DANIAL 7 - Susula Malalaok Hehelu Palak Ma Hehelu Beuk

DANIAL TUI NINITAN-NALA 7:1–12:13 Danial ninitan la'eneu bana ka 4 kala

^1-2 Le'odaek esa fo nai teu makasososan-na, lelek Belsyazar da'di manek nai Babel, au, Danial alame'i ma hapu ninitak. Au sulak-ka me'is ndia ma hala nafafa'dak la'eneu au ninitang ndia nde ia: Anin-na nasak-ka neme basa bu'uk lala'en-na mai, nalosa ani sangu da'di nai tasi maloaina.

³ Basa boema, bana matuaina 4, esa-esak lupan, ala to'da leme oe dale mai.

⁴ Bana makasososak-ka, lupan-na sama leo singa, tehu nanuu manupui garuda li'dan-na Lelek au anganalon boema, no kaiboik li'dan-na nanafe'ahenik de natapo'i; nanandoo eik neme dae lain mai, de napadeik natetu nai eik 2 lain, sama leo hataholi-a.

⁵ Bana ka dua, lupan-na sama leo beruang-nga. Napadeik nenik ei buin-na, ma ana kaa neni kaisu duik 3 nai nisin-nala tala'da. Au amanene halak-ka nafa'dan nae, “Ayo, mu'a paa su'di bebe'ik-ka leona!”

⁶ Lelek au bei taoafik neun te, bana fe'ek esa to'da mai. Lupan-na sama leo macan tutul-la, tehu hapu manupui li'dak 4, nai muliha'in-na, ma langan 4. Meten soona, maneni-mafa'dak.

⁷ Lelek au bei meten te, bana ka 4 to'da mai. Bana ndia be'in-na seli, boema nakatata'u. No nisi matuainan fo tean-na leo besi-a, ana hengu nakalulutuk nana'an-na fo na'a, ma na'a ela ba'u bee soona, ana heheta-aa'in. Bana ia fe'ek neme bana makahuluk-kala mai, nana susulan 10.

⁸ Lelek au bei taoafik neu susulan-nala te, no kaiboik susula fe'ek esa moli nai susulan sila-la tala'da. Susulak ndia anak-ka, tehu ana hapu seseti ma ana fe'a heni susulak 3 neme susula makasososak-kala mai. Susula anak ndia nanuu matak sama leo hataholi-a matan-na, ma bafan-na kokolak dede'a me'i-afek no koao-ndaeaok.

Ninitak la'eneu Ndia fo so'dan-na manaketu basa tak

⁹ Lelek au bei mete akandoo te, lapadedeik kandela manek de'ubee. Boema Ndia fo so'dan-na manaketu basa taak-ka, nangatuuk nai kandela manek sila-la esa lain. Bua papaken-na ma langadoon-na fula balisi sama leo a'bas-sa. Kandela manen-na no kandelan-na ein-na pila lo'a-lo'a, nanahu ha'i pilak-ka,

¹⁰ ma ha'i-a nasalolo'de neme kandela manek ndia mai. Hataholi lifu-lifun lalalau-laoonon, ma hataholi duta-duta lapadeik lai matan-na. Basa boema, mulai buka sidang nakeketuk-ka, ma susulak-kala nanabukak.

¹¹ Lelek au bei mete te, au bei amanene susula anak ndia kokolak dede'a me'i-afek no koao-ndaeaok. Basa boema, bana ka 4 ndia nanataonisak, de ala tapa popolan-na leo ha'i dale neu, de ha'i na'a henin.

¹² Bana fe'ek-kala koasan-na nanafe'a henik so, tehu bei fes loak laso'da losa faik fo nananaketu basak so.

¹³ Nai au ninitang le'odaen ndia, au ita hata esa sama leo hataholi daebafak-ka. Ana mai no ko'as-sa okofeo-na, boema neu leo Ndia fo so'dan-na manaketu basa taak-ka neu, fo nalelelaok non.

