DANIAL 11 - Susula Malalaok Hehelu Palak Ma Hehelu Beuk

¹ Ndia nde nanafe bela-ba'uk soaneu tulu-fali ma nasala'e au, nai lelek fo Darius hataholi Media ndia, ana paleta neu teuk makasososan-na.

² Ma hata fo neukose au afa'dan neu o ndia tete'ek-ka.” Ata nusa so'dak ndia nafa'da nae, “Neukose mane fe'ek 3, ala paleta Persia, fo mane ka 4, tunga, manek ndia su'i-beten lena heni mane fe'ek-kala. Neu paletan ma koasan-na mate'e na, neukose nakasusu'di be'i-balakaik no nusa Yunani-a.

Nusa Masir ma nusa Siria

³ Basa soona, neukose mane mabe'i-balakaik esa to'da mai. Neukose ana paleta nusa matuaina, ma ana tao tunga ka'da dale hihiin-na.

⁴ Tehu losa fai matua-mademan mate'en-na soona, neukose nusan-na heaba'en fo nanababa'ek da'di baba'ek 4. Mane-manek fo ndia tititi-nonosin ta sila fa, neukose ala paleta nggatin, tehu be'i-balakain-nala ta sama no fan.

⁵ Neukose manek nusa kona ana da'di manek mabe'i-balakaik. Tehu neukose malanga solda'du manai lain esa, be'i-balakain lena henin, de neukose ana paleta nusak matuaina lena seluk bai.

⁶ Basa teuk de'ubee boema, manek nusa kona, neukose nakabua no manek nusa kii nenik enok, ana fe anafe'on-na sao manek nusa kii ndia. Tehu nakabuak ndia ta nala dook-ka fa, ma neukose ala taolisa anafe'on ndia, leondiak boe saotoun-na ma anan-na, ma ata-atan fo leu lafuli-nana.

⁷ Basa ndia, de beita doanak boen te, neukose anafe'on ndia teidalen esa da'di manek. Neukose neu sapu-na manek nusa kii solda'dun-nala, ma ana kae kota musun-na, de ana sengis.

⁸ Nai lelek ana fali ne'un leo Masir neu, neukose ana ho'i neni musun-na lamatua daebafan-na dodoki-dudulan, ma hata-heto lilopilas ma lilofulak fo nanatunu-hotu basak neu lamatua daebafak ndia so. Teuk de'ubee dalen-na, neukose ta nata'ti no manek nusa kii fa.

⁹ Basa boema, manek nusa kii, neukose nata'ti no nusa kona, tehu neukose nakadedeak, fo ana fali ne'un leo nusan-na neu.

¹⁰ Boema manek nusa kii-a anamanen-nala laheheleao soaneu latee-lata'ti, de ala hoka basa solda'du-la de da'di bubua matuaina esa. Solda'du sila-la esa neu sapu nakahuluk sama leo faa oek-ka. Ana sapu-nalas neu kala'i dua-na boema, ana kae kota musu-a.

¹¹ Boema manek nusa kona namanasa leona, de neu leo musu dale neu, de ana la'ban manek nusa kii. Neukose ana sengi manek nusa kii nadenu solda'du bubuaina ndia.

¹² Basa boema, neukose namahoko nanseli, nanahu ana sengi ma hu kande ana taonisa solda'du musu makadotok, tehu neukose ana ta koasa nakandoo fa.

¹³ Soaneu kala'i dua-na, manek nusa kii hoka seluk basa solda'dun-nala, da'di bubua matuaina esa, tehu ba'ulena makasososak-ka. Metema fain-na losa soona, neukose ana tutulumatak no solda'du bubua matuainan-na ma tafa-sisilo makadotok nanseli.

¹⁴ Boema neukose hataholi makadotok la'ban manek nusa kona. Ma hataholi dale susue-lalai tak de'ubee, leme o leoinam-ma mai, fo Danial, neukose ala la'ban boe, nanahu lita basa ninitak esa so. Tehu neukose buna-boan ta.

¹⁵ Basa boema, neukose manek nusa kii-a, sapu-na kota esa, makota musu, de ana loso-nan. Nusak kona solda'dun-nala ta hapu lakatatakak fa, ma solda'du nanahehelen-nala boeo ta hapu la'ban labe'i so'on.

¹⁶ Manek nusa kii ndia, neukose ana tao tunga ka'da dale hihiin-na, te ala ta la'ban-nana faa anak boen. Neukose nangatuu-na dae maoe-maisik-ka, fo ana koasa la'iesak-kana.

