.150 seluk. Nai lelek ndia, ala ta fe tutunu-hohotu le'donosok ma tutunu-hohotu fafaik fa. Basa ndia soona, besak-ka uma mamasok-ka neukose nanatao matalololek.”

Ata nusa so'dak Gabrial-la nafa'da mangalele'do ninitak ndia sosoa-ndandaan

¹⁵ Lelek au bei sanga enok soaneu bubuluk ninitak ndia sosoa-ndandaan te, no kaiboik, au ita hata esa sama-na leo hataholi daebafak-ka, napadeik nai au matang-nga.

¹⁶ Au amanene halak-ka naloo bou-bou nai Lee Ulai selik nae, “Gabrial, Mafa'da mangalele'do fen, ninitan ndia.”

¹⁷ Boema Gabrial fo napadeik nai au matang-nga ndia, ana mai deka no au. Au bii anseli, nalosa au bala u. Gabrial nafa'da au nae, “Hai hataholi daebafak manasapu-manalalok-konei, o muse bubuluk te, ninitak ndia nde been-na la'eneu tepo-lelek mate'ek-ka.”

¹⁸ Lelek ana bei kola-kola te, au sapala'o. Tehu ana ho'u au de nafofo'a fali au, fo au apadeik falik. Boema nafa'da nae,

¹⁹ “Au sanga afa'da o hata fo neukose ana da'di nai fai makabuin, hu ka nde Manetualain nasa-melun. Nana o ninitam ndia, natu'du leo tepo-lelek mate'ek-ka neu.

²⁰ O mita bi'ilopo mane fo nanuu susulak 2 ndia, nakasasaman-na nde nusa Media ma nusa Persia.

²¹ Bi'ihi mane ndia, nakasasaman-na nde nusa Yunani-a, ma susulak fo namanalu nai matan duas tala'da ndia, nde manen makasososan-na.

²² Susula ka haak fo ala to'da mai nai lelek susula makasososan-na la'din ndia, sosoa-ndandaan nae nusa Yunani-a, neukose nanababa'ek da'di nusak 4, tehu ta hapu esa boen, balakain-na sama leo nusa makasososak ndia fa.

²³ Sanga losa nusak sila-la mate'en-na, ma tatao-nono'i mangalauk-ka henu daebafak-ka soona, neukose manek esa langa batuk ma malela tipu-daik, ana to'da mai.

²⁴ Neukose balakain-na seli, tehu ta hu kande be'i-balakai mesan-na fa. Neukose neni momopo-mamatek fo bibii namata'uk matuaina, ma hata fo ana tao-no'in, neukose neni buna-boak. Neukose ana tao namopo-namate hataholi mabe'i-balakai lea-la, ma Manetualain anan-nala.

²⁵ Nanahu dudu'a-aafin talimo'dis, ma tipu-dain-nala neni buna-boak. Neukose ana koao-ndaeao, ma ana beita fe nakahuluk nasanene'dak fa te, neukose ana tao namopo-namate hataholi makadotok. Nakalenak napalani la'ban Manek Fo Matuaina. Tehu neukose nanatao nakalulutuk ta nenik hataholi daebafak be'i-balakain fa.

²⁶ Ninitak la'eneu tutunu-hohotu le'donosok ma fafaik fo nananafa'da mangalele'do basak neu o ndia, tete'ek-ka neukose ana da'di. Tehu basa sila-la, neukose ala da'di nai fai manamaik-ka fo bei dook-ka; da'di boso tui hataholi esa boen.”

²⁷ Basa boema, au ame'da au aong-nga male, boema au amahe'di faik de'ubee dalen-na. Basa ndia boema, au fo'a de au tao-no'i seluk au bela-ba'ung soaneu manek-ka. Tehu au hela-hae no dudu'a-dodoo ninitak sila-la, tehu au ta alak sosoa-ndandaan fa.