DANIAL 5 - Susula Malalaok Hehelu Palak Ma Hehelu Beuk

Mane Belsyazar fo Nebukadnezar anamanen-na tao feta

¹ Faik esa boema, Mane Belsyazar-ra ka'i hataholi matua-mademan lifun esa, fo ala mai leo ndia feta neulaun-na mai, fo linu angol.

² Lelek ala bei linu-linu te Belsyazar fe paleta fo leu ho'i-la mango lilopilas ma lilofulak fo aman Nebukadnezar loso nenis leme Manetualain Uman manai Yerusalem-ma dalek. Mane Belsyazar-ra dale dodoon-na nde bee soona, fo ela hataholi matua-madema-la saoinan-nala, sao ka dua ka telun-nala, ma ndia linu lenik mango sila-la.

³ Tuti'ka leni fen mango sila-la, de basa-basas linu lenik buas sila-la.

⁴ Linu-linu ma ala koa-kio lamatua daebafak fo nanataok neme lilopilas, lilofulak, liti, ai ma batu ndia mai.

⁵ No kaiboik, lita hataholi liman-na ana sulak hata esa nai uma manek-ka solosiun-na nai mamanak fo banuk-ka nasalaa la'en, nalosa manek-ka hapu nitan no mangale'dok.

⁶ Mata-panan fula ma ana bii nanseli, nalosa lungulangan-na dele ngge'be-ngge'be.

⁷ Ana nggasi ma noke fo ela leu laloo basa dukun-nala ma hataholi malela nduuk-kala. Lelek ala mai boema, manek-ka nafa'da nae, “Ba'eneu see fo ana hapu lees-nala susula liik ndia, ma nafa'da au sosoa-ndandaan soona, neukose au fen bua papake manek sama leo ba'du manalu ma lilopilas da'dileo ta'du-tana ha'da-holomata. Fe'ek neme ndia mai, neukose au so'un da'di manakoasa ka telu nai au nusang dale.”

⁸ Boema hataholi malelaina-la leu leo mata leu, fo ala lees susula liik ndia, tehu ta hapu sila esa boen hapu lees-nala susula liik ndia, do lafa'da-nala sosoa-ndandaan neu manek-ka fa.

⁹ Mane Belsyazar-ra dalen-na ta tesa-tama makandondook fa, ma mata-panan fula seluk; hataholi matua-mademan-nala boeo, lapangamak lanseli.

¹⁰ Ina manek-ka namanene manek-ka no hataholi matua-mademan ngganggasin ndia boema, neu leo mamana feta neu. Boema nafa'da nae, “So'da-molek ba'eneu Ama Manek losa dodoon-na! Makatetesak o dalem-ma Ama Manek, ma o mata-panam boso fula leondiak.

¹¹ Nana nai Ama Manek nusan dale, hapu touk esa henuk no lamatua daebafak malalao-malalafuk-kala duladalen-na. Nai lelek Ama Manek aman paleta, hataholi ndia nananitak dodole da'uk ma malelak sama leo lamatua daebafak-ka malelan-na. Ama Manek aman Nebukadnezar so'u basan da'di malangan neu basa dukun-nala, hataholi malelaina-la, ma hataholi malela nduuk-kala so.

¹² Hataholi ndia malelan-na seli, ma manatee-tenok, ma malelak nai nafa'da mangalele'do me'is-sa, nafa'da mangalele'do bibila-babaan ma naketu-nala'di nalelak dede'a mateaina-la. Na'de Danial, tahu manek-ka foin na'de Beltsazar. Maloon, te neukose nafa'da Ama Manek susula liik ia sosoa-ndandaan.”

Danial nafa'da mangalele'do susula liik ndia sosoa-ndandaan

¹³ No lai-laik, loo Danial neu nataa manek-ka. Boema manek-ka natanen nae, “Ade, o nde Danial, hataholi nanafook ndia, fo au amang foo ninin neme dae Yehuda mai hetu?

¹⁴ Au amanene lae, o henuk no lamatua daebafak malalao-malalafuk-kala duladalen-na, ma lae o dodole da'uk, ma malelaina nanseli.

¹⁵ Basa hataholi malelaina-la ma dukun-nala so'ba lees basa susula liik ia, ma lafa'da au sosoa-ndandaan. Tehu ala ta bisa fa.

