BILANGAN 5 - Susula Malalaok Hehelu Palak Ma Hehelu Beuk

Nakanenetek la'eneu hataholi manggenggeok-ka

¹ Manetualain nafa'da Musa nae,

² “Fe hataholi Israel-la paleta nde ia nae: Basa hataholi fo ana hapu he'di lou mangalauk, do he'dis-sa nai mamaen-na, do hataholi manakoila'e mamates-sa, muse kalua henin neme hataholi Israel-la mamana ofun-na mai.

³ Muse nadenus fo ala la'o, fo ela ala boso tao langgenggeo mamana ofu-a, fo nai bee, Au leo sama-sama o Au anang-ngala.”

⁴ Hataholi Israel-la lakalala'ok paleta ndia, de ala kalua heni basa hataholi leo sila-kala leme mamana ofu-a mai.

Bae hutak-ka eno-dalan

⁵ Manetualain fe Musa

⁶ nakanenetek ia-la, fo ana fen neu hataholi Israel-la nae: Metema hataholi esa ta lilineka neu Manetualain nenik ana tao salak soaneu hataholi fe'ek soona,

⁷ hataholi ndia, muse manaku sala-singon, ma ana bae namadai leo hataholi fo nakatutu'dak-kana ndia, ma ana bae popo-tama seluk palsen duahulu neme baba'e makasososan-na mai.

⁸ Teu metema, hataholi fo ana tao nakatutu'dak-ka maten so, tehu tolanoo ka'a-fa'din manadekan ta, soona muse fe doi sosoin ndia leo Manetualain neu, fo da'di imam-ma baba'en. Hataholi masalak ndia bi'ilopo manen fo soaneu feta sala-singon hapu do'o do ampon-na, ta nanalekek nai doi sosoin ndia dalek fa.

⁹ Neme su'di beek fo hataholi Israel-la tunu-hotu fen neu Manetualain-na, tunu-hotu hehelin-na, da'di imam manasipo tunu-hotuk ndia, nuun.

¹⁰ Hata fo hataholi esa tunu-hotu fen neu Manetualain soona, ana da'di hataholi ndia baba'e mesan. Ka'da hata fo ana fen leo imam esa neu soona, ana da'di imam ndia baba'en.

Nakanenetek la'eneu saotouk fo ana neo saoinan-na

¹¹ Manetualain nadenu Musa

^12-14 fe hataholi Israel-la nakanenetek ia-la. Bole da'di touk esa ana neo saoinan-na. Naedaenga saoinan ndia ta lilineka neu fan, de ana tao nanggenggeo aoinan-na, nanahu ana sungu no tou fe'ek. Tehu saotouk ndia ta nanuu buti fa, nanahu saoinan-na tao tataos ndia no nafufunik; sakasiin ta, ma ana ta ho'un-na fan. Do bole da'di saotouk esa ana neo saoinan-na, te se'kona saoinan ndia ta la'ok sala fa.

¹⁵ Nai dede'ak ka duak sila-la dalek, saotouk-ka muse no saoinan-na leo imam-ma neu. Saotouk ndia boeo muse neni tunu-hotuk fo ana paluun, fo nde ha'desopuk gandum kilo esa. Ta bole po'a mina setun, do tao boomenik neu ha'desopuk ndia fa, nanahu ndia nalupa tunu-hotu neneok, ma tetee-tutu'dan soaneu ana da'di ta'du-tana nae saotouk-ka neo saoinan-na.

¹⁶ Imam-ma muse nadenu inak ndia neu leo mei tunu-hotuk-ka matan-na neu, fo napadeik nasale leo Manetualain neu.

¹⁷ Soona imam-ma muse ho'i-na mango dae esa, fo ana di'a oe malalao-malalafuk faa anak leo dalek neu. Basa ndia soona, ana muse ho'in-na afu faaanak neme Manetualain Lalaa Teman-na laten-na mai, fo ana taon leo oe ndia dalek neu.

¹⁸ Basa soona, ana muse lofa heni inak ndia langadoon-na, ma ana tao ha'desopuk fo tunu-hotu neneok-ka leo liman dale neu, te imam-ma, ana ho'u oe makahe'duk fo maneni soo-supak-ka.

¹⁹ Basa ndia soona, imam-ma muse kokolak soo-supak, fo noke inak ndia sipok-kana. Imam-ma, muse nafa'da nae, “Metema o ta sungu mo touk fe'ek fa soona, oe maneni soo-supak ia ta la'e o fa.

²⁰ Tehu metema, o sungu mo touk fe'ek soona,

²¹ Sa'di leo been-na, Manetualain taon-na o na'dem-ma da'di nanasoo-supak nai o leoinam dalek. Sa'di leo been-na, Ana tao-na o puu huum-ma loun-na kukulu, ma o teim-ma natafuu.

²² Oe fo maneni soo-supak ia, neukose ana masok leo o teim dale neu, fo ana tao-na o teim-ma natafuu, ma ana tao-na o puu huum-ma, loun-na kukulu.” Soona inak ndia muse nataa nae, “Au sipok; de sa'di leo been-na, Manetualain taon leondiak.”

²³ Boema imam-ma muse sulak soo-supak ndia neu susula doo nanalunuk esa, fo basa soona, ana lose henin nenik oe makahe'duk ndia

²⁴ Imam-ma nadenu inak ndia ninu oe maneni soo-supak-ka. Metema ninu oe ndia soona, oe ndia tao-nan name'da he'dis

²⁵ Imam-ma muse ho'in-na ha'desopu tunu-hotuk ndia, fo ana so'u botik-kana nai Manetualain matan-na neu, soona nenin leo mei tunu-hotuk-ka neu.

²⁶ Boema muse ana ho'i-na ha'desopuk nafanggetek esa, fo da'di leo ta'du-tana nae tunu-hotu basa ha'desopuk ndia lala'en-na so, soona ana tunun nai mei tunu-hotuk lain. Mate'en-na, ana fe inak ndia ninu oe ndia.

²⁷ Leounik-ka inak ndia hohonge soona, oe ndia tao-nan name'da he'dis nanseli; tein-na natafuu, ma puu huun-na loun-na kukulu. Neukose na'den-na nanasoo-supak, nai leoinan-na dalek.

²⁸ Tehu leounik-ka ta nasala fa soona, soo-supak ndia ta la'e fan, de ana bei bisa bongi seluk.

^29-30 Nakaneneten-na leondiak ba'eneu saotouk esa, metema ana holo ma ana neo nae saoinan-na la'ok sala, de ana tao nanggenggeo aoinan-na. Touk ndia muse noo saoinan ndia neu nataa Manetualain, de imam-ma muse tao nakanenetek ndia soaneu inak dia.

³¹ Touk ndia natapo'i neme salak-ka mai, tehu metema saoinan-na tete'ek-ka nasala soona, muse ana lu'a-lepa salak ndia.