DANIAL 2 - Susula Malalaok Hehelu Palak Ma Hehelu Beuk

Nebukadnezar me'in-na

¹ Le'odaek esa, fo nai lelek Mane Nebukadnezar-ra paleta neu teu ka dua-na boema, nalama'i. Me'in ndia tao-na dalen-na he'di nanseli, nalosa ana ta hapu sungu so'on.

² Hu ndia de, naloo-na basa hataholi mananafa'da nalelak manda'di manamaik-kala, dukun-nala ma hataholi malela ina-la, fo lafa'da mangalele'do me'in ndia sosoa-ndandaan.

³ Lelek ala mai lataa boema, manek-ka nae, “Au alame'i, de au daleng-nga he'dis-sa nanseli, nanahu au hii bubuluk sosoa-ndandaan!”

⁴ Boema lataa lenik dede'a Aram lae, “So'dak ba'eneu ami manem-ma losa dodoon-na! Tui ami, me'is ndia leona, soona neukose ami mafa'da mangalele'do sosoa-ndandaan.”

⁵ Boema manek-ka nataa nae, “Au ho'i basa nakeketuk-ka nde ia nae, Emi muse mafa'da au me'is ndia, ma leondiak boe sosoa-ndandaan. Metema emi ta mafa'da-mala fan soona, neukose emi nanatete'tek ma neukose emi umam-mala nanatao natu'uk.

⁶ Tehu metema emi mafa'da-malan soona, neukose au fe emi bua-lo'a malole ma ha'da-holomata matuaina. Na, besak ia mafa'da au me'ing ndia sosoa-ndandaan leona!”

⁷ Boema lataa seluk lae, “Ela leo been-na, ami manem-ma tui makahuluk ami me'is ndia, fo basa ndia soona, neukose ami mafa'da mangalele'do sosoa-ndandaan.”

⁸ Manek-ka namanene dede'ak ndia boema nataa nae, “La'en la'iesak-kana sama leo au dale dodoong-nga. Emi ka'da makadodook fai-a, nanahu emi bubuluk mae au dodoo

⁹ soaneu huku emi basa-basam-mala nenik huhukuk matak esa, metema emi ta mafa'da-mala me'is ndia sosoa-ndandaan neu au fa. Emi malahalak fo masapepeko-masandandali au nakandoo, ma emi makamiminak au nenik emi mamahehena, neukose au asafali au nakeketung-nga. Na, mafa'da me'is ndia sosoa-ndandaan, fo au bubuluk ae emi boeo bisa mafa'da mangalele'do me'is ndia sosoa-ndandaan.”

¹⁰ Boema hataholi malelaina sila-la lataa lae, “Nai basa daebafak-ka lala'en-na, ta hapu hataholi esa boen, bisa nafa'da-nala hata fo ami manem-ma nahiik ndia. Ma beita hapu manek esa boen, leomae matuaina ma mandela-masa'an ba'un-na seli boe, noke dede'a leondiak-ka neme hataholi mananafa'da nalelak manda'dik manamaik-ka, dukun-nala ma hataholi malelaina manai uma manen-na fa.

¹¹ Ami manem-ma nahiik hata esa, tean-na seli. Ta hapu hataholi esa boen, bisa tao natetu fan, ka'da basa lamatua daebafak-kala, tehu ala ta leo lai hataholi daebafak-ka tala'da fa.”

¹² Manek-ka namanene dede'ak ndia boema, namanasa nanseli de ana paleta fo taolisa la'iesak hataholi malelaina manai Babel-la.

¹³ Boema ala po'a-benga paleta ndia, fo ala sanga basa hataholi malelaina-la fo taolisas, de Danial no nonoon-nala lai hataholi malelaina sila dalek boe.

Manetualain natu'du Danial me'is ndia ma sosoa-ndandaan

¹⁴ Boema Danial neu leo Ariokh, fo manek-ka manamanean-nala malangan-na fo ndia te, naheheleaon basa soaneu nakalala'ok huhukunisak ndia. No nanea besa-besa,

¹⁵ Danial natanen nae, tao le'e de, manek-ka kalua paleta balakaik ndia. Boema Ariokh nafa'da Danial hata fo ana da'di so.

¹⁶ No lai-laik Danial neu leo manek-ka neu, de ana dokodoe fo manek-ka fen fai soaneu nafa'da mangalele'do me'is ndia sosoa-ndandaan.

¹⁷ Manek-ka sipok nonoken ndia, boema fali leo uma neu, de nafa'da basa manda'dik sila lala'en-na neu Hananya, Misael, ma Asarya.

