DANIAL 4 - Susula Malalaok Hehelu Palak Ma Hehelu Beuk

Nebukadnezar nalame'i neu ka la'i dua-na

¹ Mane Nebukadnezar-ra hala po'a-bengan fo ana haituan neu basa hataholi-la leme leoina-la, leo ma dede'ak manai daebafak-ka lala'en-na nde ia: “So'da-molek!

² Au ahiik tui la'eneu manada'di beuk, ma ta'du-tana matabeuk fo Manetualain Mademaina, Ana tao basan soaneu au so.

³ Ana tao manada'di beuk-ka matuaina nanseli! Ana tao matabeuk-ka anseli nanseli! Neukose Manetualain da'di manek losa dodoon-na. Koasan-na manaketu basa tak.”

⁴ Au leo-apalasa no so'da-molek nai au uma maneng dale, ma au aso'da no matetu-mandaak.

⁵ Tehu nai le'odaek esa, lelek au sungu, au alame'i ma au hapu ninitak, de ana tao-na au daleng-nga ta tesa-tama fa.

⁶ Boema au aloo basa hataholi malelak manai Babel-la fo lafa'da mangalele'do fe au me'is ndia sosoa-ndandaan.

⁷ Tehu lelek basa hataholi fo ala neuk hata fo neukose ana da'di nai fai manamaik-ka, dukun, hataholi malelak-kala, hataholi malelaina-la, ma basa hataholi malela nduuk sila-la ala mai, de au tuis au me'ing ndia, tehu ta hapu sila esa boen bisa nafa'da mangalele'do sosoa-ndandaan fa.

⁸ Mate'en-na, Danial fo loken lae Beltsazar boe, fo na'den-na sama leo au lamatua daebafang-nga na'den-na ndia, ana mai. Danial dalen-na henuk no lamatua daebafak malalao-malalafuk-kala duladalen-na. Au tuin au me'ing ndia boe ae,

⁹ “Hai, Beltsazar, fo hataholi malelaina-la mauli-malangan-na, au bubuluk ae o dalem-ma henuk no lamatua daebafak malalao-malalafuk-kala duladalen-na, nalosa ta hapu bibila-babaak nananafunik ba'eneu o fa. Nenene au me'ing-nga nde ia, fo mafa'da mangalele'do sosoa-ndandaan.

¹⁰ Lelek au sungu, boema au ita ai huuk esa, ana moli nai daebafak-ka tala'da heon.

¹¹ Ai ndia deman-na seli; ndanan-nala matuaina ma balakaik. Pe'dan-na losa lalai, nalosa basa hataholi manai daebafak-ka litan.

¹² Doon-na momo'doanak ma boan makadotok nanseli, de dai basa hataholi daebafak-ka lala'en-na la'a. Bana fuik-kala lu'u lai sa'on dale, ma manupui-la landunu nai ndanan-nala lain. Ma basa mahahaek lala'en-na hapu la'a boan-na.

¹³ Lelek au dudu'a-dodoo ninitak ndia boema, au ita ata nusa so'dak esa kona neme nusa so'dak-ka mai; meten soona, nono'kabai naheheleao ma nanea besa-besa.

¹⁴ Ana kokolak napane'e nae, ‘Lo'o heni ai ndia, fo ta'ti-ma ndanan-nala, makanunuku heni doon-nala ma tapa nggenggela-ngganggali boan-nala. Usi heni basa bana manalu'u nai sa'on dale-la, ma basa manupui mandunuk nai ndanan-nala lain.

¹⁵ Tehu huun fo nanalo'o elak-ka, nemen-na fo nahele neme dae dale. Pa'an nenik namosina besi ma liti fo la'oelan neme moo mana'uk-ka. Elan nemen-na fo nakadoe dinis, ma nakabubua no bana-manu ma na'u-aiana.

¹⁶ Ela nemen-na, fo dudu'a-aafi hataholin-na nasafali da'di dudu'a-aafi bana-manu, teuk 7 dalen-na.

¹⁷ Ami fo ata nusa so'dak manamanea besa-besa, ma mahehele aom-ma, nakeketun-na nde ndia. Ami dale dodoom-ma nde, fo ela basa hataholi su'di nai bee boe, ana manaku nae Manetualain Fo Mademaina nanuu koasa neu hataholi daebafak-ka nusan-na, ma Ana fe nusak ndia su'di neu see fo Ana helen, nakalenak neu hataholi fo leomae sosoa-ndandaan ta boe!’

¹⁸ Hai Beltsazar, au me'ing-nga nde ndia. Besak ia, mafa'da au sosoa-ndandaan leona. Ta hapu hataholi melelak esa boen nai au nusang-nga, bisa nafa'da mangalele'don neu au, tehu o bisa, nana o henuk no lamatua daebafa malalao-malalafuk-kala duladalen-na.”

Danial nafa'da mangalele'do me'is ndia sosoa-ndandaan

¹⁹ Danial fo loken lae Beltsazar boe, namanene dede'ak ndia boema, ana nggenge ma ana dodoo doak-kana. Boema au fo Mane Nebukadnezar-ra, afa'dan ae, “Beltsazar, o dalem-ma boso susa nanahu me'is ndia sosoa-ndandaan.” Boema Beltsazar nataa nae, “Ama Manek, malolen-na seli, metema leouni'ka me'is ndia neuk manada'dik-kala, tuni la'e Ama Manek musun-nala, te ta la'e Ama Manek fa.

²⁰ Ai fo Ama Manek nitak ndia, deman-na seli, nalosa pe'dan-na losa lalai, ma basa hataholi manai daebafak-ka lala'en-na bisa litan.

