DANIAL 1 - Susula Malalaok Hehelu Palak Ma Hehelu Beuk

DANIAL NO NONOON-NALA TUTUIN-NA 1:1–6:29 Muli-soluk Yahudi-la lai Nebukadnezar Uma manen-na

¹ Mane Yoyakim-ma paleta Yehuda neu teu ka telun-na boema, Nebukadnezar fo manek Babel-la neu sapu leo kota Yerusalem neu, de nakahapi-nan.

² Manetualain fen sengi Mane Yoyakim-ma, de ala loso leni bua-lo'a kabelik-kala seli leme Manetualain Uman dale mai. Ana foo neni hataholi-la, nos leo ndia lamatua daebafan manai Babel-la uma sosongon dale leu, ma ana pe'da ana loso neni bua-lo'a kabelik-kala lai gudang-gudang manai uma sosongok ndia dalek.

³ Basa boema, manek-ka paleta Aspenas, fo malangan nai uma manek-ka, fo ana hele-na, ana foo neni hataholi Israel-la, touana muli-soluk de'ubee leme daa manek do daa manefetoana mai.

⁴ Touana muli-soluk sila-la, muse sala-singo tak-kala. Aon-nala muse makadelek, sakolan-nala matua, malelak ma lalelak dede'ak ba'u, boema ala tunga paleta fo lanea nai uma manek-ka. Aspenas muse nanolis, fo ala lees ma sulak lalelak dede'a Babel.

⁵ Manek-ka boeo naketu nae, sila nana'a-nininun-nala, muse sama no manek-ka uma isin-nala nana'a-nininun. Ana sakola basas teuk 3 soona, muse leu leo manek-ka leu, fo lanea nai uma manek-ka.

⁶ Danial, Hananya, Misael ma Azarya, leme leo Yehuda mai, lai touana muli-soluk sila dalek boe.

⁷ Malanga uma manek-ka nggati heni na'den-nala da'di: Beltsazar, Sadrakh, Mesakh, ma Abednego.

^8-9 No Manetualain tutulu-fafalin, de Aspenas sue-lai Danial. Danial naketu basa nai dalen dale soaneu ana ta tao nanggenggeo aoinan-na nenik nana'a-nininu angol maneme uma manek-ka mai fa, hu ndia noke Aspenas fo daenga fen nana'a-nininu fe'ek.

¹⁰ Nanahu Aspenas bii manek-ka, de nafa'dan nae, “Manek-ka nde naketu basa o nana'a-nininum so, da'di metema tunga hahapun-na, metema o ta so'da-la'dak, sama leo touana muli-soluk fe'ek-kala fa soona, tao leo bee-o, neukose ana taonisa au.”

¹¹ Basa boema, Danial nakokolaok dede'ak ndia no manamanea fo Aspenas fes lanea Danial no nonoo ka telun-nala. Danial nafa'dan nae,

¹² “So'ba su'dik ami faik sanahulu dalen-na; fe ami mi'a ka'da aidoo ma minu oe mesak-kana.

¹³ Basa faik sanahulu soona, makasasamak ami mata-panam no touana muli-soluk mana'a nana'a-nininuk fo manek-ka naketu basak-ka, soona o ho'i nakeketuk tunga o mata memetem-ma.”

¹⁴ Boema manamanea ndia nakaheik, de ana so'ba-sudik-kana, faik sanahulu dalen-na.

¹⁵ Lelek basa faik sanahulu boema, metes soona matan-nala lapena ma balakaik lena heni basa touana muli-soluk fo ala hapu nana'a-nininuk neme manek-ka mein lain mai.

¹⁶ Mulai neme faik ndia, manamanea ndia ta sadia fes nana'a-nininuk fo manek-ka naketuk-ka so'on, te la'a ka'da aidoo ma linu oe mesak-kana.

¹⁷ Manetualain fe touana muli-solu ka haak sila-la manatee-tenok ma malelak matuaina nai nanoli mademaina-la dalek. Fe'ek neme ndia mai, Ana fe Danial malelak boe, fo nafa'da mangalele'do ninitak ma me'is-sala sosoa-ndandaan.

¹⁸ Ala sakola basa teuk 3, fo tunga manek-ka nakeketun ndia boema, Aspenas no basa touana muli-soluk sila-la leu lataa Mane Nebukadnezar-ra.

¹⁹ Manek-ka natane fo lataa, boema ana hapu Danial, Hananya, Misael ma Azarya malelan-nala lena heni basa fe'ek sila-la nai malelak lala'en-na dalek. Boema ala mulai ho'u tatao-nono'in-nala nai uma manek dale.

²⁰ Metema manek-ka nafa'da dede'ak esa, fo dede'ak ndia paluu lafa'da mangalele'don ma tai-dodook soona, ana bubuluk touana muli-solu ka haak sila-la kokoe-nanasin ma hahapun-nala malole lena la'i 10 neme basa hataholi mananeuk nalelak manda'dik manamaik-kala, boema dukun manai ndia nusan-na lala'en-na, nanoli-nafa'dan ma hahapun-nala.

²¹ Danial nakalala'ok bela-ba'un nahele nai uma manek-ka, losa Mane Koresh neme Persia mai, ana paleta Babel.