¹⁸ Nadenus fo ala hule-haladoi neu Manetualain nai nusa so'dak-ka, fo ela Ana sue-lai sila, ma nafa'das me'is ndia bibila-babaan leobeek. No enok ndia, neukose ala ta hukulisa sila loo hataholi malelaina fe'ek-kala fa.

¹⁹ Nai le'odaek ndia boe, Manetualain nafa'da Danial, me'is ndia bibila-babaan nai ninitak esa dalek. Boema Danial koa-kio Manetualain nai nusa so'dak-ka,

²⁰ nae, “Manetualain ndia manatee-tenok ma makadelek, kokoa-kikiok ba'eneun, losa dodoon-na neu!

²¹ Ndia nde naketu le'do-fai, Ana nakona ma so'u manakoasa. Ndia boeo nde manafe manatee-tenok, boema manaba'e-bati dodole da'uk.

²² Ndia nde nafa'da bibila-babaak mademaina. Ndia bubuluk basa hata lala'en fo ana da'di nai makahatuk dale. Mandela-masa'an-na poti-nan.

²³ Ou, Manetualain fo au be'i-ba'i kaing sene-do'ok-ka. O nde au koa-kio ma amatutua-amadedemak-ka. Nana O fe au manatee-tenok ma be'i-balakaik. O sipok ami dokodoem-ma. Ma O matu'du basa natataak soaneu manek-ka so.”

Danial nafa'da ma nafa'da mangalele'do me'is ndia

²⁴ Basa ndia boema Danial neu leo Ariokh, fo ana hapu basa paleta soaneu taonisa basa hataholi malelaina manai Babel-la. Danial nafa'dan nae, “Boso taomisa hataholi malelaina sila-la. Moo au leo manek-ka neu, nana au sanga afa'da manek-ka me'is ndia sosoa-ndandaan.”

²⁵ No lai-laik, Ariokh noo Danial neu leo Mane Nebukadnezar-ra neu, boema nae, “Atam-ma hapu hataholi esa nai hataholi Yahudi nanaookak-kala dalek, nafa'da-nala Ama Manek me'in-na sosoa-ndandaan.”

²⁶ Boema manek-ka nafa'da Danial fo loken lae Beltsazar boe, nae, “O hapu mafa'da au, au me'ing-nga sosoa-ndandaan do ta?”

²⁷ Danial nataa nae, “Ama Manek, ta hapu hataholi malelaina, dukun malelak, mananafa'da nalelak manda'dik manamaik-ka, do malela nduuk-kala hapu lafa'da dede'ak ndia neu Ama Manek.

²⁸ Tehu nai nusa so'dak-ka, hapu Manetualain, fo Ana soi heni basa bibila-babaak lala'en-na so, de nafa'da basa Ama Manek, hata fo ana da'di nai fai makabuin. Besak ia, fe atam-a loak soaneu nafa'da mangalele'do me'is ma ninitak fo Ama Manek hapun nai lelek Ama Manek sungu ndia.

²⁹ Lelek Ama Manek sungu, Ama Manek nalame'i la'eneu tepo-lelek manamaik-ka. Manetualain soi heni basa bibila-babaak lala'en-na so, de natu'dun neu Ama Manek, hata fo neukose ana da'di.

³⁰ Nafa'da basa atam-ma, bibila-babaak babaak ia so, ta hu kande atam-ma malelan-na lena heni su'di see fa, tehu fo ela Ama Manek hapu bubuluk Ama Manek me'in ndia sosoa-ndandaan, ma boeo malelak la'eneu Ama Manek dale bobongoanan-na.

³¹ Ninitak fo Ama Manek nitak-ka nde ia, Nai Ama Manek matan-na hapu dodoki-dudulak esa. Dodoki-dudulak ndia ba'un-naseli ma mangadilak, tehu mata-panan nakatata'u.

³² Langan-na nanataok neme lilopila isik-ka mai, fanan-na ma alun-na neme lilofulak-ka mai, ma tala'dan-na ma pabu'un-na neme liti-a mai,

³³ puun-na neme besi ma ein esa neme besi ma esak-ka neme dae ulek-ka mai.

³⁴ Lelek Ama Manek nanganalon boema, batu matuaina esa, hataholi ta koila'e fan, tehu ana tu'da neme felak lain mai, boema napaluni-na dodoki-dudulak ndia ein fo nanataok neme besi ma dae ulek ndia mai, de lutu-lutu.

³⁵ Nai hatematak ndia boe, dodoki-dudulak ndia lala'en-na nakalulutuk, de ana da'di besi manadoudouk, dae ulek, liti, lilofulak, ma lilopilas fo noe henin sama leo afu nai keke'di gandum-ma mamanan-na, nai fai hanan-na. Anin-na fuu madoudouk ndia de ana lapu, nalosa ta la'oela leen faa anak boe. Tehu batu manatao natu'u dodoki-dudulak ndia namatua, boema ana da'di lete matuaina de henu basa daebafak-ka lala'en-na.