¹⁴ Ndia nanafe ha'da-holomata ma koasa, da'dileo manek-ka, nalosa hataholi-la leme basa leoina, ma dede'ak lala'en-na mai, lamahele neun. Koasan-na nakatata'kak losa dodoon-na, ma paletan-na neukose ta nanaloli henik fa.

Ninitak sila-la nananafa'da mangalele'dok

¹⁵ Au ita ninitak sila-la, leni napangamak ma ala tao-la au daleng-nga ta tesa-tama fa.

¹⁶ Boema, au u deka o hataholi esa nai hataholi manamapadeik mani sila-la, de au oken nafa'da mangalele'do basa sila-la lala'en-na. Boema nafa'da.

¹⁷ Nafa'da nae, “Bana ka haak matuaina sila-la nde, neukose nusak 4 to'da mai nai daebafak-ka.

¹⁸ Tehu Manetualain Fo Mademaina, anan-nala neukose sipo hak soaneu paleta ma paletan-nala neukose lakatatakak losa dodoon-na.”

¹⁹ Basa boema, au hii bubuluk bana ka 4, fo lupan-na ta sama no fe'ek-kala sila, sosoa-ndandaan; bana fo nakatata'u ma manatao nakalulutuk ma na'a nana'an-na nenik eifanga litin-na ma nisi besin-na, boema na'a ela soona, ana heheta-aa'in.

²⁰ Boeo au hii bubuluk la'eneu susula ka 10-n manai langan-na, ma la'eneu susula anak fo ana moli nakabuik, boema ana fe'a heni susulak 3 neme susula makasososak-kala mai ndia. Susula anak ndia mamatak ma mabafak, fo ana kokolak dede'a me'i-afek no koao-ndaeaok. Ndia nakatata'u lena heni susula fe'ek sila-la.

²¹ Lelek au taoafik-kana, susula anak ndia natee-nata'ti la'ban Manetualain anan-nala de ana sengis.

²² Basa boema, Ndia fo so'dan-na manaketu basa tak ndia Ana mai, boema Ana fe nakeketuk de Ana fe ndoos neu Manetualain Fo Mademaina anan-nala. Fain-na losa ala sipo koasa, soaneu ala paleta.

²³ Au hapu hala nafa'da mangalele'dok-ka nde ia: “Bana ka haak sila-la nde nusa ka haak fo neukose lapadeik nai daebafak-ka, ma neukose ta sama no nusa fe'ek-kala fa. Nusak ndia neukose ana tao nakalulutuk, ma na'a heni basa daebafak-ka lala'en-na, ma ana heheta-aa'i bei elak-kala.

²⁴ Susula ka 10-k sila-la nde, mane ka 10-k fo neukose ala paleta nusak ndia. Basa soona, mane fe'ek esa neukose ana to'da mai; ndia fe'ek nanseli neme mane-manek makasososak-kala mai, ma neukose ana sengi manek 3.

²⁵ Neukose ana kokolak la'ban Manetualain Fo Mademaina, ma ana tuni-ndeni Manetualain anan-nala. Neukose ana sanga enok, fo ana nggati heni hoholo-lalanek, ma Manetualain anan-nala agama-na fai malolen-nala, ma neukose ana koasas teuk telu seselik.

²⁶ Boema manakee-manafula nusa so'dak-ka neukose ala tao sidang, fo fe'a heni koasan-na ma tao lakalulutuk-kana losa mopo-maten.

²⁷ Basa nusak manai daebafak-ka lala'en-na koasan ma matua-mademan, neukose nanafek leo Manetualain Fo Mademaina anan-nala neu. Neukose sila koasan soaneu paleta, ta nate'e fa, ma basa manakoasa manai daebafak-ka neukose lamaheles ma ala tungas.”

²⁸ Hala nafafa'dak ia ba'u ka'da ndia. Au daleng-nga ta tesa-tama nanseli fa, nalosa au mata-panang fula, tehu au ta afa'da basa sila-la neu hataholi esa boen.