DANIAL 3 - Susula Malalaok Hehelu Palak Ma Hehelu Beuk

Nebukadnezar po'i paleta fo laun-nala sene-do'ok neu dodoki-dudulak lilopilas-sa

¹ Faik esa boema, Mane Nebukadnezar-ra tao-na dodoki-dudulak esa, deman-na metel 27, ma loan-na metel 3. Napadedeik dodoki-dudulak ndia neu moo matetuk Dura, nai propensi Babel-la.

² Basa boema, naloo basa mane nusak-kala, basa nggobelnol-nala, bupati-la, nusaina manamanolin-mafa'dan-nala, manamakee-manafula-la, malela hoholo-lalanek-kala, ma basa malanga nusak-kala fo leu leo feta nakatema dodoki-dudulak fo ana tao-nak ndia.

³ Lelek basa-basas mai, de lapadeik leu dodoki-dudulak ndia matan-na boema,

⁴ solda'du manamanea manek-ka naloo bou-bou napane'e nae, “Tolano-tolanook fo maneme basa leoina, leo ma dede'ak lala'en-na lemin! Mamanene manek-ka paletan-na nde ia nae:

⁵ Metema pupuuk-ka nalii, fo basa soona kinuk-ka nalii, sasanu, labu, gambus, serdam, ma musik fe'ek-kala lalii soona, tolano-tolanook-kala muse sene-do'ok neu Mane Nebukadnezar-ra tao-na dodoki-dudulak lilopilas ndia.

⁶ Ba'eneu see fo ana ta tunga paleta ia fa soona, neukose tapan leo ha'i manafolokakaak dale neu tutik.”

⁷ Hu ndia de, lamanene musik sila-la lalii boema, hataholi maneme basa leoina, leo ma dede'ak lala'en-na sila, ala sene-do'ok dodoki-dudulak lilopilas ndia.

Ala kalaak Danial nonoon 3-s la'olena manek-ka paletan-na

⁸ Hataholi Babel de'ubee, ala pake fai loak ndia fo tao susa hataholi Yahudi-la.

⁹ Lafa'da Mane Nebukadnezar-ra lae, “So'da-molek ba'eneu Ama Manek losa dodoon-na!

¹⁰ Ama Manek po'i basa paleta mae metema musik-kala lalii tu'tik-ka basa hataholi-la muse sene-do'ok dodoki-dudulak lilopilas ndia,

¹¹ ma ba'eneu see, fo ana ta tunga paleta ndia fa soona neukose tapan leo hai manafolokakaak dale neu.

¹² Tehu Ama Manek fe hataholi Yahudi de'ubee, ala paleta lai Babel, ala ta tunga Ama Manek paletan ndia fa. Hataholi sila nde Sadrakh, Mesakh ma Abednego. Hataholi sila-la ta nau sene-do'ok neu Ama Manek lamatua daebafan-nala fa, ma ala ta nau sene-do'ok neu Ama Manek tao-na dodoki-dudulak lilopilas-sa boen.”

¹³ Manek-ka namanene dede'ak ndia boema, namanasa nanseli, de ana paleta fo leu lala hataholi ka teluk sila-la, fo mai lataa ndia.

¹⁴ Ala mai boema, manek-ka natanes nae, “Sadrakh, Mesakh ma Abednego! Tete'ek-ka, emi ta nau sene-do'ok neu au lamatua daebafang-ngala, ma emi ta nau sene-do'ok neu au tao-a dodoki-dudulak lilopilas ndia boe hetu?

¹⁵ Na, besak ia, metema musik-kala lalii soona, emi nau sene-do'ok neu dodoki-dudulak ndia do ta? Metema emi ta nau fa soona, neukose tapa emi leo ha'i manafolokakaak dale meu tu'tik. Fo lamatua daebafak bee kande, neukose napalani soi-tefa-nala emi neme au koasang-nga mai?”

¹⁶ Boema Sadrakh, Mesakh ma Abednego lataa lae, “Ama Manek fo mandela-masa'ak, neukose ami ta mapalani masala'e ami aoinam-ma fa.

¹⁷ Metema Manetualain fo ami sene-do'ok-ka napalani soi-tefa-nala ami neme ha'i manafolokakaak ndia dalek mai, ma neme Ama Manek koasan-na mai soona, tao leo bee-o Ana taon.