¹⁷ Basa boema, manek nusa kii-a, ana sadia-na basa solda'dun-nala lala'en-na fo leu sapu-la nusa kona. Boema ana dodoo, fo ana koasan-na basa musun-na nusan-nala lala'en-na, de neukose ana tao hehelu-balataak no mane Masir-ra, nenik ana fe anafe'on-na sao mane Masir ndia; tehu dale tutu'un ndia buna-boan ta.

¹⁸ Basa ndia boema, neukose neu sapu-na leoina manai tasi su'uk-kala, de ana sengi ba'uk-ka. Tehu mauli-malanga nusa fe'ek esa, neukose ana tao nakamate nakamumulu-nakamamaek fo ana taon ndia, nakalenak neukose ana balas-sana nenik nakamumulu-nakamamaek ndia seluk.

¹⁹ Manek nusa kii ndia, neukose ana fali ne'un leo nusan-na kota musun-nala neu, tehu neukose ala sengin, de ta seseik na'den-na so'on.

²⁰ Neukose manek esa nggatin, fo neukose nadenu hataholi mana'a ngga'din fo dale susue-lalai taak-ka, neu susu bea no laka-nakasetik fo popo-tama seluk nusan-na su'i-beten. Nai fai keke'uanak esa mesak-kana, manek ndia neukose nanataonisak, ta no le'do-le'dok fa, ma ta nai musu dale boen.”

Manek nusa kii fo tatao-nono'in mangalauk

²¹ Ata nusa so'dak ndia, nafa'da seluk au nae, “Manek manamaik fo ana paleta nusa kii nde been-na, hataholi matasi'da-matasaek esa, fo ta nanu haak da'di manek fa. Tehu neukose, ana mai no kaiboik fo ana loso-na nangatutuu manek-ka nenik tipu-daik.

²² Basa solda'du lala'en-na, ala la'ban-nana, hei leomae Imam Matuaina boeo, neukose ana sapu balisis ma ana taonisas.

²³ Ana nalelesi hehelu-balataak fo besak-ka ana taon no leoina fe'ek-kala. Ma neukose ana boetai da'di mabe'i-balakaik, leomae ka'da ana paleta nusa anak boe.

²⁴ No ke'di-ndiuk, neu sapu-na nggolok maoe-maisik-kala, nai lelek laun-nala laso'da no nee-nee lino-linok nai ndia. Neukose ana tao-no'i hata fo bei-ba'i kain-nala beita tao-no'i lita fan. Boema neukose, ana baba'e fe basa manatia-toba-nana, bua-lo'as fo ana loso nenik-kala, ma su'i-betes fo ana hapus nai natee-natatik dale. Neukose ana sanga enok, fo neu sapun-na mamanak fo makota musuk-kala, tehu no lai-laik basa fain-na so.

²⁵ Basa boema, neukose no napalanik nakabubuan-na solda'du bubuaina esa, fo neu sapu-na manek nusa kona, fo manek ndia boeo, naheheleaon basa soaneu ana la'ban-nana nenik solda'du balakaik makadotok nanseli. Tehu manek nusa kona ta hapu nakatatakak fa, nanahu neukose ala ke'di-ndiun.

²⁶ Manamanoli-mafa'dan manadeka loon-nana, neukose ala tao latu'dan. Neukose ala taolisa solda'dun makadotok, de neukose ala sapu balisi solda'dun-nala.

²⁷ Basa boema, mane ka duak sila-la neukose la'a lakabubua nai mei esa lain, tehu lape'da dudu'a-aafi mangalauk, ma neukose esa nasapepeko-nasandandali esa. Tehu sila dale tutu'un-nala buna-boan ta, nana fain-na beita losa fa.

²⁸ Basa boema, manek nusa kii-a neni basa ana hapu bua-lo'as nanaloso nak-kala, de ana fali ne'un leo nusan-na neu. Naketu basa nai dalen dale, fo ana tao nakalulutuk agama fo Manetualain anan-nala lamahelek-ka. Neukose ana tao tunga ka'da dale hihiin-na, boema ana fali ne'un leo nusan-na neu.

²⁹ Faik de'ube makabuin-na boema, neukose neu sapu-na seluk nusa kona, tehu neninin-na fe'ek neme kala'i makasososan-na mai.

³⁰ Nana neukose, hataholi Roma-la loo ofan-nala, ala mai leme Siprus mai, fo latee-lata'ti lon, nalosa ana bii nanseli. Boema neukose ana fali no nasak nanseli, de ana sanga enok fo tao nakalulutuk Manetualain anan-nala agaman-na. Neukose ana tunga hataholi manafali deak leme agama ndia mai, nanoli-nafa'dan.