³⁶ Ama Manek me'in-na nde ndia, de besak ia, atam-ma nafa'da mangalele'do sosoa-ndandaan.

³⁷ Ama Manek fo mandela-masa'ak-ka nde been-na, manek neme basa manek lala'en-na mai. Ama Manek nde manakoasa matuaina. Manetualain manai nusa so'dak-ka fe basa Ama Manek nusak ia, koasa, be'i-balakaik ma matua-madema so.

³⁸ Nakadada'dik Ama Manek da'di manakoasa neu daebafak fo nanuu laun, ma neu manupaui ma bana fe'ek-kala. Ama Manek nde lilopilas manai dodoki-dudulak ndia langan-na.

³⁹ Tehu lelek Ama Manek nusan-na nate'e soona, neukose nusak fe'ek esa to'da mai, tehu ta ba'u Ama Manek nusan-na fa. Basa soona, nusa ka telu-a to'da mai, fo nakasasaman-na nde liti manai dodoki-dudulak ndia, fo neukose ana koasa basa daebafak-ka lala'en-na.

⁴⁰ Basa ndia soona, nusa ka 4 to'da mai, fo balakain-na leo besi. Ma sama leo besi manatao nakalulutuk-ka, fo ana tao nakalulutuk su'di beek-ka, leondiak boe nusa ka 4 ia, neukose ana fepa ma ana tao nakalulutuk nusa fe'ek sila-la.

⁴¹ Dodoki-dudulak fo seli nanataok neme dae ulek ma seli neme besi mai ndia, ein-na ma eiku'un-na natu'du nae, nai fai makabuin, nusak ndia neukose nanababa'ek. Nusak ndia mabe'i-balakaik boe, nanahu dae ulek ndia nanasese'dok no besi.

⁴² Eiku'un fo seli nanataok neme besi ma seli neme dae ulek mai ndia, sosoa-ndandaan nae nusak nggelok balakaik ma nggelok tapandoes.

⁴³ Besi fo nanasese'dok no dae ulek ndia, ana fe ta'du boe nae, neukose nusak ndia ana sanga enok tao balakai aoinan-na nenik ana saoana sese'do-babalik no nusa fe'ek-kala, tehu sasanga enon ndia sosoa-ndandaan ta, sama leo besi boeo ta hapu sese'dok-kana no dae ulek fa.

⁴⁴ Nai lelek manek sila-la paleta, Manetualain manai nusa so'dak-ka, neukose napadedeik nusak esa fo neukose nakatatakak losa dodoon-na, ma neukose leoina bee boe ta hapu sengi fan. Nusak ndia neukose tao nakalulutuk basa nusa fe'ek sila-la lala'en-na.

⁴⁵ Ade, Ama Manek ta nita basa nae hataholi ta koila'e batu esa fa, te batu ndia tu'da neme felak lain mai, boema napaluni ma ana tao nakalulutuk dodoki-dudulak neme besi, liti, dae ulek, lilofulak ma lilopilas ndia mai hetu? Manetualain fo matuaina, nafa'da Ama Manek hata fo neukose ana da'di. Bisa lamahele me'is ndia, ma atam-ma nafa'da mangalele'don-na la'en.”

Danial sipo baba'ek neme manek-ka mai

⁴⁶ Boema Mane Nebukadnezar-ra senek neu Danial matan-na, de ana paleta fo ela fe ha'da-holomata neu Danial ma tunu-hotu fen tutunu-hohotuk nanatunuk, boema tunu-hotu fe'ek.

⁴⁷ Manek-ka nafa'da nae, “Tete'ek-ka Danial, o Manetualaim ndia matuaina nanseli nai basa Manetualain lala'en-na. Ndia nde been-na, manakoasa neu basa manek lala'en-na, ma manasoi heni basa bibila-babaak lala'en-na. Au bubuluk dede'ak ndia, nana o mafa'da-malak bibila-babaak ndia sosoa-ndandaan.”

⁴⁸ Basa boema ana fe Danial nangatutuu madema, ma ana fen bua-lo'a manahiik makadotok, ma ala so'un da'di nggobelnol Babel, boema ala fen da'di malangan mademaina neu basa manamanoli-mafa'dak manai uma manek-ka.

⁴⁹ Tehu no Danial nonoken-na, de manek-ka fe Babel leo Sadrakh, Mesakh, ma Abednego neu fo ala paletan, te Danial leo neme manek-ka uma manen-na.