¹⁶ Besak-ka au amanene lae, o bisa mafa'da-malak basa bibila-babaak lala'en-na, ma o maketu-mala'di-malak dede'a mateaina-la. Metema o hapu lees-malak susula liik ia, ma mafa'da au sosoa-ndandaan soona, neukose au fe o bua papake manek fo nalupa ba'du manalu ma lilopilas da'di neu ha'da-holomata. Fe'ek neme ndia mai, neukose au so'u o da'di manakoasa ka telu nai au nusang dale.”

¹⁷ Boema Danial nataa nae, “Ama Manek ta paluu fe au bua palsen sila-la fa, fen leo hataholi fe'ek neu. Neukose au lees fe Ama Manek susula liik ndia, ma au afa'da sosoa-ndandaan.

¹⁸ Manetualain Fo Mademaina, tao-na Ama Manek aman Nebukadnezar, da'di manek mandela-masa'ak, ma Ana fen matua-madema ma nananita-nalelak.

¹⁹ No matua-mademan ndia, nalosa hataholi-la leme basa leoina, leo ma basa dede'ak lala'en-na dele ma ala biin. Metema nahiik taonisa hataholi, soona, ka'da ana taonisa hataholi ndia. Metema ana nau fe so'dak neu hataholi esa soona, ana fe so'dak neu hataholi ndia. Ana so'u namadema do nakadadaek su'di see tunga hihii-nanaun.

²⁰ Tehu nai lelek ana koao-ndaeao, langa batu ma ana tao hataholi no dale susue-lalai tak boema, nanaloli henik neme kandela manen lain mai, nalosa mopo ndela-sa'an.

²¹ Nanausi henik neme hataholi daebafak-ka dalek mai ma dudu'a-aafin da'di sama leo bana-manu dudu'a-aafin. Naso'da no keledei fuik-kala, na'a na'u sama leo sapi-a, ma ana sungu nai moo maloa dale, de nakadoe dinis. Mate'en-na, ana manaku nae Manetualain Fo Mademaina koasa hataholi daebafak-ka nusan-na, ma Ana fe nusak ndia neu su'di see fo Ana helen.

²² Tehu anamanen-na, fo nde Ama Manek, ta nau nakaloe-nakadae aoinan-na fa, leomae Ama Manek nalelak basa dede'ak sila-la so.

²³ Ama Manek namatutua-namadedema aoinan-na soaneu Manetualain nai nusa so'dak-ka, ma Ama Manek napalani nadenu hataholi neni mango fo Ama Manek aman loso nenis neme Manetualain Uman dale mai, leo feta dale mai. Boema Ama Manek noo basa hataholi matua-madema-la saoinan-nala, ma sao ka dua ka telun-nala minu pake mango sila-la. Ama Manek koa-kio lamatua daebafak fo nanataok neme lilopilas, lilofulak, liti, besi, ai ma batu, lamatua daebafak fo ta hapu lita do lamanene do lalelak hata-hata ndia fa. Ama Manek ta fe ha'da-holomata neu Manetualain fo manamaketu-mala'di Ama Manek maso'dan-na ma mamaten-na.

²⁴ Hu ndia de, Manetualain haitua limak ndia mai, fo ana sulak hala hehelun-na.

²⁵ Susula liik nde ia, ‘Nanalekek, nanalekek, nanataik, nanaba'ek.’

²⁶ Ma sosoa-ndandaan nde ia, Nanalekek, Manetualain leke basa Ama Manek fai paletan-na so, de Ana fen nate'e;

²⁷ nanataik, Ama Manek nanatai basak so, de Ama Manek belan-na ta dai fa;

²⁸ nanaba'ek, Ama Manek nusan-na nanaba'ek, de nanafek leo hataholi Media ma Persia neu.”

²⁹ No lai-laik, Belsyazar paleta hataholi mana'a ngga'din-nala, fo ala pake Danial ba'du manalu pila balanggeok ma bokolii lilopilas neu botoliin-na. Boema ana so'u Danial da'di manapaleta ka telu nai ndia nusan dale.

³⁰ Nai le'odaek ndia boe, Belsyazar fo mane Babel ndia nanataonisak.