BILANGAN 4 - Susula Malalaok Hehelu Palak Ma Hehelu Beuk

Hataholi Lewi maneme leo-ingu Kehat-ta, bela-ba'un

¹ Manetualain nadenu Musa ma Harun,

² fo ala leke hataholi Lewi maneme leo-ingu Kehat-ta, dede'un-na, tunga esa-esak teidalen,

³ boema sulak basa touk fo teun teluhulu losa limahulu, fo muse nakalala'ok nabe'i bela-ba'uk manai Manetualain Lalaa Teman-na.

⁴ Sila tatao-nono'in nde, ito-ato bua-lo'as malalao-malalafuk nanseli-la.

⁵ Manetualain fe Musa, paleta nde ia nae, Metema fain-na losa, fo ofe heni mamana ofu-la soona. Harun no anan-nala muse leu leo Manetualain Lalaa Teman dale leu, fo lakona heni tema lelesu manai Peti Hehelu-balataak-ka uluk, fo poti ketu Peti ndia nenik tema lelesu ndia.

⁶ Basa ndia soona, muse ala poti ketu seluk-kana nenik tema abalutu biak esa, boema ala lalaa tema balau biak esa neu lain, ma ala tao Peti ndia ai ndondolon-nala neu.

⁷ Ala muse bela tema balau biak esa neu mei fo loti tunu-hotuk mamanan-na, soaneu Manetualain, ma nai mei ndia lain, muse ala pe'da pinga maloa, dulang anak soaneu boomenik-ka mamanan-na, dulang anak soaneu tunu-hotuk mamanan-na, ma kete soaneu tunu-hotu angol-la. Loti nanasadiak-ka, muse nahele nai mei ndia lain.

⁸ Ala muse poti ketu basa sila-la nenik tema pilas biak esa, boema ala bela bana lou mangana'u anak esa neu lain, ma ala tao mei ndia ai ndondolon-nala neu.

⁹ Muse ala ho'i-la tema balau biak esa, fo ala poti ketu banu eik-ka no banun-nala, besianak soaneu tao balisi banuk-ka tetelun-na, ma basa mina setun-na mamanan-nala.

¹⁰ Banu eik-ka no basa hata-heton, muse ala potin nenik bana lou mangana'u anak esa, fo basa soona, ala pe'dan neu ai ndondolok-kala mamanan lain.

¹¹ Basa ndia soona, ala muse bela tema balau biak esa, neu mei tunu-hotu lilopilas ndia lain, fo ala poti ketun nenik bana lou mangana'u anak esa, basa soona, ala tao mei tunu-hotuk ndia, ai ndondolon-nala neu.

¹² Basa hata-heto fo nanapakek nai Kama Malalao-malalafuk-ka dalek, muse ala ho'i-las fo ala potis nenik tema balau biak esa. Basa soona, muse ala poti ketun nenik bana lou mangana'u anak esa, fo ala pe'dan neu ai ndondolok-kala lain.

¹³ Muse ala lose heni afu manai mei tunu-hotuk ndia lain, fo basa soona, ala bela tema pila balanggeok biak esa neu lain.

¹⁴ Ma nai tema pila balanggeok ndia lain, muse ala pe'da basa hata-heto fo nanapakek nai makaluku-makatele dale, fo nde: ha'i-a mamanan-na, kokofuk, kakaik, ma bokol. Boema, ala muse poti ketu basa sila-la nenik bana lou mangana'u anak esa, ma ala tao ai ndondolon-nala neu.

^15-20 Manetualain nafa'da Musa no Harun nae, “Nai lelek emi ofe heni mamana ofu-a soona, Harun no anan-nala muse leu leo Au Lalaa Temang dale leu, fo ala poti ketu basa bua-lo'as ma hata-heto manai sila-la. Basa ndia soona, besak-ka hataholi Kehat-tala bole mai fo ala ndolon leona. Tehu, ala ta bole mete do deka, do ko'i la'e hata-heto sila-la fa, nanahu nanafe hehelik basa neu Au so. Metema ala la'o lenan soona, neukose mates. Da'di, fo ela hataholi Kehat sila-la na'den-nala boso nanalose henik neme leo Lewi-a dalek mai, Harun no anan-nala muse fe sila esa-esak bela-ba'u beek fo muse lenin. Hataholi Kehat-tala bela-ba'un nde ndia, nai lelek lali heok Au Lalaa Temang-nga. Eleazar fo Harun anan-na, muse mete-nakanae Au Lalaa Temang-nga lala'en-na, banuk-kala minan-na, boomenik-ka, tutunu-hohotu gandum soaneu nana'ak fo nanasadia nahelek-ka, mina feta, ma basa hata manai Au Lalaa Temang ndia dalek.”

