BILANGAN 36 - Susula Malalaok Hehelu Palak Ma Hehelu Beuk

Ina masaoanak-kala baba'en-na

¹ Basa malanga uma loo manai leo-ingu Gad, fo Makhir anan-na, fo nde Yusuf anan Manasye upun-na, leu leo Musa ma mauli-malangan fe'ek-kala leu.

² De lafa'da lae, “Manetualain nadenu emi baba'e dae ndia, neu hataholi Israel-la, nenik tu'u batu. Boeo, nadenu emi fe ami tolanom Zelafehad dae pusakan-na, leo anainan-nala neu.

³ Tehu paluu mafandendelek te, metema sila sao tou leo fe'ek soona, sila daen-na tu'da leo, leo fe'ek liman dale neu. No enok ndia, dae fo nananaketu basak, da'di leo ami daem-ma, neukose ta dai so'on.

⁴ Nai Teuk Fe Falik-ka dalek, fo nai lelek, basa hata-heto nananase'ok lala'en-na, muse fe falik-kasa leo mano nuuk makasososak-kana neu, soona neukose Zelafehad ananinan sila saotoun-nala, lanuu lahele dae ndia, fo ala taon da'di sila pusakan, de mopo ami leom-ma daen ndia.”

⁵ Boema, Musa nanduku-nalosak Manetualain paletan ia neu leoina Israel-la nae, “Yusuf tititi-nonosin kokolan ndia, memak la'en,

⁶ hu ndia de, Manetualain nafa'da nae Zelafehad anainan-nala, bole sao su'di see fo, sila lahiik-kana, sa'di sila leo esa.

⁷ Nana hataholi Israel-la pusakan-na, ta bole lali leme leo esa leo, leo esa neu fa.

⁸ Da'di ba'eneu inak fo, nanuu dae pusaka nai leoina Israel-la leon esa dalek soona, ana muse sao hataholi neme leo ndia mai boe. No enok ndia, hataholi Israel-la esa-esak, nanuu bei-ba'i kain-nala dae pusakan-na,

⁹ nalosa dae pusaka ndia, ta lali-lali neme leo esa leo fe'ek neu. Leoina Israel-la, leon-nala esa-esak nanuu nahele dae pusaka mesan-na.”

^10-11 Da'di, nandaa no Manetualain paletan neu Musa, de Zelafehad anainak-ka liman sila fo nde: Mahla, Tirza, Hogla Milka ma Noa, ala sao hataholi fo bei neme sila aman tolanon-na mai.

¹² Ala sao hataholi neme leo-ingu-leo-ingu manai leo Manasye fo Yusuf anan-na, dalek. No enok ndia, sila aman leon-na nanuu nahele sila dae pusakan-na.

¹³ Nakanenetek ma nakeketuk sila-la, nde Manetualain fen neu leoina Israel-la, tunga Musa, nai lelek leoina Israel-la leme masadokek Moab-pa, nai Lee Yarden-na su'un-na, fo deka no kota Yerikho-a.