²¹ Doon-na momo'doanak, ma boan-na makadotok nanseli, nalosa dai basa hataholi daebafak-ka lala'en-na hapu la'a. Bana fuik-kala lu'u lai sa'on dale, ma manupui-la landunu lai ndanan-nala lain.

²² Hei Ama Manek, Ama Manek nde ai mademaina ma balakaik ndia. Ama Manek matua-mademan boeo, ana popo-tama losa lalai, ma Ama Manek koasan-na namaloa losa daebafak-ka pe'dan-na.

²³ Ama Manek boeo nita ata nusa so'dak esa kona neme nusa so'dak-ka mai de nafa'da nae, ‘Lo'o heni ai ia fo taomisan, tehu huun nanalo'o elak-ka, nemen-na fo nahele neme dae dale. Pa'an nenik namosina besi ma liti, fo la'oelan neme moo mana'uk-ka. Ela nemen-na fo nakadoe dinis ma nakabubua no bana-manu teuk 7 dalen-na.’

²⁴ Ama Manek, ninitan ndia sosoa-ndandaan nde ia, ma Manetualain Fo Mademaina nakeketun la'eneu Ama Manek-ka nde ia.

²⁵ Neukose Ama Manek nanausi henik neme hataholi daebafak-ka dalek mai fo maso'da nai bana-manu manai mook-kala tala'da. Nai teuk hitu dalen-na, Ama Manek na'a na'u sama-na leo sapi ma sungu nai moo maloa dale, nalosa Ama Manek nakadoe dinis. Basa ndia soona, neukose Ama Manek manaku nae Manetualain Fo Mademaina, koasa basa hataholi daebafak-ka nusan-nala, ma nusak ndia Ana fen neu see fo Ana helen.

²⁶ Basa ata nusa so'dak-kala fe paleta fo ela po'ilotak ai nanalo'o henik ndia huun-na neme dae dale. Ndia sosoa-ndandaan nae, neukose Ama Manek da'di manek seluk nai lelek Ama Manek makaheik mae Manetualain koasa basa daebafak-ka lala'en-na.

²⁷ Hu ndia de ela leo been-na Ama Manek tunga au nanoli-nafa'dang. Ama Manek boso boe tao sala-singok seluk bai, tehu tao-no'i hata fo malole ma ndoos ma matetuk, ma sue-lai hataholi nuu-taa hata-taak-ka. No enok ndia, neukose Ama Manek naua-nanale nahele.”

²⁸ Basa sila-la ala da'di neu Mane Nebukadnezar-ra.

²⁹ Bulak 12 makabuin-na, nai lelek au la'o-la'o eme au osing manai au uma maneng Babel-la ta'dan manai lain-na,

³⁰ boema au afa'da ae, “Mitak, kota Babel-la anseli! Au nde afofo'an da'di nusaina ia polon-na, fo ana da'di buti neu au koasang-nga, ma au be'i-balakaing, au mandela-masa'ang ma au matua-mademang!”

³¹ Au beita kokolak basa boen te, halak-ka nananamanenek neme lalai mai nae, “Mane Nebukadnezar, mamanene dede'ak-ka nde ia! O manuu koasa da'dileo manek-ka, nanaho'i-nak neme o mai so.

³² Neukose o nanausi henik neme hataholi daebafak-ka dalek mai, fo o maso'da moo bana-manu nai mook-ka. Nai teuk hitu dalen-na, neukose o mu'a na'u sama leo sapi-a. Basa ndia soona, neukose o makaheik mae, Manetualain Fo Mademaina nanuu koasa neu hataholi daebafak-ka nusan-na ma nusak ndia Ana fen leo su'di see fo Ana helen.”

³³ Nai hatematak ndia boe, dede'a-kokolan sila-la ala da'di. Au, Nebukadnezar nanausi henik neme hataholi daebafak-ka dalek mai, ma au u'a na'u sama leo sapi-a. Dinis-sa nakadoe au aong-nga, ma au langadoong-nga nalu manupui kakaka li'dan-na, ma au limafangang-nga nalu manupui-a eifangan-na.

Nebukadnezar koa-kio Manetualain

³⁴ Lelek basa teu ka hituk sila-la boema, au anganalo leo lalai u, boema au dudu'a-aafing fali ma'in. Boema au koa-kio Manetualain Fo Mademaina. Au so'u amadedeman ma au koa-kio Ndia fo maso'dak neme doon losa dodo-na ndia ae, “Neukose Manetualain da'di manek losa dodoon-na. Ana koasa neme doon losa dodo-na.

³⁵ Leoina manai daebafak-kala, sosoa-ndandaan ta. Manetualain koasa ata nusa so'dak manai nusa so'dak-ka ma laun manai daebafak-ka. Ta hapu hataholi esa boen, hapu la'ban hihii-nanaun fa, ta hapu hataholi natane, Ana tao beek fa.”

³⁶ Lelek au dudu'a-aafing fali ma'in boema, Ana fe falik au nusang-nga matua-mademan ma nananita-nalelan leo au mai. Au hataholi mana'a ngga'ding-ngala ma hataholi matua-mademang-ngala sipok au, de ala fe falik au leo au nusang-nga neu, nakalenak au matua-mademang namatua lena heni makahulun-na.

³⁷ Da'di besak ia, au fo Nebukadnezar, koa-kio ma au tao amadedema Mane Nusa so'dak-ka. Basa tatao-nono'in lala'en-na ndoos ma matetuk, ma nakadadaek hataholi manakoao-ndaeaok-ka.