Hataholi Lewi maneme leo-ingu Gerson-na bela-ba'un

²¹ Manetualain nadenu Musa

²² leke hataholi Lewi maneme leo-ingu Gerson-na dede'un-na, tunga esa-esak teidalen.

²³ Musa muse sulak basa touk fo teun teluhulu losa 50 na'den-nala, fo ela ala tao labe'i tatao-nono'ik manai Manetualain Lalaa Teman-na.

²⁴ Ala fes bela-ba'uk, soaneu ala so'u bua-lo'as-sala nde ia:

²⁵ Lalaa Temak ndia teman-na, no tema lalaan manai dalek ma manai deak-ka, fo nanataok neme bana lou mangana'u anak-ka mai, ma temak manai Lalaa Temak-ka lelesun-na,

²⁶ tema pepelek-kala no tali papa'an-nala soaneu Lalaa Temak-ka, no mei tunu-hotuk-ka so'dan manai boboa-kaisun, temak manai lelesuina, fo nai Lalaa Temak-ka so'dan-na, ma basa hata-heto fo nanapakek soaneu pasak lenik basa buas sila-la. Ala mete-lakanae basa tatao-nono'ik, fo natu'tik no bua-lo'as sila-la.

²⁷ Musa no Harun muse lanea, fo ela tatao-nono'ik fo Harun no anan-nala fen neu hataholi Gerson sila-la muse nanatao-no'ik, ma basa bua-lo'as fo muse nanaso'uk-kala, muse nanaso'uk.

²⁸ Hataholi Gerson-nala bela-ba'un nai Lalaa Temak dale, nde ndia; bela-ba'uk sila-la, muse nananakalala'ok, fo Imam Harun-na anan Itamar, nde nauli-nalangas-sala.

Hataholi Lewi maneme teidalek Merari-a, bela-ba'un

²⁹ Manetualain nadenu Musa leke hataholi Lewi maneme leo-ingu Merari dede'un-na, tunga esa-esak teidalen.

³⁰ Musa muse sulak basa touk fo teun teluhulu losa 50, ma ala tao labe'i bela-ba'uk nai Manetualain Lalaa Teman-na.

³¹ Sila bela-ba'un nde, ala lu'a Lalaa Temak ndia lolon-nala, diin-nala, ma temak manai laten-na.

³² Boeo dii manaokofefeon-na Lalaa Temak ndia so'dan-na, boema temak manai laten-na, ai papakun-nala, ma talin-nala no basa taka-besi fo paluun nai lelek lapadedek-kana. Hataholi-la esa soona muse fen lu'a buas esa.

³³ Leo-ingu Merari-a bela-ba'un nde ndia; basa sila tatao-nono'in manai Manetualain Lalaa Teman-na, muse ala taon, fo Imam Harun-na anan Itamar nde nauli-nalangas-sala.

Leke hataholi Lewi-la dede'un-na

^34-48 Nandaa no Manetualain paletan-na, de Musa, Harun, ma basa mauli-malangan Israel-la, ala leke leo-ingu ka teluk manai leo Lewi-a dalek dede'un-na. Leo-ingu ka teluk sila-la nde: Kehat, Gerson ma Merari. Ala leke teidalek sila-la dede'un-na, neme teidalek esa leo teidalek esa neu. Ala sulak basa touk fo teun teluhulu losa limahulu na'den-nala, ma muse nakalala'ok nabe'i tatao-nono'ik nai Manetualain Lalaa Teman-na. Ala hapu dede'un-na nde ia: Leo-ingu Hataholi-a dede'un-na Kehat hataholi 2.750 Gerson hataholi 2.630 Merari hataholi 3.200 Basa-basan lala'en-na hataholi 8.580

Leo-ingu Hataholi-a dede'un-na

⁴⁹ No Manetualain paletan-na tunga Musa, de basa hataholi-la esa-esak nanasulak, ma esa-esak hapu bela-ba'uk soaneu hata fo muse nalalau-naoonon, do hata fo muse ana lu'a lepa.