¹⁸ Tehu leomae Ana ta tao fan boe, ela leo been-na Ama Manek bubuluk te neukose ami ta sene-do'ok neu Ama Manek lamatua daebafan-na, ma sene-do'ok neu Ama Manek dodoki-dudula lilopilan ndia fa.”

Hukulisa Sadrakh, Mesakh ma Abednego

¹⁹ Boema, Mane Nebukadnezar-ra nasan-na lua ponu-ponu soaneu Sadrakh, Mesakh ma Abednego, nalosa mata-panan pila lo'a-lo'a. Ana paleta fo ala tao-la ha'i manafolokakaak ndia mahaan-na, nahaa la'i hitu lena neme mahaa biasan-na mai.

²⁰ Boema nadenu solda'du mabe'i-balakain de'ubee fo ala henge Sadrakh, Mesakh ma Abednego fo tapas leo ha'i manafolokakaak ndia dalek neu.

²¹ No lai-laik ala henge hataholi ka teluk sila-la loo bua papaken-nala lala'en-na, fo nde ba'du, ba'du manalu, ti'ilanga ma bua papake fe'en-nala, boema ala tapas leo ha'i manafolokakaak ndia dalek neu.

²² Hu kande manek-ka paletan ndia balakaik nanseli, boema ala tao-la ha'i manafolokakaak ndia nahaa nanseli, nalosa ana haa nisa hataholi manako'o Sadrakh, Mesakh ma Abednego leo ha'i manafolokakaak ndia matan-na neu.

²³ Boema hataholi ka teluk fo nanahenge nahelek sila-la, ala tu'da leo ha'i nafolokakaak ndia dalek leu.

²⁴ No kaiboik, Mane Nebukadnezar-ra nggenge nanseli. No lai-laik ana fo'a, de naloo bou-bou neu hataholi mana'a ngga'din-nala nae, “Ade, na'kasa ita henge hataholi 3, de tapas leo ha'i ndia dalek neu hetu?” Boema lataa lae, “Memak tete'ek-ka, Ama Manek.”

²⁵ Boema manek-ka nae, “Tehu tao le'e de au ita hataholi 4 beela'o nai ha'i ndia tala'da heon? Ta nanapa'ak-kala so'on, ma ta lame'da he'dis hata esa boen. Ma hataholi ka 4, mata-panan sama leo lamatua daebafak-ka.”

Ala po'i hataholi ka teluk sila-la de lasa'e nagatutuun-nala

²⁶ Boema Nebukadnezar neu de napadeik deka ha'i manafolokakaak ndia lelesun-na, ma naloo bou-bou nae, “Sadrakh, Mesakh ma Abednego, Manetualain Fo Mademaina, atan-nala lemin! Kalua meme ha'i manafolokakaak ndia dalek mai leon!” Boema ala kalua leona.

²⁷ Basa Manek-ka limaboa konan-nala, basa nggobelnol-lala, bupati-la ma hataholi mana'a ngga'di fe'ek-kala, okofeo-la hataholi ka teluk sila-la de ala mete litas ha'i manafolokakaak ndia ta koila'es faa anak boen. Ha'i-a ta na'a langa doon esa boen, ma bua papaken-nala beele'de, nakalenak ha'i boon-na boeo, ta la'e fas.

²⁸ Boema manek-ka nae, “Kokoa-kikiok ba'eneu Manetualain fo Sadrakh, Mesakh ma Abednego sene-do'ok-ka. Nadenu ata nusa so'dan-na mai soi-tefa-na ata ka telun fo lamahele neun ndia. Ala la'olena au paletang-nga so, de lahiik mate neme ala sene-do'ok do lamahele neu lamatua daebafak bee boe, te lamahele ka'da neu sila Manetualain mesak-kana.

²⁹ Hu ndia de, au paleta fo basa hataholi maneme leoina, leo do dede'ak beek boe, fo ana kokolak nakadadaek Manetualain fo Sadrakh, Mesakh ma Abednego sene-do'ok-ka soona, neukose tete'te-nan lutu-lutu ma tao natu'u uman-na fo taon da'di ai batu madodouk. Nana ta hapu lamatua daebafak bee boe, ana bisa tao hata fo Manetualain ndia tao basak-ka so.”

³⁰ Basa ndia boema, manek-ka nasa'e Sadrakh, Mesakh ma Abednego nangatutuun-nala, de ala da'di manapaleta matua-madema nai propensi Babel-la.