³¹ Boema ana haitua solda'du-la leu tao langgenggeo Manetualain Uman-na. Neukose ala lose heni tutunu-hohotu fai-faik-ka de napadedeik-na hata esa nakatata'u nanseli, fo loken lae Mangalauk fo manatao nakalulutuk.

³² Boema no tipu-daik, neukose manek ndia fufu'di-oo'dok hataholi fo manala'oela agaman-na, fo daenga ala au tulu-falin. Tehu hataholi fo lamahele neu Manetualain-na, neukose lapalani la'ban-nana.

³³ Hataholi manatee-tenok fo lauli-lalanga laun-nala, neukose ala tao-la hataholi makadotok lalelak. Tehu soaneu faik de'ubee dalen-na, neukose ala taolisa sila de'ubee hu kande natee-natatik-ka, do hu kande ha'i-a, ma hataholi de'ubee seluk bai soona, neukose nakodaa-la lamanako uman-nala, ma ala foo lenis.

³⁴ Nai lelek ala bei tao-tao loo kanisak ndia te, neukose Manetualain anan-nala, hapu tutulu-fafalik faa anak, tehu hataholi makadotok lakabubua loos ka'da soaneu sila paluun-na mesak-kana.

³⁵ Mauli-malangan manatee-tenok sila-la nggelok, neukose nanataonisak, tehu ndia ka'da nalupa soso'ba-susu'dik ba'eneu Manetualain anan-nala, fo ala da'di neuisik. Neukose dede'ak ndia ana da'di losa tepo-lelek mate'ek-ka, fo nde tepo-lelek Manetualain naketu basak-ka.

³⁶ Neukose manek nusak kii-a, ana tao tunga ka'da dale hihiin-na. Neukose no koao-ndaeaok, nafa'da nae, ndia ba'ulena lamatua daebafak lala'en-na, nakalenak ndia boeo, ba'ulena Manetualain Fo Mademaina. Neukose ana bisa tao leondiak, losa Manetualain nasa-melun nate'e. Nana hata fo Manetualain naketu basan, muse nakahuluk nanatao natetuk dei.

³⁷ Neukose manek ndia ta nafaduli neu su'di lamatua daebafak bee fo bei-ba'i kain sene-do'ok-ka, leomae lamatua daebafak fo inak-kala sene-do'ok-ka boe. Ta nafaduli lamatua daebafak sila-la fa, nanahu nafa'da nae, ndia ba'ulena lamatua daebafak sila.

³⁸ Nasafalin-na, neukose ana fe ha'da-holomata neu lamatua daebafak fo bei-ba'i kain beita sene-do'ok lita fan, fo nde lamatua daebafak manamasulu-mahapa kota musu-la. Neukose ana tunu-hotu lilopilas, lilofulak, poemata ma tunu-hotu malole-mana'a fe'ek fe lamatua daebafak fo bei-ba'i kain beita sene-do'ok lita fan.

³⁹ Neukose ana hele hataholi manasene-do'ok neu lamatua daebafa fe'ek, fo leu sapu-la kota musu matea-mahelek-kala. See manaku lamatua daebafak ndia soona, neukose nanafe ha'da-holomata matuaina, ma nagatutuu mademaina, boema dui fen dae fo da'di neu ngga'din-na.

⁴⁰ Metema manek nusa kii ndia, koasan-na sanga deka basan soona, manek nusa kona sapu-nan. Boema manek nusa kii-a, neukose ana balas natee-natatik ndia no mamate-momopon. Neukose neni kaleta musu, ndala ma ofak makadotok. Neukose ana sapu sama leo faa oek-ka, de nangatuu-na nusak makadotok.

⁴¹ Nakalenak neu sapu-na dae maoe-maisi-ka boe, ma neukose ana taonisa hataholi lifu-lifun. Tehu nusa Edom, Moab ma nusa Amon-na dae nananita-nalelan-nala neukose laso'da.

⁴² Nai lelek nangatuu-na nusak sila-la, nusa Masir-ra boeo, neukose ta naladeak fa.

⁴³ Neukose ana loso neni Masir hata-heton fo leo lilopilas ma lilofulak boema hata-heto beli matuaina fe'e-fe'ek-kala. Neukose hataholi Libia-la loo hataholi Sudan-nala look-kana.

⁴⁴ Boema, neukose halak-ka neme dulu ma neme kii mai, tao langgengek-kana, nalosa nata'ti no mamate-momopon, de ana taonisa hataholi makadotok.

⁴⁵ Nakalenak, neukose napadedeik lalaa temak paletan-na nai tasi ma letek-ka tala'da; letek fo Manetualain Uma mamanan-na. Tehu basa boema, neukose maten, de ta hapu hataholi esa boen tulu-fali fan.”